Luka 19 - Biblía Axweesantá Hhohho' ar Mungú 2004

Yesu nee Sakayo

¹ Yesu iwa dáh baraá gixsár Yeriko, ina waaraáhh baraá tla/angwdár alé.

² Heeko i deer baraadae, umuuwós ku bay Sakayo. Inós a heé wák oo úr baraá ohomuusér koódiro, slám a daqaarmo.

³ Heewí Yesu guna artá wa slaá' axáy a heé adoomá. Ala arto gwa aleeslayká as boo/oó muu, asma inós ku ququmamaár.

⁴ Iri geerií ta'aaín, iri tsa/án gawaá xa'anooko /aantsí, as Yesu nguwa ari, asma Yesu nin loohidár oh.

⁵ Nee Yesu didá' ngiwa áy, iri gáwtí qaytsiít, iri oó', «Sakáyo, aweeráng ar gaanslaay, asma gár án tiwa hariím laarí nin dír do'ók i hardáh.»

⁶ Sakayo iri aweér ar gaanslaay, Yesu guri dahi'ís ar qwala/.

⁷ Muu adoodá' ngiwa ár, sleémeero tari qununuú/, tari káh, «Aa dáh baraá doó heé tlakweemaá koóm.»

⁸ Sakayo iri sihhiít guri báy, «Qaytsiít Aáko, tlaqtá daqaari'iimar'eé' a haniís dír narkuute, nee gár hee ar naa hara/uuntsiím bir deer, a ki/ís sagaáwa tsiyáhh wa ale.»

⁹ Yesu iri oó', «Laarí ba/ama naa hardát baraá do'wí, asma heewí sleeme oo tlahhoó Abrahamu.

¹⁰ Asma Garmoó Hee nina hardáh tidá' aa qwat ngiwa leelehhiiti nee ngiwa ba/amisi.»

Slaqsoó bohhaá peésa

¹¹ Axweesantí axaasaro kawa hhe'eés, Yesu iri axweés ar slaqsaay, asma ina tseewúy bihhaá gixsár Yerusalemu, nee inooín geera ka xui waawuti'iimár Mungú aa naká/ iwa geehhouur ar gaanslaay.

¹² Yesu iri oó', «Heeko úr i deer oo tlahhaywós ta ilaiwawa/i. Inós ina aa'aá káy amór yaamaá saawá' as kuwa waawutmoó wa qaasi, nee niri kii/.

¹³ Qoomár iwa aa'aá kay, lawaaleerós ar mibaangw gari ateét, bohhaá mibaangw awa peésa giri dir'íní hanmiís, iri oó', ‹Bohhuusingá' ar halaanu'usaak ay dír án ni kii/.›

¹⁴ Ala múk baraá yaamuuwós heedaádá' kuna ló'wa aáhh, muu kuri ya/aáw kuwa eehari amoodá' inós i kay, nee tawa ooi, ‹Heewí u sla'aanaaká atén tiwa sawaawuti'i'in.›

¹⁵ «Alaá waawuti'iimarós ngiwa sláy, niri kií/. Hara'aya gari oó' ar lawaaleerós tidá' aa bohhií i hanmiís kawa ateeti, as slaasláwár taa sláy ngiwa xui umuúqo heewo baraá halaanu'uumarose.

¹⁶ Heé geera niri hardáh iri oó', ‹Aáko, boohharók tidá' wák naa aní hanís, bohhaá mibaangw ngaa sleér.›

¹⁷ Aako iri oó', ‹I qoón, kuúng a lawaalmoó hhoó', asma kuúng tu inkihhím baraá gár niinawe. Ala gawaá adoorihe án kuúng u waawutmoó gixsadaá mibaángw wa qaás.›

¹⁸ Heé tsár nay hardáh iri oó', ‹Aáko, boohharók tidá' wák naa aní hanís bohhaá kooán ngaa sleér.›

¹⁹ Tam inós sleeme kuna báy, ‹Aníng kuúng u waawutmoó gixsadaá kooán wa qaás.›

²⁰ «Heé hatlá' niri hardáh, iri oó', ‹Aáko, boohharók tidá' wák naa aní hanís, areeng. Aníng ana baraá warqamoó i tseék, ngay baáts.

