Luka 17 - Biblía Axweesantá Hhohho' ar Mungú 2004

Tlakweema

¹ Yesu eeharuuseerós gari báy, «Muruú múk baraá tlakweemií gee/sliím in qo tawo deer, ala heedaádá' ngu huwahuúw, a tsaxwaawós.

² Heewí gár kus hhoó' a tlaa/ár xoosliingw kan tseek gawaá istós, nee kuri kwaahh baraá tláwtí alé, ta oo wák baraá kuká' ninakwe nguwa baraá tlakweemií gee/asli.

³ Ti harmagahhe'.» «Heewók bira dakuús, gan'aaseek. Ala bira hhu'u'ún, gurtlaweek.

⁴ Ala kuúng bura sadakuús sagaáwa faanqw baraá looár wake, nee bir naa kií/ amoorók sagaáwa faanqw, iwa kaahi, ‹Aga hhu'u'uúm,› kuúng gurtlaweek.»

Haratlintaao

⁵ Aluuwo Aako ya/abuuse guri beér, «Haratlintaaoorén na doogang.»

⁶ Aako iri oó', «Bar haratlintaaór har qoomoó ilmoó haradaáli a koondá', a aleesleerá' /aantsírí kawa beera', ‹Quútl diirihe, ti hatltá eer baraá tlawi›, alók geera /aantsí nun iialooés.»

Gadiyér lawaalmo

⁷ «Ar slaqsaywo heé wák baraahunge i lawaalmoó kón oo qaymór doósl, laqaá oo bee/ángw de'eém. Lawaalmoowí birna harakií/ baraá qaymór wa ale, aakoowós gu báya, ‹Qwaláng ar gaanslaay, /ayiím.›

⁸ Un beéraáke, ‹Muruú /aymar'eé' tleehhang. Ti amohhe'es iwa sagadiyus qoomár án niwa /ayiim nee niwa wahaam. Daqaní kuúng ta /ayiín nee ta wahaán.›

⁹ Xáy, lawaalmoodaádá' u sluufísa, asma tidá' kwa beér ngiwa tleéhh?

¹⁰ Gawaá adoorihe kuungá' sleeme tidá' sleémeero tunda báy, tleehhamooro bara hhe'esé', ta oa', ‹Atén a lawaaleedá' gídaabár koomaaká. Aqo tidá' atén wa hariim ana tleehhaán.› »

Yesu múk mibaangw oo tiqtír tsatimit nguwa hungu/uús

¹¹ Qoomár Yesu iwa Yerusalemúr kay, ina waaraáhh ar baraá tla/ángw Samaria nee Galilaya.

¹² Iwa dáh baraá gixsarka niina, múk mibaangw oo tiqtír tsatimit tiri doogiyé' nee inós. Inooín tari sihhiít amorqií alé,

¹³ tari tseé' tari oó', «Yésu! Aáko! Atén ti gurtleer.»

¹⁴ Ngiwa ár, giri báy, «Tlawsé' ti laqaande' dír kaahamuusér Mungú.» Nee qoomár tawa daqay, tana hhoohhooúy.

¹⁵ Ala heé wák dir'ine ngiwa ár adór ira hunguú/, iri kií/ amór Yesu, i hara Mungú xirfayeemiis ar afór ur.

¹⁶ Iri tumbarara'aát dír geeraá Yesu, guri sluufiís. Nee heedaádá' a heé tlahhoó múk Samaria.

¹⁷ Aluuwo Yesu iri oó', «Kudá' mibaangw sleémeero kaa hhoohhooeesiikáhe? Kudá' gwaleél i amá?

¹⁸ Heé naa kii/ oo Mungú ngwa xirfayeesár ay i káhhi? Aqo har kwí kilós oo dahaaymoówo?»

¹⁹ Yesu heedaádá' guri báy, «Sihhiít, tláw, haratlintaaoorók ugwa hungu/ús.»

Hardahamaá waawuti'iimár Mungú

²⁰ Múk Farisayo Yesu guri yaahaás, «Waawuti'iimár Mungú xaylá ni hardát?» Yesu giri báy, «Waawuti'iimár Mungú binda hardát a aanda'aaká ar ila'.

²¹ Laqaá ta ooiiká, ‹Areeng i diirí›, laqaá, ‹Handá' i amorqá'›, asma waawuti'iimár Mungú i baraahúng i dirí'.»

²² Yesu eeharuuseerós gari báy, «Deelo i hardát, deelór wák baraá deelór Garmoó Heewo kawa ilatleerusa' arto, ala a aanda'aaká.

²³ Slám kuungá' nu baya', ‹Qaytsité' amorqá',› laqaá, ‹Qaytsité' amoorí,› ala kuungá' ma tlawaara' didá' ti dir'a'a, laqaá mi eeharaara'.

²⁴ Asma adoodá' mankari ir wer'eeliin gawaá doorí wa ale, bihhiiká' ay kuqá', an adoodár Garmoó Hee i laqi bál deeloorose.

²⁵ Ala gár geeraawo kuwa hariím a slahh'amuú yaariír gun sláy, nee kway sii' nee qartí.

²⁶ Adoodá' aa tleehharut deelór Noawo, an adoodá' tleehharuut bál deelór Garmoó Heewo.

²⁷ Asma qoomár de'emaá Noawo muu ina /ayín nee ina wahán, slám tana duuxuuxún nee kina duxuút, tam ay bál Noa iwa dáh baraá miringamo, nee tluwoó da/atén nay hardáh, mukdá' sleémeero guri hhaamiís.

²⁸ Nee sleeme an adoodá' qoomár Lotiwo. Muu ina /ayín nee tana wahán, ina tlaxún nee tana muruú weerimiís, ina dahaasín nee tana maraá tlehhiít.

²⁹ Ala bál Loti iwa ti'iít baraá gixsár Sodomaro, asla nina /ét gawaá doorí wa ale adór tluwaay, dinkwa nee tlaa/aá asltá koomá', nee muu sleémeero kuri hhaamiís.

³⁰ Adoorí an adoodá' tleehharuut bál Garmoó Hee burku geehhoees.

³¹ «Baalaadae heé gawaá daanduú dó i dirií', nee oo xooslaarós baraá dó i dirii', miwa aweér as ngiwa leehhi. Nee slám oo baraá qaymór i dirií' miwa amór dó i kií/.

³² Harér Loti inslawaak.

³³ Umuúqo heewo oo slafiingós gu ba/amisár wa slaá' kilós alé, gu qwaarees, nee kudá' slafiingós gu qwaareés, gu ba/amis.

³⁴ Án a kah, xweeraadae hhawaataá tsár awa gawaá qatanír wák i diriiá', oo wák kur tláy, kuquú hatlá' kuri geexáy.

³⁵ Nee /ameenár tsár ar dinkwár wa xoosliim, ar wák kar tláy, nee tiqár hatlá' ka geexáy. [

³⁶ Slám múk tsár ta baraá qaymór i dirii', oo wák kur tláy nee kuquú hatlá' ku geexáy.]»

³⁷ Tari oó', «A diimá wa ale, Aáko?» Giri báy, «Dír tuua i diri' an didár gwares i burumburiimiti.»