Luka 21 - Biblía Axweesantá Hhohho' ar Mungú 2004

Ilahhooár kwaalo'o

¹ Yesu iwa qaytsiít, daqaare gari ár iwa ilahhooar'ín qamiin baraá sandakmoó ilahhooa.

² Kwaalo'orkar narkuto'o sleeme gari ár, senti tsár ngiwa baraadí qás.

³ Iri oó', «Ar ló', án a kah, kwaalo'orqá' ar narkuto'o hariímár aa qás ka ló'wa ur mukquú hatlá' sleémeero ba/a.

⁴ Asma inooín sleémeero peésár taa qamín a tidá' aa met dír afer'ine, ala kwaalo'oorír narkuto'o tidá' sleémeero i koon gana qás.»

Yesu fee/ár Doó Mungú ngiwa geerií oó'

⁵ Muu kángw Doó Mungú guna axweés, adór kura tleéhh nee kura parootuús ar tlaa/aá hhohho', nee ar ilahhooadaádá' taa amór Mungú i hanmiís. Yesu iri oó',

⁶ «Tí sleémeero ta ga/eera', deeloorós i xeér tam tlaa/anoó gawaá kuqií meét iwa kahhi oo ta fee/iiká.»

Iimu/úngw slahh'amu

⁷ Yesu kuri yaahaás, kuri báy, «Intsaahhatusámo, muruuwí xaylá i tleehharuuti? Nee qoomár muruuwí birna tseewúy, layár kur tsaahhaan a gaalá?»

⁸ Iri oó', «Ti haramagahhe', mutunduwa al/aáy. Asma múk yaariír ni hardah tiwa umuueénár ateetin, tawa kaahi, ‹Aníng a Kristo›, nee tawa kaahi, ‹Qooma naa tseewuúr›. Ala mi eehaarara'.

⁹ Qoomár kuungá' kángw slaqwara nee gila bura axasé', ma da'ayuutara', asma tí niqo geerií hardát, ala alhhe'eesaay ni gaanslár hardihiiká.»

¹⁰ Aluuwo giri báy, «Xooro i slaqwarár eér amór xoororqá', nee waawuti'iima i slaqwarár eér amór waawuti'iimár hatlá'.

¹¹ Kunseeloó yaariír ni ti'iit baraá yaamuwo. Nee baraá yaamaá dimbadimbehe giyeé ni tleér, nee tiqtír pu/i ni hardát. Muruú dae tlaáq i tleehharuut nee tlehhema'aá waa/oo/amo, awa gawaá dooraá dahhá' i aandá'.

¹² Ala dír muruuwí sleémeero ira tleehharuutiiká, muu kuungá' nu uhín nee nu slahh'eemiis. Inooín nun huwiyá' amór maraá saaliingw, asma tunduwa sakwasleemuuti, nee tunduwa tsegiiti. Tundu geeraá waawitá i huuw, nee geeraá ga/awuuse, as aníng.

¹³ Gaarí an pa/angwhúng oo aníng ir dir'íní lamabu'uunda'.

¹⁴ Ala kuungá' baraá munerhunge gár ta oa' ma geerií amohhe'eemisaara'.›

¹⁵ Asma aníng /ayma'aá sagalooa ngi haniís, awa ta oa', tam wakuuserhúng sleémeero kuungá' tlaampa'aasaro nuy aleesleeraaká, nee sleeme axweesantahúng kay si'iiká.

¹⁶ Kuungá' tundu sakii/ nee xwaylitérhúng nee hhaeehúng, nee mar'eefoohúng, nee mulqerhúng. Kuungá' bahh'alé tundu tsuu/ nee inooín.

¹⁷ Kuungá' tundu aahh nee muu sleémeero as aníng.

¹⁸ Ala tam se'eemír wák ar gawaá sagerhúng ar tawo qwaar i káhh.

¹⁹ Kuungá' bara qiqtlatliindé', a ba/aandá'.»

