Luka 1 - Biblía Axweesantá Hhohho' ar Mungú 2004

Gár kitaábu kusa gooín

¹ Amór Teofíló xiríf. Múk yaariír kángw muruudá' yaariír aa tleehharuut direne gwaa iiár gooiro,

² adór kungura atén i alki/iít nee mukduú aáng gwa ar ar ilaaín iimír geeraá wa ale, nee oo axweesantadá' gaa alki/iit.

³ Anuú kilá' kaangwí ugwa ló'wa tsee/aariím iimír amoodár iimu/úngw wa ale. Án ngi slaá' sleeme ka hhoo' ngiwa kuúng i gooiim adór umuúqo gaaro ira tleehharút,

⁴ as kahhó' kuúng kawa tsahh adór tar ló' tidá' kuúng tuwa intsaahhatimís.

Xwaylár Yohánedá' Baatimaamiís kawa geerií oó'

⁵ De'emaá waawutmooko yaamaá Yudea ta bay Herode, kaahamusmooko Mungú i deer. Umuuwós a Sakaria, oo bartá múk Abiya. Hareerós ar tlahhoó guruú doó Aroni, umuuwós a Elisabeti.

⁶ Inooín tsaraawo a múk hota ganaá' dír geeraá Munguhe, hara'ayár Aako sleémeero kana óh, nee axweesantós adoodá' ir hariin.

⁷ Ala inooín ta na/oó konká, asma Elisabeti a kampeeri, nee inooín tsaraawo naa diné'.

⁸ Looarka wake Sakaria iwa gadiyér kaahamusi'iimár tleehhi dír geeraá Munguhe, qoomár baalaqaasír múk bartós,

⁹ inós kuna tsawaár, adoodá' /iisí kaahamuusér Mungú i tlehhaahhit, iwa dahi baraá Doó Aako as kahhó' ilahhooár mooyángw tsuú' ngiwa da/i dír Mungú.

¹⁰ Qoomaadá' mooyángw tsuú' kuwa da/aa/an, boo/oó muu sleémeero i tsee/aá wa firiirín.

¹¹ Malaykamoó Aako guri harati'iít, aa sihhiít bihhaá doó /iyáy awa kitangwdá' mooyángw tsuú' kuwa da/a/an.

¹² Sakaria nguwa ár iri amoqwaár, iri da'ayuút.

¹³ Ala malaykamoodá' guna báy, «Sakaría, ma da'ayumiitaar, asma firoorók kaa axaás, nee hareerók Elisabeti na/oó garma gu xwayluúr. Umuuwós ku beer Yohane.

¹⁴ Kuúng tay qwalá/ tay bará/, nee múk yaariír xwaylarós gay saqwalalaa/.

¹⁵ Asma uraay gu sláy dír Aakoowo. Difaái ga baloó wahiiká laqaá umuúqo gár ooniitimisa. Inós ku hatsiis Qeeruú hhoohhoó' oo Munguhe iimír iwa baraá guruú aayoórí kahhi.

¹⁶ Múk yaariír oo Israeli gu amór Aakoó Munguúíní ki/is.

¹⁷ Inós in geeraá Aakoó wa hi'iit ar muunuú adór kuduú Eliya nee /uuruuwós, as munér baabi'i ngiwa warqeesi iwa amór na/ií ki/, nee mukdá' iiawaslén nguwa fuqurángw hotaá ganaa'á' i slay, as múk Aako nguwa geerií amohhe'eesi.»

¹⁸ Sakaria malaykamo guri báy, «Kangwsíng án adór ngur tsaahh? Asma án a aako, nee harer'eé' a aamár aa qaroó diin.»

¹⁹ Malaykamo iri oó', «Án a Gabrieli, kudá' geeraá Mungú i dirií'. Nee aníng tina ya/aáw nee kuúng niwa axweesaan, nee ya/abtoorí hho' ngiwa dirógií oo'.

²⁰ Hám ga/aaweegáy, a afawasli tleehhít, axweesani a harslaaqát, ay bál deeloodá' kaangwí i boo/i. Asma axweesante'eé' aga ya/aandiiká. Ala iqo bó/ qoomaarós bira xeér.»

²¹ Mukdá' Sakaríá daamaaraám iri waa/oó/ as niwa baraá Doó Mungú wa tliík.

²² Niwa ti'iít, naxés amor'ín i axweesani ngiwa aslayká, kari tsaáhh adór iigu'utu ngura sláy baraá Doó Munguhe. Iri amor'ín i dabár axweés, iri sangw axweesántí ki/iiká.

²³ Deelór baalaqaasirós iwa fák, iri do'ós i waátl.

