Luka 3 - Biblía Axweesantá Hhohho' ar Mungú 2004

Alki/ituú Yohanedá' Baatimaamiís

¹ Kurkú mibaá nee kooán iimír Tiberio tawa waawutmoó múk Roma, qoomár Pontio Pilato tawa ga/aawusmoó yaamaá Yudea, Herode tawa geeraharusmoó yaamaá Galilaya, hhiyaawós Filipo tawa geeraharusmoó yaamaá Iturea nee yaamaá Trakoniti, qoomár Lisania tawa Geeraharusmoó yaamaá Abilene,

² qoomár kaahamuusér uren ar Mungú tawa Anasi nee Kayafa, Yohane, garmoó Sakaria, iwa baraá darmií dirii'i axweesantá Mungú gana axaás.

³ Baraá yaamu sleémeero awa inslaawoó Yordani gina wa hi'iimiít, iri alki/iít iwa kaahi, «Hhu'u'uumé' tundu baatimiisi, as Mungú tlakweemaahúng ngiwa gurtlay.»

⁴ Adoodá' kara gooín baraá kitaábuú axweesantá aarusmo Isayuwo, «Afór hee iiárií qaasaak ar tseeamiim baraá darmuú wa ale, ar kah, ‹Loohír Aako amohhe'eesaak nee waarahmaawós gan'aasaak.

⁵ Umuúqo wa/eeriwo kin tiip, nee umuúqo tloomaro nee gongoamawo kin alqoomees, luhaá gana'a'aaká kin gan'aas, luhaá guhhér koomá' kin natsatsa'aas.

⁶ Nee umuúqo muko ba/amár Mungú kan ar.› »

⁷ Múk yaariír iri hardáh dír Yohane, as kuwa baatimiisi, giri báy, «Kuungá' xwaylár dáyshe, heé kuungá' naa gurbuu' sakwasleemár hi'iit kawa ilagogoba'?

⁸ Tlehhma'aá hhu'u'ungwhúng ngu laqaqamá' na tleehhaak. Slám ma baraá munerhúng i kaahara', ‹Abrahamu a baabuúrén.› Án a kah, Mungú ga aleesláy tlaa/eeká' ngiwa na/aá Abrahamu tleehhi.

⁹ Hám tsawo kaa qaroó qaás baraá gam'ér xaai. Gawaá adoorihe umuúqo xa'anoó mamaá hho' gi laqwalimaaká ku tsaat kway kwaahh baraá asla.»

¹⁰ Yohane kuri yaahaás nee boo/oó muu, ta kaahi, «Adór ta laqaan a adoomá ala?»

¹¹ Giri báy, «Heé tlabaá tsár gi koóm, kudá' tlawuú koomaaká ngu qay, nee heé muruú /aymár koóm sleeme kudá' gu koomaaká ngu qay.»

¹² Ohomuusér koódi sleeme nina hardát as kawa baatimiisi, kuri yaahaás, «Intsaahhatusámo, atén adór ta laqaan?»

¹³ Giri báy, «Gár hee ma hara/untsimaara', aqo har hariímadá' tinda hara'ayín kilós.»

¹⁴ Askaári sleeme guri yaahás, iri ó', «Atén sleeme, adór ta laqaan?» Giri báy, «Hee mu hara/untsimaara', laqaá mu sakwasleemuutara' ar lama. Bu'utuuhúng ar bu'uutaak.»

¹⁵ As adoodá' muu kangwdá' hardáh nguwa daamaaran ar haraxu'uti, sleémeero niri baraá muner'ínií axweesiyé' tawa kaahi, ‹Doóqa Yohanewí an Kristo.›

¹⁶ Yohane giri mu/aywaáts sleémeero giri báy, «A ló', án gár nir baatimiis a ma'aay, ala heé /uuruuwo aní baá/ ni hi'iit. Án a hariimaaká sleeme tam him'ér ya/ataawós ngiwa gweer. Inós nun baatimiis ar Qeeruú hhoohhoó' oo Mungú nee asla.

¹⁷ Iimpeerós ar haritleemis ga kón, nee dirós tidár haritleemis ga fiitsa hhe'ees, nee balaangw guri baraá kuntír i qaas, ala mundáy gun daa/ ar asltá baloó gwaa'aaká.»

¹⁸ Gawaá adoorihe ar gurbu'úngw yaariír oo hatlae Yohane Ya/abtór hho' gari alki/iít dír muu.

¹⁹ Ala geeraharusmo Herode Herodia gana duúx. Herodia a harér hhiyaawós. Yohane Herode guna iigahhaát as tlakweemaadá' nee tlakweemaá hatlá' sleeme awa aa tlehhiít.

²⁰ Yohane kuri tseék nee Herode as iigahhaatadá'. Gawaá adoorihe Herode tlakweemaawós gina doók.

Yesu kuwa baatiís

²¹ Qoomár muu sleémeero baatisaro kuwa hhe'eés nee Yesuwo, Yesu iwa firiirin, doori niri gweeritiyé',

²² Qeeruú hhoohhoó' oo Mungú nay aweér gawaawós i alé ar slaqsoó slaqwa adór hhooki, afo nay gawaá doorí wa ilawáts, i kat, «Kuúng a Garmaaeé', sla'aarusmooeé' aníng iga ló'wa qwal/atís.»

Xwaylitér Yesu

²³ Yesu qoomaadae kureeriiwós a afi qoomár mibeeraá tám gadiyeérós ngiwa iimu/ún. Inós a garmoó Yosefu, adoodá' muu ngira xuú'. Xwayliteérós adór tira harahát a adoorí: Yosefu, garmoó Eli,

²⁴ garmoó Matati, garmoó Laáwi, garmoó Melki, garmoó Yanai, garmoó Yosefu,

²⁵ garmoó Matatia, garmoó Amosi, garmoó Nahumu, garmoó Hesli, garmoó Nagai,

²⁶ garmoó Ma'ati, garmoó Matatia, garmoó Semei, garmoó Yoseki, garmoó Yoda,

²⁷ garmoó Yohanani, garmoó Resa, garmoó Serubabeli, garmoó Shealtieli, garmoó Neri,

²⁸ garmoó Melki, garmoó Adi, garmoó Kosamu, garmoó Elmadamu, garmoó Eri,

²⁹ garmoó Yoshua, garmoó Elieseri, garmoó Yorimu, garmoó Matati, garmoó Laáwi,

³⁰ garmoó Simeon, garmoó Yuda, garmoó Yosefu, garmoó Yonamu, garmoó Eliakimu,

³¹ garmoó Melea, garmoó Mena, garmoó Matata, garmoó Natani, garmoó Daudi,

³² garmoó Yese, garmoó Obedi, garmoó Boasi, garmoó Salmon, garmoó Nashoni,

³³ garmoó Aminadabu, garmoó Admini, garmoó Arni, garmoó Hesroni, garmoó Peresi, garmoó Yuda,

³⁴ garmoó Yakobo, garmoó Isaka, garmoó Abrahamu, garmoó Tera, garmoó Nahori,

³⁵ garmoó Serugi, garmoó Reu, garmoó Pelegi, garmoó Eberi, garmoó Shela,

³⁶ garmoó Kenani, garmoó Arfaksadi, garmoó Shemu, garmoó Noa, garmoó Lameki,

³⁷ garmoó Metusela, garmoó Enoki, garmoó Yaredi, garmoó Mahalaleli, garmoó Kenani,

³⁸ garmoó Enoshi, garmoó Seti, garmoó Adam, garmoó Mungú.