Luka 18 - Biblía Axweesantá Hhohho' ar Mungú 2004

Slaqsoó kwaalo'o nee har'ohusmo

¹ Aluuwo Yesu giri slaqsaywí báy as ngiwa intsaahhatisi, asma inooín gár kiwa hariím a Mungú ngun firiiriná' daqisleém, tam matawa mune sií'.

² Iri oó', «Har'ohusmooko baraá gixsarkaaro i deer. Inós i Mungú ilaiwa/aa/atiiká, slám inós muu gu gaárí xuiiká.

³ Nee baraá gixsadae /ameenirkar kwaalo'o i deer. Inós gun i kwasleemárií aaeér, as ngiwa alee/iisi dír wakusmoowose, tidá' inós wa hariim ngiwa sleer.

⁴ Nee har'ohusmoodá' iri ala sií', aluuwo iri baraá muunaáwósí oó', ‹Aníng a Mungú ilaiwa/aa/ataaká, slám muu u gaárí xuaaká.

⁵ Ala kwaalo'oorí aníng i daawitamís. Bira adoorír kumít, aníng alhhe'eesaywo i slaaqatís daawitamisuwo, ala gár kas hhoó' aníng an alee/iís, as hariímarós ngiwa sleer.› »

⁶ Aako iri oó', «Har'ohusmoodá' gan'amuú tlehhiitaaká ugwa axasí'iíke adór aa káh.

⁷ Xáy, Mungú mukós kudá' aa tsawaár gu ak alee/iísiíke, hariímar'ín ngiwa slay, kudá' inós nguy /aa/amiimá' tlaatla/aangw nee xweeraawo? Inós i hargawdúya ngiwa alee/iisi?

⁸ Án a kah, hariímar'ín ga haniis ar gaanslaay. Tam adoorihe qoomár Garmoó Hee binda kií/, haratlintaao ga ári baraakaá yaamuwo?»

Slaqsoó heé Farisayo nee ohomusmoó koódi

⁹ Yesu slaqsaywí guri malé dir'íní oó' as mukko taa kilooín harafaar tawa múk hota ganaá', múk hatlá' sleémeero kuri waaqaqaá', giri báy,

¹⁰ «Múk tsár ina tsa/án amór Doó Mungú, ta saalíngw áy. Oo wák a heé Farisayo, nee oo tsár a ohomusmoó koódi.

¹¹ «Heé Farisayo ina sihhiít, iri adoorír firín kilós alé, ‹Mungú, án kuúng u sluufmiís, asma aníng a adór múk hatlaeeká, a adór fisuuseerooká nee adór al/aymuuseerooká nee adór fuquuseerooká, laqaá a adór ohomusmoowú koódirooká.

¹² Aníng an gwaawawiím baraá wiíkír wake sagaáwa tsár. A ilahhooár hanimaamiís baraá daqaari'iimar'eé' sleémeerowo, ar wák baraá mibaango tawa ar Mungú.›

¹³ «Ala ohomusmooduú koódi amorqá' saaw gana i sihhiít. Sleeme tam iwa gáwtí qayti gaa qiitliiká, aqo har da/ewawós gina pupuxuumiís, iri oó', ‹Mungú, án gurtlawáng! Aníng a heé tlakweemaá koóm.›

¹⁴ Án a kah, kwí iri waátl amór do'ós, kwí kilós an kudá' taa gan'amií harafaár. Asma kudá' ti kilós ureemiís, ku niinawees, nee kudá' ti kilós niinaweemiís, ku urees.»

Yesu na/ii ngiwa tsuúq

¹⁵ Na/aá ninakw kina amór Yesú ii huúw as dabaawós ngiwa gawaaínií qaasi nee ngiwa tsuuqi. Ala eeharuuse adoodá' ngiwa aán, mukdá' na/aá koóm guri iigahhát.

¹⁶ Ala Yesu giri ateét amoorós, iri oó', «Na/aá ninakw mawaagáy ni amor'eé' hardihiye', mi ila/aamara'. Asma awa adór kuká', waawuti'iimár Mungú a tooín.

¹⁷ Án a kah, heé waawuti'iimár Mungú gaa ya/aniiká adór na/oó niinár alé, i baloó dahiiká baraá waawuti'iimarihe.»

Masoomoó daqaarmo

¹⁸ Heeko úr Yesu guri yaahaás, «Intsaahhatusmoó hhoó', adór ni laaq a adoomá ar slafíngw alhhe'eesay wásl ngur aal?»