²⁴ Deeloodá' iwa waaráhh, hareerós Elisabeti iri tsít, iri dó'wá iwiiwít slahheeraá kooane, i kat,

²⁵ «Adoorí an tidá' Aako naa aníngií tleéhh qoomár iwa gurií baá/, nee mureekesay'eé' kudá' nira hotaatiím tla/ángw muk'eene gwa hingeés.»

Xwaylár Yesu kawa geerií oó'

²⁶ Qoomár tsiihoó Elisabeti tawa slehheeri lahhoó', malaykamo Gabrieli kuna ya/aáw nee Mungú ay gixsár Galilaya, ar ta babay Nasareti,

²⁷ amór dasír /amaatliito'o tooka ta lehhiiti nee heeko ta bay Yosefu oo tlahhoó Daudi. Umuú /amaatliito'oodá' a Maria.

²⁸ Malaykamo iri baraá do'ós i dáh iri oó', «Laawaay, kír tsuuqa iga sleer. Aako nee kiíng a dinkwa.»

²⁹ Inós iri ló'wa amooqwát asma /aymi'iidá', iri baraá muunaáwós i ó', «Laawaaywí a laawoó adoomá?»

³⁰ Malaykamo gari báy, «Maria ma da'ayuutaar, asma tsuuqaá Mungú iga sleér.

³¹ Ga/aaweegáy, a tsít, na/oó garma kway xwayluúr. Umuuwós kway beer Yesu.

³² Kwí uraay gu sláy, ku bay Garmoó Kuduú Gawa. Nee Aakoó Mungú gu waawuti'iimár Daudi i haniis, gídaabá waawuti'iimár baabuúwós.

³³ Hhay Yakobo gan sawaawuti'ín kureerisleém, nee alhhe'eesoó waawuti'iimarós i kaahh.»

³⁴ Maria malaykamo guri beér, «Adoosí ta kat adór ir tleehharut, asma án taa duuxiiká.»

³⁵ Malaykamo gari báy, «Qeeruú hhoohhoó' oo Mungú ni dirók i hardah, nee /uuruú Kudá' Gáwtí dirií' kiíng i tuuntuuk. Gawaá adoorihe na/oó ta laqwaali ku hhoohhoó', kuri bay Garmoó Mungú.

³⁶ Slám malé ale mar'afto'oorók Elisabeti na/oó garmaawo a tsiiháy baraá diimaywose. Slahhaangwí oo lahhoó', inósaadá' geeraawo tawa kaahi a kampeeri.

³⁷ Asma dír Munguhe gár ya/aamaaká i káhh.»

³⁸ Maria iri ó', «Án a lawaalo'ór Aako. Adoodá' taa ó' daanduueene i tleehharut.» Malaykamo iri quútl dirose.

Maria Elisabeti ngiwa taaqweesár eér

³⁹ Maria deeloodae iri tleér ar gaanslaay ay baraá yaamaá tlom'i ay dír gixsarka wák ar yaamaá Yudea.

⁴⁰ Iri dát baraá doó Sakaria, Elisabeti gari taaqwés.

⁴¹ Elisabeti laawoó Maria nguwa axás, na/oó niiná iri neét baraá guruuwós wa ale, Elisabeti kari hatsiís Qeeruú hhoohhoó' oo Munguhe.

⁴² Iri afór qwal/amaayér ar tsé', iri ó', «Kiíng taa tsuúq baraá /ameenaaro, nee na/oó ta xwayluúr kwaa tsuúq sleeme.

⁴³ Adoorí adór ira tleehharút laarí tam aayír Aakooeé' niwa amor'eé' keér?

⁴⁴ Asma siiwadár kilá' án afór laawaaywók ngiwa axaás, na/oó niiná iri baraá guruueé' wa neét ar qwala/.

⁴⁵ Amohhoouso'o a tidá' aa haratlinti', asma tidá' Aako ngaa báy i bó/.»

Daa'ángw Maria

⁴⁶ Maria iri ó', «Muunaáeé' adór Aako kur úr gaa tsaáhh,

⁴⁷ nee qeeruueé' in Munguú saqwalalaa/, Ba/amusmooeé',

⁴⁸ asma lawaalo'oorós ar liitlaakw gaa gurtláy. Ga/aaweek, iimír hamihe qari sleémeero án i beer tidá' tsuuqa gaa sleer,

⁴⁹ asma Kudá' /Uuruú koóm án iga muruú urén i tleéhh. Nee umuuwós ku Hhoohhoó'.

⁵⁰ Nee gurtleemuuwós i kumaamiit umuúqo qarto dír kudá' inós ngu ilaiwawa/a'a.

⁵¹ Kángw úr gwa tleéhh ar /uuruú dakós, Kudá' daara/aamá' baraá inslawoó muner'ine gaa diyaá/.

⁵² Waawitá gwa hingeés baraá waawuti'iimar'ine. