Luka 15 - Biblía Axweesantá Hhohho' ar Mungú 2004

Slaqsoó bee/ír aa qwat

¹ Ohomuusér koódi sleémeero nee tlakuuse Yesu kuna i daqáy as kuwa iiárií qaasi.

² Múk Farisayo nee intsaahhatuusér hara'ayár Mose tay qununuú/ ta kaahi, «Heewí mis tlakuusér dahi'iimis, slám nee inooín i al/ayiná'.»

³ Yesu giri slaqsaywí báy,

⁴ «Barnaxes heé wák baraá tla/angwhunge bee/ángw tsiiru gu kón, bee/ír wák bira qwát, adór i laqi a adoomá? Aqo bee/ángw mibeeraá gwaleél nee gwaleél gun geexáy baraá qawo, iri tláy, tidá' aa qwat gari leelehhtuú áy, ay dír ngi slay.

⁵ Qoomár birnga sláy, gari gawaá sum'iiwós i qaas iri qwalalaa/.

⁶ Qoomár bira dó i hardáh mulqeerós gari ateet nee inslaawaywose, iri ooi, ‹Qwalalaa/aré' dinkwa nee aníng, asma bee/ir'eé' tidá' aa qwat aga sláw.›

⁷ Án a kah, gawaá dooriiwo sleeme ta adoorír qwalalaa/ as heé wák oo tlakusmo oo aa hhu'u'un, ta múk mibeeraá gwaleél nee gwaleele oo gan'amuú koóm, oo hhu'u'uungw gu sla'aaká.»

Slaqsoó shilingmoó aa qwaar

⁸ «Laqaá barnaxes /ameenír wák i shiliíngír mibángw koón, oo wák bira qwaár, adór i laq a adoomá? Aqo tsaa'asi gan dá/, do' gway fíts, shilingmoodá' guri leelehhít ay dír nguy sleer.

⁹ Qoomár burngwa sleér, mulqeerós gari atét nee inslaawaywose. Giri beer, ‹Qwalala/aré' dinkwa nee aníng, asma shilingmooeé' kudá' aa qwaar ugwa sláw.›

¹⁰ Án a kah, tam malaykér Mungú sleeme i adoodár qwalaalá/ as heé wák oo tlakusmo oo aa hhu'u'un.»

Slaqsoó garmoó aa qwaar

¹¹ Aluuwo Yesu iri oó', «Heeko wák i deer oo daaqoó tsár gu koóm.

¹² Garmaadá' niiná baabuúwós guna báy, ‹Baabá, baraá muruuwoge kudá' aníng wa hariím qasiisang.› Muruuwós kudií kon guri inooín i qasmiís.

¹³ Deelór niina iwa waaráhh, garmaadá' niiná muruuwós guri dinkwaárií qaás sleémeero, iri aa'aá káy baraá yaamaá saawá'. Amoodae muruuwós guri hhitaatín ar luhaá gana'a'aaká.

¹⁴ «Qoomár muruuwós sleémeero nguwa faák, giyér ur nay tleér baraá yaamuudae, inós sleeme iri waasl'amuút.

¹⁵ Iri tláy ay amór heeko yaamuudá'. Heedaádá' guri baraá qaymoorós i huúw, baynu ngiwa /aymiisi.

¹⁶ Garmaadá' qafoodá' baynu i /ayiya' giri slaá' ngiwa qwarkós ar tsaeemisi, asma heé gwa gaárí haniis i kaahh.

¹⁷ Ala qoomár inós tiwa baraá muunaáwósí aldakuút, iri oó', ‹Sagadiyuusér dír doó baabuúeé' wa gadiyuus a magá', ar gwaeemaá gixaw, nee án qwari i baraaká' wa gaamiis.

¹⁸ Aníng a tláw, amór baabuúeé', nee nguri baw, Baabá, án aga tlakweés geeraá Munguhe nee geeraawoge.

¹⁹ A hariimaaká daxta tiwa garmaawók ar ateetin. Harafaaráng amór sagadiyuuseerók.›

²⁰ Aluuwo iri tláy, iri kií/ amór baabuúwós. «Ala qoomár iwa amorqá' saáw i kahhi, kuri ár nee baabuúwós, guri gurtláy. Baabá iri amoorós i ta'aaín, guri slaqwtós i óh, guri ma'aás.

²¹ Garma iri oó', ‹Baabá, án aga tlakweés geeraá Munguhe nee geeraawoge, a hariimaaká daxta tiwa garmaawók ar ateetin.›

²² Ala baabá lawaaleerós gari báy, ‹Inqwaarír hhoo' huwaare' ar gaanslaay, tsiitisaak, dakós mungáy qaasaak, ya'a' ya/atáy dahaasaak.

²³ Awuú aa wahhaar huwaare', ku gasá'. Atén daqaní a /ayiimaán tay qwalaala/aán.

²⁴ Asma garmaaeé' kwí geeraawo aa gwaá', nee hám naa waasleé/, geeraawo aa qwaár, daxta ugwa slawaán.› Bara/ kuri iimu/ún.

²⁵ «Garmaadá' úr i baraá qaymór i dirii'. Niwa kií/ amór dó i alé, iwa tseewúy, afór daa'aangw nee neeto gana axaás.

²⁶ Sagadiyusmoó wák guri ateét guri yaahaás, ‹Kaangwí a milá?›

²⁷ Guri báy, ‹Hhiyaawók naa hardáh, nee baabuúwók gwa awuudá' wahhaár i gaás, asma nguwa malé sláy iwa slafi.›

²⁸ «Garmaadá' iri buúhh, dahamaá baraá do' giri sií'. Aluuwo baabá nay baraá dó wa ti'iít, gway harhheehhe'emisuú áy.

²⁹ Ala baabuúwós guri báy, ‹Ga/aaweek, án kuúng una sagadiyumamiís kureeriiká' sleémeero, nee qoomár hara'ayaarók ngiwa waaqaá' i káhh. Ala tam deelmoó leei oo naa aní hanís i kaahh, niwa qwalaala/aan nee mulqer'eé'.

³⁰ Ala garmaawók kwí niwa hardáh, oo muruuwók gwa faak dinkwa nee /ameenár tsaatuuse, ugwa awuudá' wahhaár i gás.›

³¹ Aluuwo baabá iri oó', ‹Garmaaeé', án nee kuúng a dinkwa umuú deelooro, nee gár án niqo kooma a tók.

³² Ala tawa qwalaala/aan nee tawa bara/aan i hariín, asma hhiyaawók kwí geeraawo aa gwaá', hám naa waasleé/, geeraawo aa qwaár, daxta ugwa slawaán.› »