¹⁹ Yesu guri báy, «Mis hhooeemár ateetiín? Heé hhoó' i kaahh, aqo har Mungú kilós.

²⁰ Ahaá baré hara'aya a xú', ‹Fuqi ma awaar, Hee mu gaasaar, Gár hee ma fiisaar, Hee mu /aysántií tsataar, Baabuúwók nee aayo ilaiwawa/eek.› »

²¹ Iri oó', «Tisíng aga boo/eés sleémeero iimír na/uumar'eé' wa ale.»

²² Qoomár Yesu tí ngiwa axaás, guri báy, «Tam hamí gár wák uga wa /aaruúr. Muruudá' ta koon sleémeero weeriseek, nee peésaadá' ta sleer ka narkuutér i qasmís. Daqaari'iimarók a gawaá doorí eér. Daqaní ni hardát, aníng i eehát.»

²³ Ala inós tí ngiwa axaás, iri ló'wa gurhaamuút, asma inós a ló'wa daqaarmo.

²⁴ Yesu gari tsaáhh adór ira gurhaamuút, iri oó', «Ga/aawaak, adór daqaare kar gawít dahmaá baraá waawuti'iimár Munguhe.

²⁵ Ka inslaahh angamía iwa waarahh ar baraá fooxár laqwa, ta daqaarmo iwa baraá waawuti'iimár Mungú i dahi.»

²⁶ Mukdá' aa axaas tari oó', «Ala barqo adoosíng heé ba/ám a heemá?»

²⁷ Yesu iri oó', «Tidaádá' dír muko ya/aamaaká, dír Munguhe i ya/aán.»

²⁸ Petro iri oó', «Ga/aaweegáy, atén muruurén sleémeero ugwa geexawaán, kuúng uri eeharaán.»

²⁹ Yesu giri báy, «Án a kah, umuúqo heewo oo dooín gwa geexay, laqaá hareerós, laqaá hhaeewós, laqaá xwayliteérós, laqaá na/iiwós, as waawuti'iimár Mungú,

³⁰ inós muruú yaariír gun ak sláy hám baraá yaamuukae, nee baraá yaamaá hatlae slafíngw alhhe'eesay wásl gu sláy.»

Yesu gwa'araarós ngiwa malé sagaá wa tám wa oó'

³¹ Yesu eeharuuseedá' mibaá nee tsár ganara tláy, gari báy, «Ga/aawaagáy, hamí a tsa/a/amaán tawa Yerusalémúr kawaan, nee tidá' sleémeero taa gooín nee aaruuse daanduú Garmoó Heewo i bó/.

³² Asma ku qaas gawaá dabaá xoordaá hatlá'. Inooín kway niqín, kway /oosliislín, kway i nitsimiit,

³³ kway muux ar qaw'i, kway gaas. Bál tame niri waaslee/.»

³⁴ Ala eeharuuseerós tam /aymuú wák gwa tsahhiká baraá axweesanaydá' aa dir'íní kaahi. Gídaabár kaangwí kaa luú/ dir'ine. Sleeme kaa tsaahhiiká tidá' aa alki/iít dir'ín i alé.

Yesu heé taampa nguwa qaytsitís

³⁵ Yesu iwa tseewúy Yerikór i alé, heeko wák oo taampa aa iwiít afaá loohi, i múk firiirín.

³⁶ Qoomár boo/oó úr nguwa axaás iwa waaraahhi, iri yaahaás, «Gaa a milá?»

³⁷ Kuri báy, «Yesú Nasareti in waaraahh.»

³⁸ Tseeo gari iimu/ún, iri oó', «Yésu, Garmoó Daudi, án gurtlawáng.»

³⁹ Mukdá' aa giirin kuri iigahhaát as iwa xasliiti, ala inós tseeooro iri buúhh, «Garmoó Daudi, án gurtlawáng.»

⁴⁰ Yesu iri sihhiít iri oó', «Huwaare' amor'eé' alé.» Qoomár iwa tseewúy dír Yésú ii alé, Yesu iri oó',

⁴¹ «Adór ta sla' ar u laaq a adoomá?» Inós iri oó', «Aáko, gár ni slaa' a ilaaeé' niwa qaytsitiya'.»

⁴² Yesu iri oó', «Ilaawók ni qaytsitiye'. Haratlintaaoorók ugwa hungu/ús.»

⁴³ Hamtidár kilae ilaawós nay qaytsitiyé', nee Yesu tari koné', inós i hara Munguú xirfayeemiis. Nee muu sleémeero adoodá' kawa ár, Mungú kuri xirfayeemiís.