Luka 13 - Biblía Axweesantá Hhohho' ar Mungú 2004

Hhu'u'uumé'

¹ Qoomaadár kilae mukko nina hardáh, kángw mukko Galilaya guri dír Yesú ii oó', adór Pilato ngura tsuú/ qoomár inooín tawa hikwaá ilahhooár ta tsu/i dír Mungú, tam tseerer'ín nee tidár hikwa tiri aleedók.

² Yesu giri báy, «Mukduú Galilaya oo taa adoosír tsuú/ kuungá' ka xua' an ak múk tlákwe ta múk Galilaya kuduú hatlá' sleémeerowo?

³ Aasla'áy, án a kah, ala kuungá' bar hhu'u'uunda'aaká, a qwadá' adoosír kilár alé.

⁴ Laqaá mukdá' mibaá nee dakaát, kudá' doó gáwtí tleér aa i huú', giri tsuú/, dír Siloamuwo, kuungá' ka xua', mukdá' an ak múk tlákwe ta kuduú hatlá' sleémeero oo Yerusalemúrí diriia?

⁵ Aasla'áy, án a kah, ala kuungá' bar hhu'u'uunda'aaká, a qwadá' adoodár kilár alé.»

Slaqsoó /aantsír mamaá koomaaká

⁶ Aluuwo Yesu giri slaqsaywí báy, «Heeko wák i xa'anoó /aantsír kón, oo taa dahaás baraá qaymoorós ar sabiíbu. Ina tláy iri mamaá leelehhtuú áy gawaadá', ala gaa slayká.

⁷ Aluuwo heedaádá' qaymoodár sabiíbu ga amohhe'emamiís guri báy, ‹Ga/aaweek, kureeriiká' tamaawo nin mamaá leelehhtuú aa'áw gawaá /aantsírí aleeró, ala gár ni slaaslaw i káhh. /Aantsírí tsateek. Gár yaamu ngihar tawo hhitiin a milá?›

⁸ Ala heé qaymoodár sabiíbu ga amohhe'emamiís iri oó', ‹Aáko, kurkihe malé maweek. Án a kakaanuús nee a xawií qaás.

⁹ Bar mamu ngaa laqwál aluuwo, ka hhoo'. Ala bar ngaa laqwaliká, daqaní ka tsát.› »

Yesu /ameeni ngiwa hungu/uús deelór Sabaátoro

¹⁰ Bál deelór Sabaátoro Yesu ina baraá doó saaliíngwá intsaahhatimís.

¹¹ Nee /ameenirka didaádae i deer ar neetlaamér aa eér. Inós neetlaameedá' iimír ngiwa eér kureeri a mibaá nee dakaát. Neetlaameedá' gari qwambatisa hhe'és, slám inós gan'aasaro ti aleesleeraaká.

¹² Yesu ngiwa ár, gari ateét kari báy, «Aáyo, kiíng aga hungú/ baraá slahh'amaayeerók tisinge.»

¹³ Yesu dabaawós giri gawaá /ameenidá' i qaás. Inós hamtidár kilae iri ganá', Mungú guri xirfayeemís.

¹⁴ Heedaádaá úr oo doó saaliingw iri buúhh, asma adoodá' Yesu /ameenidá' ngiwa hungu/uús deelór Sabaátoro, boo/aydá' guri báy, «Deelo lahhoó' i deer ar gadiyeé. Hardaharé' deeloodá' lahhooe, kuungá' tunduwa hungu/uumisi, ala a bál deelór Sabaátorooká.»

¹⁵ Ala Aako heedá' úr oo doó saaliingw guri báy, «Kuungaá hhaahhafuúse. Umuúqo heewo dirhunge deelór Sabaátoro awuuwós laqaá daqwaywós gu duúxiíke baraá matla/aango as nguwa wahaasár ay.

¹⁶ Ala /ameenirír xwaylár Abrahamu, inós Neetlaangw gana slahh'eemiís kureeri mibaá nee dakaát, ala inós i hariíndaáke kawa hungu/uusi baraá slahh'amuuwihe bál deelór Sabaátoro.»

¹⁷ Qoomár iwa axweesi, kudá' sleémeero inós ngu tlaampa'amisá' kiri mureekeés. Ala boo/aay sleémeero iri qwalalaá/ asma muruuduú waa/oo/amo sleémeero Yesu aa tleéhh.