Yesu fee/ár Yerusalemu ngiwa geerií oó'

²⁰ «Qoomár bar gixsár Yerusalemu aga aandé', kaa harweér nee múk slaqwara, daqaní ka tsahhá' adór deelór hhaamiisarós nira tseewuúr.

²¹ Qoomaadae múk baraá yaamaá Yudea aqo tan gawaá tlom'í ti'i'ín, nee kudá' baraá gixsár i diriiá' ta tsee/áy gowi, nee kudá' baraá qamií diriiá' matawa dáh baraá gixsa.

²² As deeloorí tawa deelór li/aay, as tidá' taa gooín sleémeero iwa bo/.

²³ /Ameenár tsiihaawe nee ar na/aá ninakw gi koom qoomaadae, a tsaxwaaín. Asma qoomaadae slahh'amuú úr i deer baraá yaamuudae, nee Mungú sakwasleemarós ga boo/ees daanduú xooroorihe.

²⁴ Inooín ki tsuu/ ar paánga, kiri lohatis baraá yaamuuine, kay huuw baraá xoordaá dimbadimbé. Gixsár Yerusalemu kay i iwiit nee xoordaá hatlá' ay dír qoomár xoordu i bo/.»

Hardahamuú Garmoó Hee

²⁵ «Qoomaadae laya kingi laqán ar gawaá tsee/amá, nee slahhaangw nee tsetse/. Nee baraá yaamuwo muu i baraá slahh'amuú yaariír i dirii', ta baraá daér yaariír i dirii', asma adoodá' tlawi iwa amoqwaqwadiin.

²⁶ Muu iri ló'wa slar/amiit daeero, tari amoqwaqwadín, as adoodá' yaamu i laqiya'. Asma qoomaadae doori i dingitiyá'.

²⁷ Aluuwo Garmoó Hee kuri ar niwa hardihi ar /uuruuwós nee xirfuú yaariír.

²⁸ Gimsé', kaangwí barnaxes naa iimu/ún, ta magahhá', ti amohhe'ese', asma qoomaadae gweermorhúng naa tseewuúr.»

Intsaahhatisár slaqsoó /aantsí

²⁹ Giri slaqsaywí báy, «Xa'anoó /aantsí ga/aawaak, nee xaa'aá hatlá' sleémeerowo.

³⁰ Xaaiiká' barnaxes loo/or'ín aa páhh nee ar /aben niri harmá/, an tsahhá' adór qoomár tluwaay niwa hardihi nira tseewuúr.

³¹ Adoorihe muruuwí sleémeero bura aandé' naxes naa iimu/ún, tsaahhaagáy adór waawuti'iimár Mungú kar tseew.

³² «Án a kah, muruuwí sleémeero i boo/ dír mukuú qartí ir kumiiti.

³³ Doori nee yaamu i waarahhiyá', ala axweesante'eé' i baloó waarahhká.»

Dala'ame

³⁴ «Ti harmagahhe', munerhúng miwa hhitirút ar hheehha, nee xufta, nee ma daawimitaara' as muruú baraakaá yaamu, deeloodár alhhe'eesaay munduwa hhaawís adór tsaaxweeli ir ohaahiin.

³⁵ Asma deeloodá' niqo hardát dír umuúqo heewo baraá yaamu sleémeerowo.

³⁶ Dalaaé', fiririimé' deelo sleémeero, as /uuru kuwa sleera', oo tí sleémeero hardah kawarar ba/a', nee tawa geeraá Garmoó Heé i sihhita'.»

³⁷ Deeloodae Yesu in intsaahhatimamis baraá Doó Mungú wa ale qoomár tlaatla/aango. Nee xweeraawo in qatuú aa'áy gawaá tloomár xaaiikaari ta bay seituúni.

³⁸ Muu sleémeero matlaatleero tan tseewa tlaatláy, as axweesantós kawa axamiisuú ay baraá Doó Mungú.