Luka 16 - Biblía Axweesantá Hhohho' ar Mungú 2004

Saayusmoó inkihhimu wásl

¹ Aluuwo Yesu eeharuuserós gari báy, «Daqaarmooko i deer oo daqaari'iimarós gaa heekoó i saayin. Heedaádá' kuna dirós i sakwasleemuút ta kaahi, ‹I daqaari'iimarók hhititín.›

² Guri ateét guri báy, ‹Kaangwí muu i kaahi daanduuwoge a umós? Xáda, faarór muruueé' sleémeero diirí laqaamang. Asma kuúng a sangw kumitaká gadiyeésinge.›

³ Aluuwo heedaádá' iri baraá muunaáwósí oó', ‹Adór ni laaq a adoomá? Asma daqaarmooeé' kwí i hingeemiis baraá gadiyeérose. Doosla a aslawká. Firooro a muruumiít.

⁴ Hám daxta an fuqriím, as kahhó' bira hingeés gadiyeede, múk hatlá' iwa ilaaoohi.›

⁵ «Aluuwo iinuusér daqaarmoowós gana ateét. Iri oó' dír kuduú geera, ‹Gár aakooeé' uwa iinuusi a milá?›

⁶ Iinusmoodá' iri oó', ‹Dahhaaroó tsiiru oo di/tá seituúni.› Guri báy, ‹Slambaree/irók taataahheek, mibeeraá kooán gooimeek ar gaanslaay.›

⁷ Oo hatlá' guri báy, ‹Kuúng gár tuwa iinuusi?› Iri oó' katatoó tsiiru oo angaáno. Guri báy, ‹Slambaree/irók taataahheek, mibeeraá dakaát gooimeek.›

⁸ «Saayusmoodá' inkihhimu wásl taa daqaari'iimár i saayín, kuri xirfayeés nee daqaarmoowós, asma fuqurangwdá' aa tleéhh. Asma múk baraá yaamuuká' ta fuqurángw kón baraá slafingw'ine, ta mukduú baraá gwa/aateemaawo.

⁹ «Án a kah, daqaari'iimár baraá yaamu ar gadiyuusaak as mulqe kawa sleera'. Daqaari'iima bira fák, mulqeedá' daqaní nu ilaót baraá hotaá kureerisleeme.

¹⁰ Heé inkihhimuú koóm baraá gár niinawe, tam baraá gár ure sleeme i inkihhimuú kón. Nee heé inkihhimuú koomaaká baraá gár niinawe, tam baraá gár ure sleeme i inkihhimuú konká.

¹¹ Gawaá adoorihe, kuungá' bar inkihhimuú koonda'aaká baraá daqaari'iimarír baraá yaamuukae, daqaari'iima tidár ló' heé ngi dirhúng i saayiím a heemá?

¹² Bar inkihhimuú koonda'aaká baraá daqaari'iimár heé hatlae, toohúng heé ngi haniís a heemá?

¹³ «Heé daqaarér tsár i lawaali'iitaro ga asláw i kaahh. Asma kooko gu aahh, kuqá' gway slaa', laqaá nee kooko ti oohiyá', kuqá' gway waaqaqaa'. Mungú nee daqaari'iima i lawaali'iitaro i aleesleera'aaká.»

/Ayma'aá hatlá' awa Yesu aa káh

¹⁴ Mukduú Farisayo tidá' Yesu aa oó' sleémeero ngiwa axaasiyé', kuna niqín, asma inooín tawa kudá' peésár sla'á' ló'wa ale.

¹⁵ Yesu giri báy, «Kuungá' ti geehhooatimisá' dír geeraá muko, tawa kudá' hota ganaa'á'. Ala Mungú munerhúng ga xuu'. Muruudá' muu i gaárí xui, ala dír geeraá Munguhe an kudá' buhhtamís.

¹⁶ «Hara'ayár Mose nee gooír aaruuse ina kumamít ay qoomár Yohánedá' Baatimaamiís niwa hardáh. Ala iimír qoomaadae Ya/abtór hho' ar waawuti'iimár Mungú kay alki/iít, nee muu tin kilooín dahamiis ar /uuru baraá waawuti'iimarihe.

¹⁷ Ala ka inslaahh doori nee yaamu niwa waarahhiya', ala i ya/aandaaká tam gooír niina adór afkú laqwa baraá hara'ayár Mosewo kawa hingeesi.»

¹⁸ «Umuúqo heewo oo hareerós gaa guus, iri harér hatlá' duúx, aa fuquús. Nee bar hee /ameenír hhawaatuuwós aa guús nga duúx, aa fuquús.»

Heé daqaarmo nee Lasaro

¹⁹ Yesu iri oó', «Heeko wák i deer, oo daqaarmo. Inqwaruú i tsitatiiti a inqwaruú sirda/atén, nee taa tleéhh ar kitaánír hhohho'. Nee umuú deelooro muruú /aymár hhó' gun /aa/aay.

²⁰ Narkutmooko ta bay Lasaro kun afkú do'ós i haahuuw, i inkahha'aá yaariír kón.

²¹ Inós muruú /aymaadá' gawaá meésár daqaarmoó wa paáhh, gun ilatleerumamiis nguwa /ayi. Sleeme seeaawe gun i burumburimaamít, gun inkahhi'i naatsatsiín.

²² «Narkutmoodá' iri gwaá', malayke guri húp ay dír geeraá Abrahamu. Daqaarmoodá' iri gwaá' sleeme, kway foól.

²³ Iwa slahhahhai didár múk aa qaátl wa ale, ina gáwtí qaytsiít, Abrahamu gway amorqá' saáw i ár, Lasaro i geeraawós i dirii'.

²⁴ Daqaarmoodá' iri tseé' amór Abrahamu iwa kaahi, ‹Baabá Abrahamu, án gurtlawáng. Lasaro ya/aaweek ma'aay ngi tikiisi ar diitsarós, tsifrangw'eé' ngu tse'eesi, asma baraakae asla i ló'wa slahh'eemís.›

²⁵ «Abrahamu iri oó', ‹Garmaaeé', inslaweek adór kuúng muruú hhó' baraá yaamuwo kura sleér oo slafíngw baraá yaamu, ala Lasaro gár aa sláy a liitlakwe. Daxta inós hamí i diirí, ku gurkwa/amis, kuúng tu slahh'emiis.

²⁶ Slamí baraá tla/ángw atén nee kuungae, wa/ángw aa tsar'eet i deer, as múk gayuurén kwí waarahhmuú amoosíng munguwa aleesláy, laqaá muksíng oo gayuuhúng mindiwa gayuurén i waaraáhh.›

²⁷ Daqaarmo iri oó', ‹Bar adoosíng ala, baabá án kuúng u firiím, Lasaro ya/aaweek amór doó baabuúeé'.

²⁸ Asma hhaee'eé' awa kooán i dayá', ngi gurbu'utá ay, asma inooín mindiwa hardihiyé' diirí slahh'amuú koom.›

²⁹ «Abrahamu iri oó', ‹Mose nee aaruuse i dayá'. Tidá' inooín ta kaahi ka iiárií qaasi.›

³⁰ Iri oó', ‹Aasla'áy baabá Abrahamu, asma heé naa didár múk aa qaátl wa kii/, birnga i daqáy, ta hhu'u'ún.›

³¹ Abrahamu iri oó', ‹Mose nee aaruuse birka iiárií qaasiiká, tam heé naa baraá múk aa qaátl wa waaslee/ gurbu'uto gi aleeslayká.› »