Luka 23 - Biblía Axweesantá Hhohho' ar Mungú 2004

Yesu kuwa huúw dír geeraá Pilato

¹ Boo/aay sleémeero iri sihhiít, Yesu kuri huúw ay dír Pilato.

² Kuri sakwasleemuút ta kaahi, «Heewí una araán iwa xooroorén sageqwaaremisi, asma i múk ila/án oo koódír hanmiís dír waawutmoó múk Roma, slám i kaahi, ‹Aníng a Kristo, waawutmo.› »

³ Aluuwo Pilato guri yaahaás, «Kuúng an waawutmoó múk Yahudíro?» Yesu iri oó', «A adoosíng kuúng ta kat.»

⁴ Aluuwo Pilato kaahamuusér uren ar Mungú nee boo/aay giri báy, «Aníng gár heewí ngus sakwasleemuut a ara'araaká.»

⁵ Inooín tari ló'wa buúhh axweesanto, ta kaahi, «Inós i tlaahhír qamín dír muko ar intsaahhatimisuuwós, iimír Galilaya ay Yudea sleémeero tam ay amoorí.»

Yesu kuwa huúw geeraá Herode

⁶ Pilato adoodá' ngiwa axaás iri oó', «Heewí a heé yaamaá Galilayáro?»

⁷ Nee ngiwa tsaáhh adór amór i dahhi tar amór yaamaá waawuti'iimár Herode, guri waarahhaás amór Herode. Asma Herode sleeme deeloodae i baraá Yerusalemúr i dirii'.

⁸ Qoomár Herode Yesu nguwa ár, iri ló'wa qwalaá/, asma guna artá wa slaá' iimír deelór yaariire, asma kángw yaariír gwa axamaamiís daanduú Yesuwo. Nee tlehhmuú waa/oo/amo oo Yesu i tleehhi guna haraxuú'.

⁹ Herode yaahamisuú yaariír guri yaahamiís, ala Yesu gár aa oó' i káhh.

¹⁰ Kaahamuusér uren ar Mungú nee intsaahhatuusér hara'ayár Mose tari sihhiít, kuri sakwasleemuút ar /ayma'aá xaraaslá'.

¹¹ Herode nee askaárirós Yesu kuri waaqaqaá' kuri niqimís. Kuri inqwaarír hhoohhoó' i tsiitiís, kuri ki/ís amór Pilato.

¹² Nee iimír baldá' Herode nee Pilato tari mulqe, asma inooín geeraawo a múk ta wakawaak.

Kwasleemár Yesu kuwa gaasi

¹³ Pilato kaahamuusér uren ar Mungú nee geeraharuuseero nee muko giri burumbuúr,

¹⁴ giri báy, «Heewí nguna dir'eéní hubé' as iwa múk sageqwaaremisi. Aníng una yaahamiís dír geeraahúng wa ale, ala án dakuúsár ni ara'ar baraá muruuwí kuwa sakwasleemuta' i káhh.

¹⁵ Tam Herode sleeme dakuúsár aa ár i káhh, asma ngwa ki/ís amor'eéní ale. Looeemaawo gár gwa'arár wa hariim ar aa tleéhh i káhh.

¹⁶ Gawaá adoorihe án u muúx, ngway gweér.» [

¹⁷ Pilato adoorí gana oó', asma inós gár kuwa hariím deelór ur ar Pasaákuwo, a heé wák gun gweer oo taa tseék.]

¹⁸ Sleémeero tari tseeamín tari káh, «Heewí hingeeseek, nee Baraba na gweerang.»

¹⁹ Baraba a heé serikaáli gaa sii', nee tam tlaahhi gari qaás baraá gixsár wa aleeró, nee muu guri tsuú/. Gawaá adoorihe inós kuri tseék.

²⁰ Pilato iri malé ilawaáts dír múk i alé, asma iwa Yésú gweerár wa slai.

²¹ Ala muu iri tsimahhuús tari káh, «Kikiieek! Kikiieek!»

²² Pilato giri i axweés malé alé sagaáwa tame, iri oó', «Asma milá? Heewí tlakweemaá aa tleéhh a milá? Aníng gár gwa'arár wa hariim aga ariiká gawaá heewihe. Gawaá adoorihe aníng muxtaaro bura hhe'eés, u gweér.»

²³ Ala tana tseeamín ar afór ló'wa ur ta kaahi, «Kikiieek!» Afor'ín tidá' iri baaliín.

²⁴ Pilato Yesu guri sakwasleemuút ar adoodá' inooín ta slai.

²⁵ Kudá' ta slai guri dir'íní gweér, kudá' taa tseék as tlaahhi nee tsu/uta. Ala Yesu guri dir'íní haniís as adoodá' kur slai kawa tleehhi.

Yesu kuwa kikií' gawaá msalaába

²⁶ Yesu kurir tláy, heeko ta bay Simon nee inooín tiri doogiyé'. Inós a heé yaamaá Kirene. Inós i aykú daahh, i baraá gixsár káy. Kuri óh, kuri msalaábár i tsa/aás as ngiwa gagaari alaá Yésú wa ale.

²⁷ Boo/oó úr oo muu guri aluú wa eehár. Baraá tla/angw'ine /ameenarka i deer ar de/eewer'ín pupuxuumiis nee inós gu al/aa/amiim.

²⁸ Yesu /ameenadá' gari i warqáy gari báy, «Aá /ameenár Yerusalému, aníng mi al/aa/amiimara'. Ala kuungá' kiloohúng ti al/aa/amiinde', nee na/iihúng.