Slaqsoó ilmoó haradaáli

¹⁸ Gawaá adoorihe Yesu iri oó', «Waawuti'iimár Mungú gár kara slaqamís a milá? Laqaá aníng gár ngir alqoomees a milá?

¹⁹ Gár kara slaqamís a ilmoó xa'anooko ta bay haradaáli. Hee guna dahaás baraá qaymoorós. Niri ti'iít, iri xa'anoó úr tleehhiít, tsir/o maray'ín giri gawaá haleemiiwós i tlehhít.»

Slaqsoó gár ta mikaátérár sluuftimiisi

²⁰ Yesu iri malé oó', «Waawuti'iimár Mungú gár ngir alqoomees a milá?

²¹ A slaqás nee gár ta mikaáteérár sluuftimiisi, ar /ameeni aa qás baraá puuruú har afi qoomoó deebedaá tsár, tam puuruúdá' sleémeero iri sluúf.»

Afkú iiraákw

²² Yesu ina waaraáhh ar baraá gixsadu nee aya, iri hara loohi intsaahhatimís qoomár iwa aaiiwós kay Yerusalemu.

²³ Heeko wák Yesu guna yaahaás, «Aáko, múk ba/ám ku niináwe?» Yesu inooín giri báy,

²⁴ «Ilakaaharu tleehhaak tawa data' ar afkú iiraákw. Asma án a kah, awa yaariir dahmu ngu leelehhiyá', ala ngu aleeslay'aaká.

²⁵ Qoomár heé do' loó' bira tláy, afkú do' burngwa tseék, kuungá' tari sihhitá' tsee/aá wa ale tawa ateetiinda' tawa kata', ‹Aáko, do' gweereek.› Nee kuungá' nuri bay, ‹Amór ta dahha' aníng a xuaaká.›

²⁶ Kuungá' kuri beera', ‹Ana al/ayiimaán nee ana alwahamaán dinkwa nee kuúng, nee kuúng an intsaahhatimaamís baraá yaamuurén wa ale.›

²⁷ Ala inós kuungá' nuri bay, ‹Amór ta dahha' aníng a xuaaká. Quutlé' dir'eene kuungaásingá' sleémeero awa tlakuuse.›

²⁸ Qoomár Abrahamu nee Isaka nee Yakobo nee aaruuse sleémeero bira aandé' baraá waawuti'iimár Mungú i alé, nee kuungá' tunduri tsee/áy kwaahh, qoomaadae kuungá' tari /aa/amiindá', tari /atlaá /agá'.

²⁹ Aluuwo muu nin hardah oo da/aáw daáhh nee /uwawo, nee oo /iikú daáhh nee basko, nee inooín tari iwiit dír muruú /ayma baraá waawuti'iimár Munguhe.

³⁰ Ga/aawaak baraá kuká' alaá har'a, ta bahh geerií waaraahh. Nee baraá kudá' geeraá har'a, ta bahh alhhe'eesáy kii/.»

Sla'aarír Yesu daanduú gixsár Yerusalemuro

³¹ Siiwadár kilae Yesu kuri i daqáy nee múk Farisayo, kuri báy, «Quútl diirihe, asma Herode i kuúng gaasár wa slaa'.»

³² Yesu giri báy, «Tlawsé', intsangwdá' ku beera', ‹Iia qaaseek, laarí nee matlo aníng a neetlaamér duxuúm, nee tiqtuuse ngiwa hungu/umiis. Ala bál tám gadiyér'eé' a boo/eés.›

³³ Slám laarí nee matlo nee balooqawo gár án iwa hariím an kumiít aaiieene, asma i ya/aandaaká aarusmo kuwa dír hatlá' i gaasi, aqo har baraá Yerusalemu.

³⁴ «Yerusalému, Yerusalému, kiíngadá' aaruusér tsu/a/iim, nee kudá' tinda amoorók ya/aáw kiwa tlaqwaqut ar tlaa/e. A sagaáwa magá' án mukók nguwa burumburtá wa slaa', adoodár koonki tsiioorós ngir burumburariin baraá hhaampi'iiwós, ala kuungá' aga ya/aandi'iiká.

³⁵ Qaytsité', Mungú doohúng gwa geexáy. Án a kah, aníng i baloó aanda'aaká daxta ay dír ti oa', ‹Kudá' hardáh ar umuú Aako kwa tsuúq.› »