Luka 22 - Biblía Axweesantá Hhohho' ar Mungú 2004

Ta loohír leelehhiit ar Yesu kur oohi

¹ Deelór ur, tidár Mikátér taa sluuftisiiká, tidá' ta babay Pasaáka, niri naká/.

² Kaahamuusér uren ar Mungú nee intsaahhatuusér hara'ayár Mosewo pa/aangw kuna leelehhiít oo Yesu kur gaasi, asma muu kuna da'ayumiít.

Yuda iwa ya/án Yesu nguwa saki/i

³ Neetlaangw Yudadá' ta babay Iskarioti guri áy. Nee inós a eeharusmoó wák baraá eeharuuseedár mibaá nee tsare.

⁴ Inós iri tláy dír kaahamuusér uren ar Mungú nee geeraharuusér askaári, tari al axweés adór Yesu ngur dabaaín i qaasi.

⁵ Inooín tari qwalaá/, tari oó', «Bar adoosíng ngaa tléhh, atén peésa ngi haniisaán.»

⁶ Inós iri ya/án, pa/aangw guri leelehhiít oo Yesu ngur gawaá dabaaíní qaasi, qoomár muu iwa kahhi.

Yesu muruú /aymár Pasaáku amohhe'eemiis

⁷ Deeloodá' ur ar Mikaátér taa sluuftisiiká niri hardát, an deeloodá' hariim, ar deelmoó bee/i oo Pasaáka kuwa gaasi.

⁸ Yesu Petro nee Yohane giri ya/aáw giri báy, «Tlawsé', muruú /aymár Pasaáka amohhe'eesaak as kuwa /ayaan.»

⁹ Inooín tari oó', «Dír kuúng ta sla' ar kuwa amohhe'eesaan a diimá?»

¹⁰ Yesu giri báy, «Ga/aawaak, bara daté' baraá gixsárí, nee hhawaatuuko tiqo dogá' oo sirwír ma'aá koóm. Nee inós ku eehadá' nee ta hardatá' dír do'daádá' inós i kay.

¹¹ Heé do' loó' ku beera', Intsaahhatusmo i kaahi, ‹Doó dahaaye gaálaay oo aníng nee eeharuuser'eé' muruú /aymár Pasaáka nguwa /ayaan?›

¹² Inós qoroofár ur ngi kuungií laqán ar taa amohhe'eés. Muruú /aymár Pasaáka gawaadá' tiwa amohhe'ese'.»

¹³ Tari tláy umuú gaaro kari ár ar adoodá' inós ngira oó'. Muruú /aymár Pasaáka kuri gawaadá' wa amohhe'eés.

Muruú /aymár Aako

¹⁴ Tam siiwadár muruú /ayma iwa xeér, Yesu iri iwiít dír muruú /ayma dinkwa nee ya/abuuseerós.

¹⁵ Giri báy, «Aga kángw kilá' wa slaá' muruú /aymaarír Pasaáka nguwa al/ayaan dinkwa nee kuungá', dír slahh'emisuueé' nira xayká.

¹⁶ Án a kah, u baloó /ayaaká ay dír i boo/i baraá waawuti'iimár Munguhe.»

¹⁷ Xooslmoó wahaangw nguwa óh, iri sluufiís iri oó', «Oohaak, kiloohúng qasmiisaak.

¹⁸ Asma án a kah, iimír hamí ma'aá mamaá sabiíbu i baloó wahaaká ay dír waawuti'iimár Mungú ni hardat.»

¹⁹ Aluuwo mukatmo guri óh, iri sluufiís, guri parhhamiís, guri dir'ín i haniís iri oó', «Gaarí a slaqwte'eé' [ar tinda haniís as kuungá'. Adoorí tlehhiitaak as inslaslangw'eé'.»

²⁰ Alaá /aymaaro xooslmoó wahaangw guri adoodár óh sleeme, iri oó', «Gár baraá xooslmoowí a alqadór /aben tidá' Mungú aa tleéhh ar tseerer'eé', ar taa ku'uús as kuungá'].

²¹ «Ala qaytsité', dákw heedaádá' aní sakií/, i dinkwár i dirii' nee kwe'eé' diirír muruú /aymaaro.

²² Asma Garmoó Hee i gwa'arár áy, adoodá' Mungú ngira tsabín, ala heedaádá' gu sakií/, a tsaxwaawós.»

²³ Ya/abuuseedá' tiri kilooín yaahamís iwa kat, «Baraá tla/angwrene heé adoorí ga tleéhh a heemá?»

Kaangaani daanduú uraay

²⁴ Tari kilooín kaangaanuús, xáy, heé ta uráy harafadiiti a heemá.

