Luka 2 - Biblía Axweesantá Hhohho' ar Mungú 2004

Yesu kuwa laqwaál

¹ Qoomaadae waawutmoó múk Roma, kudá' ta bay Augusto, hara'aya gana oó' umér múk baraá yaamu sleémeero kawa gooin.

² Gooirí ar geera qoomár Kurenio tawa ga/aawusmoó yaamaá Shamu.

³ Muu sleémeero tari umer'ín gooír áy, umuúqo heewo amór gixsarós.

⁴ Yosefu sleeme iri Galilayár wa tláy, baraá gixsár Nasareti, iri tsa/án yaamaá Yudea, ay dír gixsár Daudi, ar ta bay Betilehemu, asma inós oo guruú doó Daudi.

⁵ Inós nee Maria tidá' aa lehhiít tina alkoné' as kiwa gooin, nee qoomaadae Maria a tsiiháy.

⁶ Tawa amoodií kahhi, deelór xwaylarós iri xeér,

⁷ na/oó garma guri xwayluúr oo baris. Guri tsiitís ar inqwaruú na/oó qawri. Guri qaatís baraá miringamoó gitsór hikwa ki qamaamin. Asma baraá doó dahaayeero pa/aangw kwaa slayká.

De'eemuuse nee malayke

⁸ Baraá yaamuudae de'eemuuserka i deer ar baraá tleesantá hoot, nee bee/angw'ín kun xumxaaxún xweeraawo ar baalaqaasi.

⁹ Malaykamoó Aako giri gaanslár harati'iít, xirfuú Aako gay i gwa/aát bihhe sleémeero, tari ló'wa da'ayuut.

¹⁰ Ala malaykamo giri báy, «Ma da'ayumiitaara', asma án kuungá' nuna Ya/abtór hhó' i huúw ar qwal/amaayér ur dír muu sleémeero.

¹¹ Asma laarí baraá gixsár Daudiwo ba/amusmoohúng kwaa laqwaál, inós an Krístó Aako.

¹² Layár ta aanda' a tí, ‹Na/oó qawri u didií eerá', kwaa tsiitiís ar inqwaruú na/oó qawri, kwaa qaatiís baraá miringamoó gitsór hikwa ki qamaamin.› »

¹³ Naxés siiwadár kilae daqtá yaariir ar malaykér gawaá doori ta dinkwa nee malaykamoodá', ta Munguú xirfayeemiis, ta kaahi,

¹⁴ «Munguú gawaá doorií dirií' i xirfuuti, nee wayda ni baraá yaamií hardihi dír mukdá' aa gurií baá/.»

¹⁵ Qoomár malaykeedá' iwa gawaá doorí kí/, de'eemuusér aáng tari axweés ta kaahi, «Gimsé', a tlawaán ay Betilehemu, tidá' aa tleehharut, Aako naa atén i oó' a artá awaán.»

¹⁶ Tari gaanslár tláy, Maria nee Yosefu kay didií áy, nee na/ayduú qawri kwaa qaatiís baraá miringamoó gitsór hikwa ki qamaamin.

¹⁷ Na/aydá' kuwa ár, kangwdá' kaa báy daanduú na/aywihe kuri oó'.

¹⁸ Mukdá' sleémeero aa axaas tari waa/oó/, asma tí de'eemuuse aa ó'.

¹⁹ Ala Maria tí sleémeero gari alhoorés baraá muunaáwose.

²⁰ De'eemuuseedá' iri kí/, ta hara Munguú xirfayeemiis, nee kuwa diidi'iimisi, as tidá' sleémeero taa axaás nee taa ár, adoodá' kara dir'ín i oó' nee malaykamo.

Hheehhe'eesár Yesu

²¹ Bál dakaát an hheehhe'eesár na/aay, umuuwós kuri báy Yesu, adoodá' malaykamo ngura oó' iimír kuwa tsihiiká.

Yesu kuwa baraá Doó Mungú i huúw

²² Deelór Yosefu nee Maria tiwa hheehhe'eesiya' iwa xeér tari Yerusalemúr káy as na/aay kuwa dír Aakoó i haniisi ar adoodá' hara'ayár Mose i kat.

²³ (adór kara gooín baraá hara'ayár Aakoowo, «Umuúqo na/oó garma oo baris dír aayoorose ku bay oo hhoohhoó' dír Aakoowo.»)

²⁴ Gár hatlá' sleeme a ilahhooár muruú ta tsu/i kawa haniisi, adoodá' hara'ayár Aako i kat, «Hhooka tsár laqaá na/aá tsár awa hhooka.»

²⁵ Baraadá' Yerusalemuwo heeko i deer, umuuwós a Simeon. Inós a heé hota ganaá' oo Mungú gwa haratlintii'. Gurkwa/asár múk Israeli gan daamaarán ar haraxu'uti. Inós Qeeruú hhoohhoó' oo Mungú gu kón.

