Luka 6 - Biblía Axweesantá Hhohho' ar Mungú 2004

Yaahasa daanduú deelór Sabaáto

¹ Yesu deelór Sabaátoro baraá qaymór angaáno ganar waaraáhh, nee eeharuuseerós, angaáno guna giqeér, guri pikimís nee guri /ák.

² Múk Farisayo bahh'alé eeharuuse kari báy, «Adór ta tlehhita' baré i hariindaaká deelór Sabaátoro?»

³ Yesu giri báy, «Aga soomusi'iikáhe adoodá' Daudi aa tleéhh qoomár iwa qwariít? Inós nee mukdá' ti al koomá',

⁴ tana dáh baraá Doó Mungú. Inós mikaáteedá' taa qaás as Mungú gari /aáy, gari haniís dír mukdá' nee inós ti koomá', tidá' dir'ine hariimaaká ngiwa /ayiya', aqo har kaahamuusér Mungú kilós gan /ák.»

⁵ Giri báy, «Garmoó Hee an Aakoó deelór Sabaáto sleeme.»

Yesu heé aa dawa sol'oot nguwa hungu/uús

⁶ Deelór hatlá' ar Sabaátoro Yesu ina dáh baraá doó saaliingw, iri intsaahhatimís. Heeko dakós oo doó /iyáy aa sol'oot i baraadií dirii'.

⁷ Intsaahhatuusér hara'ayár Mose nee múk Farisayo kuri gigidín kuwa ari, áx gu hungu/uúsi deelór Sabaátoro, asma loohír kur sakwasleemuuti kawa slay.

⁸ Ala Yesu tidá' ta baraá muner'ín i axweesi gari tsaáhh, heedaádá' dakós aa sol'oot guri báy, «Tláw, baraá tla/aangw i sihhiiteek.» Heedaádá' iri tláy iri didaádií sihhiít.

⁹ Yesu giri báy, «Án kuungá' nu yaahaás, xáy, i hariínda deelór Sabaátoro gár hhoo' tleehhamooro laqaá gár tlaakw. Hee kuwa hungu/uusi laqaá kuwa gaasi?»

¹⁰ Múk didaádií dirií' sleémeero guri ilií duxún, heedaádá' guri báy, «Dakók gan'aaseek.» Dakós guri gan'aás, iri hunguú/.

¹¹ Inooín tari buúhh, tiri i axweesiyé' daanduú Yesuwo as adór ku laqi kawa slay.

Yesu ya/abuusér mibaá nee tsár ngiwa tsawaár

¹² Qoomaadae Yesu iri gawaá tloomár i tláy as iwa firór ay. Looa gari gawaadá' wa tleés, iwa Munguú firiirin.

¹³ Looa niwa tleér, eeharuuseerós gari ateét. Eeharuusér mibaá nee tsár gari baraaín wa tsawaár, kudá' aa báy ya/abuuse. Inooín a kuká':

¹⁴ Simon, kudá' aa umuú hatlá' i tsaát aa báy Petro, nee hhiyaawós Andrea, nee Yakobo nee Yohane, nee Filipo nee Bartolomayo,

¹⁵ nee Matayo nee Tomas, nee Yakobó Alfayo nee Simonudá' yaamuuwós aleeslaáqw, dír múk Romár wa ale, kudá' yaamuuín gi sa waawuti'ii'iím.

¹⁶ Nee Yuda oo Yakobo nee Yuda Iskarioti kudá' Yesu gwaa sakii/.

Intsaahhatimisuú Yesu nee muu nguwa hungu/uumiís

¹⁷ Yesu nee inooín tindiri gawaá tloomár wa aweér, iri sihhiít baraá xatsa. Eeharuuseerós ar yaariir i didá', nee boo/oó úr oo muu oo yaamaá Yudea sleémeero ngi daáhh, nee Yerusalemuro nee yaamaá afaá tlawi awa Tiro nee Sidoni.