²⁵ Yesu giri báy, «Waawituú xoordu in waawuti'ii'ín, nee kudá' aleesleemuú koomá' an kudá' ta babay gurhhouuse.

²⁶ Ala dirhunge a adoosingeeká. Ala kudá' úr baraá tla/angwhunge, masók an heé niiná dirhunge. Nee kuduú geeraharusmo, masók an sagadiyusmoohúng.

²⁷ Ala heé úr a gaalá? A kudá' aa iwiíti dír muruú /ayma, laqaá kudá' gu sageqasmiís? Ahaá, a kudá' aa iwiítiíke dír muruú /ayma? Ala án baraá tla/angwhunge a adór sagadiyusmo.

²⁸ «Ala kuungá' an kudá' aga qiqtliinde' dinkwa nee aníng baraá iiara'aduueene.

²⁹ Ala aníng waawuti'iima ngin dirhúng i haniís adoodár Baabá ngira aníng i haniís,

³⁰ as tawa /ayiinda' nee tawa wahaanda' dinkwa nee aníng baraá waawuti'iimar'eé' wa ale, nee tawa iwita' baraá kiteeriidaá aleesleemu, nee as tlahhi'iidá' mibaá nee tsár awa múk Israeli kiwa sakwasleemuta'.»

Yesu tlankuú Petro nguwa geerií oó'

³¹ Yesu iri oó', «Símon, Símon, ga/aaweek, Neetlaangw kuungá' naa slaá' nuwa haritleesi adoodár angaáno kur haritleemamisi.

³² Ala aníng kuúng ugwa aleefiriím as haratlintaaoorók makawa arbaá/. Ala kuúng qoomár bara hhu'u'uún, hhaeewók ki /uurií qás.»

³³ Petro iri oó', «Aáko, kuúng bar dinkwa nee aníng, án ti amohhoó' nee kuúng tiwa altsegiiti, laqaá tam tiwa altsu/i.»

³⁴ Yesu iri oó', «Pétro, án kuúng u baw, konkomo iwa uui laarí, án kuúng iga sa tlánk sagaáwa tám wa ale, adór ir xu'uká.»

Peésa nee tlakwaay nee paánga

³⁵ Yesu eeharuuseerós gari yaahaás, «Qoomár nuwa ya/aáw, peésár ta koonda' iwa kahh, laqaá tlakwaay, laqaá ya/ata', ala gár dirhunge aa /aaruur i deéro?» Tari oó', «I káhh.»

³⁶ Yesu giri báy, «Ala daxta heé peésa ga koóm, peésarós ngi huwi, laqaá heé tlakoó koóm, tlakwaywós ngu huwi sleeme. Nee kudá' paángár koomaaká, inqwaarirós ngi weerisi, paánga ngi tlaxwi.

³⁷ Asma án a kah, gooirí aqo in bó/ dir'eene, tidá' kah, ‹Kuna harafaár dinkwa nee tlakuuse.› Tidá' taa gooín gawaaeé' alé aa naká/ boo/eesaro.»

³⁸ Eeharuuse iri ó', «Qaytsiít, Aáko, diirihe paangadaá tsár i dayá'.» Giri báy, «A ido.»

Firór Yesu baraá Getsemane

³⁹ Iri tláy ay amór tloomár xaaiikaari ta bay seituúni, adoodá' /iisí i /imamisi. Eeharuuseerós nee inós tari alkoné'.

⁴⁰ Qoomár tawa hardáh amoodií alé, eeharuuseerós gari báy, «Fiririimé' asma iiara'at munduwa ar baá/.»

⁴¹ Inós tiri paraátl dir'ine, iri geerií hi'iít gár niinawe har qoomoó tlaa/anoó taa tsaxaár iwa hardihi, iri tumbarara'aát, iri firín, iri oó',

⁴² «Baabá, kuúng bar slá', slahh'amuuwí hingeeseek dir'eene. Ala ma tleehhaar ar adoodá' án ngir slaa', na tleehheek ar adoodá' kuúng ta sla'.» [

⁴³ Aluuwo malaykamooko wák niri gawaá doorí wa hardáh, guri /uurií qaás.

⁴⁴ Yesu iri ló'wa kumiít firooro as adoodá' muunaáwós iwa ló'wa gurhaamuuti, tam hameerós iri adór tseere tleehhít, iri yaamií taxaán.]

⁴⁵ Qoomár firooro iwa hhe'eés iri sihhiít, iri kií/ amór eeharuuseerós. Naxés inooín taa guú', as adoodá' tawa baraá gurhaamír i dirii'i.

⁴⁶ Giri báy, «Ahaá, masa gué'? Tlawé', fiririimé' asma iiara'at munduwa ar baá/.»