²⁶ Inós kwa geerií ádbáy nee Qeeruú hhoohhoó' oo Mungú gídaabá i gwaaiiká ay dír Krístó Aako ngway ari.

²⁷ Simeon kuna geerahaár nee Qeeruú hhoohhoó' oo Mungú ay baraá Doó Mungú, qoomaarihe Yesu xwayliteérós guna húp baraá Doó Mungú as hariimadaá hara'aya kiwa boo/eesi daanduuwose,

²⁸ Simeon guri ilaóh ar dabaawós, Mungú guri xirfayeemiís iri oó',

²⁹ «Aáko, daxta sagadiyusmoowók ya/aámár gwa'ara ngi slay ar wayda adoodá' kara ó',

³⁰ asma ilaaeé' ba/amarók ngaa ariyé',

³¹ tidá' taa amohhe'és dír ilaá muu sleémeerowo,

³² tawa gwa/aateemaá gwa/aatá' dír xoorduuwo, nee tawa xirif dír mukók oo Israeli.»

³³ Baabuúwós nee aayooro tidá' ta inós i kaahi kari waa/oó/.

³⁴ Simeon giri tsuúq, Maria aayír na/aay gari báy, «Ga/aaweegáy, kwí kwa qaás asma awa yaariir niwa huuiya', nee kuqá' niwa sihhiitiya', baraá múk Israeliwo, nee iwa laya tleehhiti ar tar kaangaanuusi,

³⁵ asma inslawoó baraá munér múk yaariír iwa geehhoouy. Nee kiíng sleeme gurhaamír tlaaqaam adór tsataay muunaáwók gu slahhaés.»

³⁶ Aaruso'orkar ar /ameeni i deer, umuuwós a Anár Fanueli, ar tlahhoó Asheri. Inós a /ameenír aa ló'wa diin. Tana al hoót nee hhawaatuuwós kureeri faanqw alaá duuxoro.

³⁷ Daxta inós a kwaalo'ór kureeri mibeeri dakaát nee tsiyáhh. Baraá Doó Munguhe i ququtlaatliindaaká, aqo in sluufmaamís xweera nee tlaatla/aango, iwa gwaawiwiin nee iwa fiririin.

³⁸ Inós hamtidár kilae nina ti'ít, i Munguú sluufmís. Kángw na/aay guri ó' dír kudá' sleémeero awa harahhifor'ín ngaa qaasiye' gawaá ba/amár Yerusalemu.

Ki/imá Nasareti

³⁹ Tidá' sleémeero baraá hara'ayár Aakoowo taa oó', tlehhmuuwo kawa hhe'eés, tari kií/ Galilaya ay dír gixsar'ín ar Nasareti.

⁴⁰ Nee na/aydá' iri uráy, /uuru gway tleéhh, fuquraango i haats, nee i tsuuqaá Munguú kón.

Yesu iwa baraá Doó Mungú

⁴¹ Xwayliteérós i Yerusalémú kaakeér umuú kurko qoomár deelór ur ar Pasaákuwo.

⁴² Qoomár Yesu kureeraá mibaá nee tsár ngiwa áy, tari tsa/án Yerusalemu, adoodá' ta /iimamisi.

⁴³ Deeloodá' ur iwa waaráhh, qoomár ki/imaine, na/ay'ín Yesu iri alií meét baraá Yerusalemu. Ala xwayliteérós kaangwí gu xu'uká.

⁴⁴ Inooín geera kawa xui inooine ta al dinkwa nee Yesu baraá boo/ayduú aauuseero. Tari kumiít aaiiwo. Looa iwa dát kuri leelehhiít dír mar'eefooine nee dír múk ta xui.

⁴⁵ Kuwa slaslayká, tay kií/ Yerusalemu kuwa leelehhiiti.

⁴⁶ Alaá deelo tame kuri baraá Doó Mungú wa sláy, aa tla/ángw intsaahhatuusér i iwiít, gi iiárií qamín nee gin yaahamiis.

⁴⁷ Mukdá' sleémeero axamiís sagalooarós kari waa/oó/, nee adoodá' axweesani ngira mu/aywatsín.

⁴⁸ Qoomár xwayliteérós nguwa aán, tari waa/oó/, aayo guri beér, «Garmaaeé', mista adoorí láq? Ga/aaweegáy, aníng nee baabuúwoge kuúng una leelehhahhitaán ar gurhaami.»

⁴⁹ Gari báy, «Ahaá, mihar leelehhitá'? Aga xui'ikáhe adór gár án tiwa hariím, an baraá doó Baabuúeé' wa hoót?»

⁵⁰ Ala adoodá' ngaa báy inooín ngaa tsaahhi'iiká.

⁵¹ Tari al aweér ay Nasareti. Inós iri kumiít xwayliteérós ngiwa iialooeemiisi. Aayírós tí sleémeero gari alhoorén baraá muunaáwose.

⁵² Yesu iri kumiít iwa uraaray, sagalooarós iri doogigiín kuri gurií baá/ nee Mungú nee muko.