¹⁸ Kuká' nina hardihiyé' as nguwa axaasiya', nee tiqtir'ín kawa hungu/uusi. Nee kudá' neetlaame aa daawitamís giri hungu/uús.

¹⁹ Boo/aay sleémeero inós guna kwatiitár wa slaá', asma /uuruudá' hungu/uumiís oo amoorós daáhh, kudá' sleémeero gi hungu/uumiís.

Múk amohhoó' nee múk hhintleemo gawdén

²⁰ Aluuwo Yesu iri amór eeharuuseerósí qaytsiít, giri báy, «Múk amohhoó' a kuungaásaá narkuute, asma waawuti'iimár Mungú a toohúng.

²¹ Múk amohhoó' a kuungaásíng qwariitá' hamí, asma a axá'. Múk amohhoó' a kuungaásíng /aa/amiimá' hamí, asma a qaseendá'.

²² «Múk amohhoó' a kuungaásíng muu burna aáhh, nee burtunda baynitís dir'ine, tunduwa niqin, nee kuungá' burtunda sií' adór gár tlaákw wa ale asma Garmoó Hee.

²³ Qwalaala/é' baalaadae, ta ni/iindá', asma ga/aawaagáy, gawaá dooriiwo kuungá' qeemuú úr u sleerá'. Asma adoosíng muu ni kuungií tlehhiiti, an adoodá' aáng baabi'ii'ín naa tlehhiitiyé' dír aaruuse.

²⁴ Ala kuungaásingaá daqaare, a tsaxwaahuúng, asma qwal/uuhúng sleémeero ugwa hhe'esé' sleemuuwo.

²⁵ Kuungaásingaá aaxá' hamí, a tsaxwaahúng, asma kuungá' a qwaritá'. Kuungaásingá' awa qaseseemá' hamí, a tsaxwaahúng, asma kuungá' a tsuunqumisá' tay /aa/amiindá'.

²⁶ «Kuungá' muu sleémeero burna xirfayeemiís, a tsaxwaahúng, asma baabi'ii'ín aáng adoosíng ngina tleehhiyé' dír aaruusér lama.»

Wakuuse kawa sla'a'

²⁷ «Ala kuungaásingá' anií axamiisá', án a kah, Wakuuserhúng sla'aak, kudá' nu ahhiitá' hhooeemií tlehhiitaak,

²⁸ kudá' kuungá' lu'umisá' hhooeemií tlehhiitaak, kudá' kuungá' nu slahh'eemisá' aleefiriiriimaak.

²⁹ Bar hee tlaaqarmoowók gwaa slaáhh, tlaaqarmoó tsár warqeeseek sleeme. Bar hee inqwaarirók nga hayóh, tam shaáti sleeme ka hanís.

³⁰ Umuúqo heé firiiriím qaweek, heé muruuwók gu hayohahiím mu iinuusaar nguwa bui.

³¹ Adoodá' kuungá' ta sla'a' muu ni kuungií tleehhi, kuungá' adoodá' tleehhaak sleeme dir'ine.

³² «Asma múk ta sla'a' bar kudá' kuungá' nu slaá', gár hhoo' ar taa laqaandé' a umós? Asma tam múk tlakuuse mukdá' inooín gi slaá', ngu slaiyá'.

³³ Kuungá' bar hhooeema iga tlehhé' dír mukdá' kuungá' wa hhó', gár hhoo' ar taa laqaandé' a umós? Asma tam tlakuuse adoosíng ga tlehhaahhít.

³⁴ Múk kirkimeero ta ya/a/aanda', bar kudá' ta gaárií daamaaraanda', gár hhoo' ar taa laqaandé' a umós? Asma tam tlakuuse i tlakuusér kirkít, as aluuwo kawa ki/isi hariímadá' adoodá' wa ale.

