Luka 5 - Biblía Axweesantá Hhohho' ar Mungú 2004

Yesu eeharuuseerós ar geera ngiwa ateét

¹ Qoomár Yesu iwa sihhiit afaá tlawtá Genesareti kuna tliíq nee múk yaariír oo axweesantá Mungú ngaa axamisuú ay.

² Yesu miringér tsár gana afaá tláwtí ár. Ala múk siyoó ohiím aa ti'iít baraadae, ta baratsufay'ín hamtliit.

³ Yesu iri baraá miringamoó Simoní dáh, guri firín nguwa surkusi gár niinawe afaá tlawto. Iri gawaadií iwiít, boo/oó muu guri intsaahhatimís.

⁴ Yesu axweesanto iwa hhe'eés, Simon guri báy, «Miringamo surkuseek baraá tla/ángw tlawi, baratsufayhúng /aytisaak baraá ma'aay, siyó ku oohiindá'.»

⁵ Simon iri oó', «Aáko, gadiyér ur tina ló'wa slaaqatís xweeraawo, ala gár taa slawaán i káhh. Ala as adoosíng taa oi baratsufaay u /aytiís.»

⁶ Naxés adoodá' kawa tleéhh, siyoó yaariír kuri sláy. Baratsufay'ín iri lak tsatimiít.

⁷ Mukdá' nee inooín algadiyuusá' oo baraá miringamoó hatlá', kuri kuútl ar daba', as kiwa alee/iisár ay. Tindiri hardáh, miringe tsaraawo kari hatsiís, iri lak /ee/etiín baraá ma'aay.

⁸ Simon Petro adoodá' ngiwa ár, iri tumbarara'aát dír ya'aá Yesu, iri oó', «Aáko, dir'eene quútl, asma aníng a heé tlakusmo.»

⁹ Asma Simoni nee mukdá' sleémeero ti alkoomá' tana ló'wa waa/oó/ as siyoódá' yaariír taa sláy.

¹⁰ Yakobo nee Yohane sleeme, daaqoó Sebedayo, kudá' nee Simon algadiyuusá', adoodá' kari waa/oó/. Yesu Simon guri báy, «Ma da'ayumitaar, iimír hamí kuúng daxta a heé múk huuwahuúw amor'eé' alé.»

¹¹ Miringer'ín kawa dír afaá ma'áy duúx, umuúqo gaaro kay didií geexáy, inooín Yesu kway eehár.

Yesu heé tiqtír tsatmit nguwa hungu/uús

¹² Yesu iwa baraá gixsár wák i dirii'i baraá gixsaduudae, heé tiqtír tsatmit i deer baraadae. Inós Yesu nguwa ár, iri dirós i tumbarara'aát, guri firín iri oó', «Aáko, kuúng bar slá', i aleesleér iwa hheehhe'es.»

¹³ Inós guri dakós i gan'aás, guri kwatiít iri oó', «Án a slaá', hhoohhoúw.» Hamtidár kilae tiqtirós tidár tsatmit iri hungú/.

¹⁴ Guri báy, «Tí ma heé bawaar, ala tláw ti laqaan dír kaahamusmoó Mungú. Ilahhooadá' Mose aa hara'ayín asma hungu/umaawók haniiseek, tí i lamabu'uungw tleehhit dir'ine.»

¹⁵ Ala kangós iri ak tsiyaayaaxaát, boo/oó muu iri burumburiít as kuwa iiárií qamin, nee tiqtir'ín kawa hungu/uumisi.

¹⁶ Ala inós siiwarkaaro in tlaatláy amór muu iwa kahhi, as iwa firór ay.

Yesu heé tiqtír sol'omit nguwa hungu/uús

¹⁷ Looarka wake iwa intsaahhatimisi, múk Farisayo nee intsaahhatuusér hara'ayár Mosewo, kudá' baraá umuúqo gixsár Galilayár dahhá' nee yaamaá Yudea nee Yerusalemuro, taa didaádií iwiít. Nee Yesu aleesleemuú Aako gu kón oo ir hungu/uumisi.

¹⁸ Naxés muu nina hardáh, ta heé tiqtír sol'omituú kón, ku loohiis ar hhafta. Geera kun dahaasár wa slaa' baraá do', as kuwa dír geeraawósí qaasi.