²¹ Asma án kuúng una da'ayuút, as kuúng tawa /akusmo. Asma kuúng an leehhihhiín didaádá' gaa kay qaská, slám a bu'uún didaádá' gár taa dahás iwa kahh.›

²² Aakoodá' iri oó', ‹Kuúng a lawaalmoó tlaákw. Aníng kuúng u sakwasleemuút ar /aymi'iiwók kwisingá'. Ala kuúng bar xú' aníng a /akusmo, nee an leehhihhiím didaádá' gaa ngiwa qaasiiká, slám a bu'uúm didaádá' niwa dahaasiimiiká,

²³ ala boohhar'eé' tidá' gaálay kara gadiyus as slaasláw ngiwa sleer? As án birna kií/ ngiwa slaw dinkwa nee slaasláwarose.›

²⁴ «Waawutmoodá' mukdaádá' didá' wa sihhimiít guri báy, ‹Boohhasíng i kon hayohaak, ka hanisá' dír heeqá' bohhaá mibángw koóm.›

²⁵ Ala mukdaádá' iri oó', ‹Aáko, ahaá baré, inós bohhaá mibaangw gi kón.›

²⁶ Aakoodá' giri báy, ‹Aníng kuungá' nu baw, umuúqo heewo oo gár koóm ka haniis, nee kudá' gár koomaaká, tam tidá' i kon ka hayoh.

²⁷ Ala wakuuser'eé' tidá' diirí huwaare', tidá' aníng iga si' ngiwa sawaawuti'ii'iim. Nee ki dír geeraaeé' wa tsu/á'.› »

Yesu iwa bar/úr dáh Yerusalemu

²⁸ Yesu /aymi'iiká' ooaro ngiwa hhe'eés, iri geerií hi'iít as iwa tsa/an Yerusalemu.

²⁹ Qoomár iwa tseewúy dír gixsár Betfage nee Betania, bihhaá tloomár xaaiikaari ta bay seituúni, eeharuuseerós ar tsár gari ya/aáw,

³⁰ gana báy, «Tlawsé', baraá gixsarqá' geeraahúng i dirii'. Qoomár bar daratá', gwarendmoó daqwaay uqo aandá' kwaa tseék, oo hee aa baloó daanda i tsa/aniká. Ngu gwedá', ngu hubá'.

³¹ Ala hee burna yaahaás iwa kaahi, ‹Gwarendmo mus gweditá'?› kuungá' ta oa', ‹Aako gun slaa'.› »

³² Eeharuuseedá' taa ya/aáw iri daqeér, adoodá' Yesu aa oó' gari aán.

³³ Qoomár tawa gwarendmoó gwediiti, múk gwarendmo loó' tari oó', «Ahaá, mas gwarendmoó gweditá'?»

³⁴ Inooín tari oó', «Aako gun slaa'.»

³⁵ Gwarendmoodá' kuri huúw amór Yesu. Inqwaruuín kuri hhaáf gawaá gwarendmo, Yesu kuri tsa/aás gawaadií ale.

³⁶ Nee qoomár iwa hi'iiti, inqwaruuín kuri hhafín baraá loohi.

³⁷ Qoomár iwa tseewúy Yerusalemu, dír /etángw tloomár seituúni, boo/oó úr oo eeharuuseerós, Mungú kuri xirfayeemiís ar qwala/, nee ar afór ur, as tlehhema'aá uren awa taa ár,

³⁸ tari káh, «Waawutmo i xirfuuti, kudá' hardáh ar umuú Aako, Wayda gawaá doori nee xirif dír Mungú.»

³⁹ Múk Farisayo bahh'alé oo baraá boo/aydií dirií' tari oó', «Intsaahhatusámo, eeharuuseerók ádbaweek iwa xaslit.»

⁴⁰ Yesu giri báy, «Án a kah, inooín barta xasliít, tlaa/e i tseeiyá'.»

Yesu i /aa/amín asma Yerusalemu

⁴¹ Yesu qoomár iwa tseewúy, gixsadá' gana ár, iri /aá/ as gixsadá',

⁴² iri oó', «Geeraawo masók tam kiíng muruudá' una xú' deelór laarihe oo wayduú huúw diroge. Ala hám daxta kwaa luú/ dír ilaawoge.

⁴³ Asma deelo i hardát ar wakuuseerók iwa slúmtí tlehh, nee tiwa harweeri nee tiwa harasaapi bihhe sleémeerowo,

⁴⁴ tiri yaamií daahh, kiíng nee mukók, tam tlaa/anoó gawaá kuqí meét i kaahh oo ta fee/iiká. Asma siiwadá' Mungú iwa i hardáh aga tsahhiká.»

Yesu múk baraá Doó Mungú wa weerimiís nguwa gusiisín

⁴⁵ Yesu iri dáh baraá Doó Mungú, múk muruú weerimiís guri iimu/ún gusisiingo,

⁴⁶ guri báy, «Kaa gooín, ‹Dooeé' a doó saaliingw.› Hám daxta kuungá' ugwa mar'ír fisuuse tlehhé'.»

⁴⁷ Nee inós ina baraá Doó Mungú wa intsaahhatimís umuúqo deelooro. Ala kaahamuusér uren ar Mungú nee intsaahhatuusér hara'ayár Mose, nee múk urén oo geeraharuuse loohi kana leelehhiít ar Yesu kur gaasi.

⁴⁸ Ala gár ta tleehhi kaa slayká. Asma muu sleémeero axweesanaywós guna ló'wa slaá' axmisuwo.