³⁵ Ala wakuuserhúng sla'aak, hhooeemií tlehhiitaak, nee kirkime ka ya/aandá', ma ki/isárí daamaara'. Ala kuungá' qeemuú ur u sleerá', daqaní kuungá' a na/aá Kuduú Gawa. Asma inós ku hhoó' dír kudá' sluufaay wasle nee tlakuuseero.

³⁶ Gimsé', gurtleemu koomaak, adór Baabuúhúng ir gurtleemuú kon.»

Muu mu sakwasleemuutara'

³⁷ «Muu mu sakwasleemuutara', nee kuungá' tundu sakwasleemuutiiká. Muu mu tawó bareetimaara' kahhó' kuungá' tundu bareetinká. Muu gurtlatlaawaak, kuungá' tundu gurtláy.

³⁸ Muruú ta koonda'a muu qaqawaak, kuungá' tundu qáy. Qoomoó taa hatsiís, kway tiíl, kway /umamaa', iri yaamií waa/, an kudá' muu ni kuungí haniisi. Asma qoomaydá' tar qoomeemesa', an kudá' tindi kuungí qoomeesi.»

³⁹ Yesu giri slaqsaywí báy, «Heé taampa taampár hatlá' geeraharto ga aleesláya? Tsaraawo ta al baraá bohóngwí /eétiíke?

⁴⁰ Eeharusmo uraywo intsaahhatusmoowós gu ba/iiká. Ala heé intsaahhatisa gaa faak, nee intsaahhatusmoowós tawa al qon, i ya/aán.

⁴¹ «Kuúng mas suwito'ór baraá iltá heewók an ga/eér, ala waaqaasír baraá iltók a tsatsahhaandaaká?

⁴² Adór heewók kur beer, ‹Xáda, suwito'oosír baraá iltók án ngi hingeés›, bar kuúng waaqaasír baraá iltók a tsatsahhaandaaká? Kuúng a hhaahhafusmo adoosinge. Waaqaasír baraá iltók ala geerií hingeeseek, daqaní suwito'oodár baraá iltá heewók ka sangw aluú wa hingés.»

Xa'ano nee mamuuwós

⁴³ «Xa'anoó hhoó' oo mamaá tlákw laqwaliím i kaahh, laqaá xa'anoó tlaákw oo mamaá hhó' laqwaliím.

⁴⁴ Asma umuú xa'anoowo gár kur tsatsahhan a mamuuwós. Asma /aantsí ka gawaá sla/atá laqayaá koomá' wa buainká, tam mamaá sabiíbu ki gawaá xaa'aá laqayaá koomá' wa buainká.

⁴⁵ Heé hhoó' gár i axweesi a hhooeemaadá' muunaáwós ngwa hatsiisiye'. Heé tlaákw gár i axweesi a tlakweemaadá' muunaáwós ngwa hatsiisiye'. Asma afkú hee gár i axweesi a tidá' muunaáwós iwa hatsi.»

Slaqsoó maraá tsár

⁴⁶ «Aníng mihar babeera', ‹Aáko, Aáko,› ala tidá' án ni kah a tlehhita'aaká.

⁴⁷ Umuúqo heewo oo naa dir'eé' hardah, axweesante'eé' gari axaás, adoodá' i kat gari tleehh, slaqsaywós ngu dirhúng i oó'.

⁴⁸ Slaqsaywós a adór heé doó tleéhh, gway yaamií foola hhe'eés, iihafiirír do' gan tleéhh gawaá tlaa/a. Duxér ma'aay niwa wá/, ma'aay do'dá' nguna i dahiyé' ar /uuru, ala do'dá' ngwaa dingisi'iiká, asma gwaa gawdeés tleehhamooro.

⁴⁹ Ala kudá' axweesante'eé' gaa axaas, adoodá' i kat gari tleehhiiká, slaqsaywós a adór heé do' gwa tleehh gawaá hhasaangw, koo/i gaa gawdeesiiká. Ma'aay niwa amoodií wa/iyé' ar /uuru, nguri adaá dahhiyé'. Adór do'dá' ira huú' ka ló'wa tlaakw.»