¹⁹ Pa/ángw kur dahaasi baraá do' iwa qwaár, asma boo/oó muu, tari tsa/án gawaá daanduú do', dír aweerisa kari tleéhh, kuri aweeriís ar hhaftuuwós dír tla/ángw i alé geeraá Yesu.

²⁰ Inós haratlintaaor'ín ngiwa ár, heedaádá' guri báy, «mulqúmo, tlakweemaawók kaa gurtláy.»

²¹ Intsaahhatuusér hara'ayár Mose nee múk Farisayowo tiri yaahamiisiyé' ta kaahi, «A heemá heewí /aymi'iiká' gi káh, awa Mungú /ooslisliingw? Heé tlakweema gurtleemuuwo gi aleesláw a heemá, a har Mungú kilosekáhe?»

²² Yesu axweesantaín gari tsaáhh, giri báy, «Gár ta baraá munerhúngií aldakuta' a milá?

²³ Gár ák inslaahh ooaro a gaalá, tawa oói, ‹Tlakweemaawók kaa gurtláy,› laqaá, ‹Sihhiít, hi'iimiít›?

²⁴ Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Heedaáduú tiqtír sol'omit guri báy, «Án kuúng un baw, sihhiít, hhaftuuwók gagaareek, waátl amór do'ók.»

²⁵ Hamtidár kilae iri geeraaín wa sihhiít. Hhaftuuwós guri gagaár, iri waátl amór do'ós, i hara Munguú xirfayeemiis.

²⁶ Sleémeero tari waa/oó/, Mungú kuri xirfayeemiís, tari da'ayuút ta kaahi, «Laarí muruú waa/oo/amo ugwa araán.»

Yesu Laáwi nguwa ateét

²⁷ Aluuwo Yesu iri ti'iít, ohomusmoó koódi guri ár, umuuwós a Laáwi, i baraá doó ohmér koódírí dirii', guri báy, «Aníng eeharáng.»

²⁸ Umuúqo gaaro gay geexáy, iri tláy, guri eehár.

²⁹ Laáwi muruú /aymár yaariír guri tleéhh dír do'ose as Yesu. Boo/oó úr oo ohomuusér koódi nee múk hatlá' oo nee inooín taa al/ayin i deer.

³⁰ Naxés múk Farisayo nee intsaahhatuuser'ín ar hara'ayár Mosewo eeharuusér Yesu kari i qununuú/, ta kaahi, «Mas al/ayiindá' nee mas alwahaanda' nee ohomuusér koódi nee tlakuuseero?»

³¹ Yesu giri báy, «Múk slaqoohhó' qwaslaarmo gu leelehhitiiká, ala aqo har múk tiíq.

³² Aníng naa hardihiiká as múk hota ganaá' ateetiim, ala nina hardáh as tlakuuse iwa hhu'u'uun.»

Yaahasa daanduú gwaawito

³³ Mukko Yesu guri báy, «Eeharuusér Yohane nee ar múk Farisayowo in gwaawaawiín nee in firaariín daqtá yaariire, ala eeharuuseerók i /ayiín nee i wahaán.»

³⁴ Ala Yesu giri báy, «War/aá heé duuxuuxuúm kiwa /aymár /ita' i aleesleerá'a, qoomaadá' nee heedá' duuxuuxuúm tawa dinkwárií dirii'i?

³⁵ Ala deelo i hardát ar heedaádá' duuxuuxuúm kuwa hingeesi. Daqadá' an qoomár inooín tawa sangw gwaawin.»

³⁶ Giri slaqsaywí báy sleeme, «Hee i kaahh oo warqamo gu tsaát gawaá inqwaarír /abén wa ale, guri waraaq ar inqwaarír aa gwa'. Adoorí birnga tleéhh, inqwaaridá' /aben gaa tawó tsaát, slám warqamoodá' /abén nee inqwaaridá' aa gwa' ti oohiaaká.

³⁷ Tam hee i kaahh oo difaáír /aben ga qamaamiím baraá tlakwa'aá qaren awa kaahari. Birnga qaás, difaáidá' /aben tlakwi'iidá' gi tsú/, difaái iri ku'út, tlakwi'iidá' niri hhitituutiyá'.

³⁸ Ala difaáír /aben dír ki qamaamin a baraá tlakwa'aá /aben awa kaahari.

³⁹ Hee i kaahh oo difaáír a hamat ga wáh iri ar /abén ilatleeruus, asma i kaahi, ‹Tidá' aa hamat an tidá' ak tsuu'.› »