²⁹ Asma deelo i hardát ar tawa ooi, ‹Múk amohhoó' a /ameenadár kaamper, tidá' aa laqwaliká, nee ar aa du'umisiká.›

³⁰ Nee qoomaadae muu tlom'i gi bay, ‹Atén ti i hue',› nee dindirma' kay bay, ‹Atén ti tuntuke'.›

³¹ Asma bar muruuwí kuna tleéhh dír xa'anoó naá/ i alé, xáy, dír xa'anoó kaahaare gár ta may?»

³² Yesu nee múk hatlá' tsár oo tlakuuse kiri alhuúw, as kiwa kiki'in.

³³ Nee tawa hardáh dirka ta babay «Fartá saga», Yesu nee mukduú tlakuuse kiri alkiki'ín, oo wák dákw doó /iyáy oo Yesu nee kuqá' dákw doó basáy.

³⁴ Yesu iri oó', «Baabá, inooín gurtlaweek, asma ar i tlehhiitiya' ngi xuiaaká.» Tlabaawós kiri kilooín qasmiís ar loohír tsawdo.

³⁵ Nee muu i didá' wa sihhimiit as tidá' tleehharuumiit ngiwa ga/ay. Mukdá' urén Yesu guri niqimís ta kaahi, «Muu guna ba/amiimís, inós ti kilós ba/amisi, inós bar Krístó Munguhe, kudá' taa tsawaár nee Mungú.»

³⁶ Askaári sleeme guna niqimís, guri harasáp, guri ma'aá qarqaár i hanís, awa taa tsoó/ gawaá mamaá sabiíbuú wa ale.

³⁷ Kuri babáy, «Kuúng barnaxes a waawutmoó múk Yahudiro, ti ba/amis kilók alé.»

³⁸ Nee gawaá msalaábarose /aymi'iiká' kina gawaadií gooín, «Heewí a waawutmoó múk Yahudi.»

³⁹ Nee oo wák baraá tlakuuseedae Yesu gway /ooslín, iri káh, «Kuúng a Kristówoóke? Ti kilók ba/amis, nee atene!»

⁴⁰ Ala heedaáduú tsár nee inós taa alkikií' guri iigahhaát iri oó', «Kuúng tam Mungú u ilaiwawa/akáhe? Slám kuúnguú kilá' a baraá sakwasleemadár kilá' i dirí'.

⁴¹ Asma sakwasleemarí atene a hariima. Asma tí taa slawaán a tidá' atén wa hariim asma tlehhemi'iirén. Ala kwí gár tlaakw aa tleéhh i káhh.»

⁴² Tí ooaro ngiwa hhe'eés, iri oó', «Yésu, án inslawáng qoomár bara dát baraá waawuti'iimarók.»

⁴³ Yesu iri oó', «Án a kah, laarír kilá' án nee kuúng a al dinkwa didár amohhooaro.»

Gwa'arár Yesu

⁴⁴ Qoomár looár lahhoó' iwa xeér, yaamu sleémeero niri giwiyé' ay looár gwaleél.

⁴⁵ Tsee/amá gwa/aateema giri máy. Inqwaarír baraá Doó Mungú, ar do' gwa qasis, iri tla/a feehhít.

⁴⁶ Yesu iri tseé' ar afór ur, iri oó', «Baabá, qeeruueé' ngu dabaawók i qaás.» /Aymi'iiká' ooaro ngiwa hhe'eés, iri tsatiít.

⁴⁷ Nee geeraharusmoó askaári adoodá' ngiwa ár, Mungú guri xirfayeemiís iri oó', «Ar ló', heewí i dakuúsár konká.»

⁴⁸ Múk yaariír aa didí burumburiít as tidá' tleehharuumiit kawa ga/ay. Nee tidá' aa tleehharut kawa ár, tari waátl, ta hara da/ewer'ín pupuxuumiis as gurhaami.

⁴⁹ /Ameenadá' nee inós ti alkoomá' iimír Galilayár wa ale, nee kudá' sleémeero nee inós ti xuá', ta sihhimiit amorqá' saáw wa ale, muruuwí sleémeero kuri ga/áy.

Foolár Yesu

⁵⁰ Nee heeko wák i deer, umuuwós a Yosefu. Inós a heé hota ganaá'. Inós a heé wák oo doó kwasleema,

⁵¹ ala axweesanay'ín kudá' taa tsaát nee tlehhemuuín gwaa ya/aniká. Inós a heé yaamaá Arimataya, gixsár wák ar múk Yahudi. Nee inós waawuti'iimár Mungú gan daamaarán.

⁵² Heewí ina daqáy dír Pilato as slaqwtá Yesu ngiwa slay.

⁵³ Slaqwtadá' gari aweeriís, gari untsuús ar inqwaarír ta kitánír tleéhh, gari qaás baraá baa'ár taa baraá tlaa/ár i foól, ar taa baloó tuuaár i qaasiiká.

⁵⁴ Baalaadá' a deelór tiwa amohhe'eemisiya', asma looaytleérós a deelór Sabaáto.

⁵⁵ /Ameenadá' nee Yesu ti al koomá' iimír Galilayár wa aleeró, tari eeharín, /aanta kari ár, nee adór slaqwtá Yesu kara qaás baraá /aantár i alé.

⁵⁶ Tari waátl, mooyaangw kuri amohhe'eés nee di/i. Nee bál deelór Sabaátoro tari hungu/uús, ar adoodá' kara hara'ayín.