Yesu kuwa óh

⁴⁷ Qoomár iwa kaangwí axweesi, naxés boo/oó yaariír nina hardáh, oo tinda geerahaár nee kudá' ta bay Yuda. Inós a heé wák baraá eeharuuseedár mibaá nee tsare. Inós iri tseewúy dír Yesu as nguwa ma'aasi.

⁴⁸ Ala Yesu guri báy, «Yúda, Garmoó Hee un sakí/a ar ma'aasa?»

⁴⁹ Eeharuuseedá' nee Yesu ti koomá' adoodá' aa tleehharut kawa ár, tari oó', «I muxaána ar paánga?»

⁵⁰ Oo wák baraaine, lawaalmoó kaahamusmoó úr oo Mungú guri iiár doó /iyáy tsaát ar paánga.

⁵¹ Ala Yesu iri oó', «Mawaak, a ido.» Iiár heedaádá' gari kwatiít, guri hungu/uús.

⁵² Kaahamuusér uren ar Mungú nee geeraharuusér askaári nee bariise, kudá' ngwa i daqaye', Yesu giri báy, «Baré nina hardaté' ar paangadu nee guhhli'i adór múk fisusmoó oohár áw.

⁵³ Umuú daqto án nee kuungá' a dinkwa baraá Doó Munguhe, ala ooharo iga iiadi'iiká. Ala siiwarí a toohúng, siiwarí a siiwár /uuruú giwti.»

Petro Yesu nguwa satlaánk

⁵⁴ Yesu kuri óh, kuri huúw ay baraá doó kaahamusmoó úr oo Mungú. Petro iri eeharaarín i amorqá' saáw wa magegeamiit.

⁵⁵ Asla kari oohiís tla/ángw afeeni, tari iwiít afaá asla. Petro iri dir'ín tidií iwiít.

⁵⁶ Aluuwo sagadiyuso'orka wák Petro guri aán baraá gwa/aateemaá asltár alé, guri ilií duxuún, iri ó', «Heewí sleeme oo bartós.»

⁵⁷ Ala Petro iri tlaánk iri oó', «/Ameéni, aníng heesíng u xuaaká.»

⁵⁸ Qoomár niina iwa waaráhh, heé hatlá' Petro guri malé ár guri báy, «Kuúng sleeme a heé wák baraá tla/angw'ine.» Ala Petro iri oó', «A aningeeká gán.»

⁵⁹ Qoomár niina iwa malé waaráhh, heé hatlá' iri kumiít iwa kaahi, «A ló', heewí sleeme oo bartá Yesu, asma heewí a heé yaamaá Galilaya.»

⁶⁰ Ala Petro iri oó', «Tisíng kuúng ta kat aníng a xuaaká gán.» Qoomaadár kilá' iwa axweesanaydá' axweesi, konkomo iri adoodií uú'.

⁶¹ Aako iri warqáy, iri qaytsiít amór Petro. Petro /aymi'iidá' Aako aa oó' giri insláy kudá' nguwa báy, «Laarí konkomo iwa uui, án kuúng iga sagaáwa tám wa tlánk.»

⁶² Petro iri tsee/áy ti'iít, iri ló'wa /aa/amín.

Yesu kuwa niqimís nee kuwa muúx

⁶³ Mukdaádá' Yesu gwaa oh, Yesu kuri niqimís kuri muúx,

⁶⁴ kuri ila' tuuntukún, kuri yaahamiís kuwa babay, «Kuúngusuú aarusmo, ooang, heé kuúng ugwa slaahh a heemá?»

⁶⁵ Kuri /ooslislín ar /ayma'aá hatlá' awa yaariir.

Yesu i dír doó kwasleema

⁶⁶ Looa niwa tleér bariise nee kaahamuusér uren ar Mungú nee intsaahhatuusér hara'ayár Mose tari burumburiít, Yesu kuri huúw baraá doó kwasleemar'ín, kuri babáy,

⁶⁷ «Atén ti ádbeer, kuúng a Kristówo?» Yesu giri báy, «Barnaxes án taa ooi, kuungá' aqo baloó ya/aanda'aaká.

⁶⁸ Slám aníng burne yaahaasi, gár ni oa' i káhh.

⁶⁹ Ala iimír hamí Garmoó Hee i iwiit bihhaá doó /iyáy awa Munguú aleesleemuú koóm.»

⁷⁰ Sleémeero tari al oó', «Gawaá adoorihe kuúng a Garmoó Mungúheéke?» Giri báy, «Kuungá' kilá' an kata' adór aníng tar inós.»

⁷¹ Tari oó', «Lamabu'úngw hatlá' gár kus leelehhiitaan ala milá? Asma ataá kilá' /ayma'aá afkós dahhá' iga axaasaán.»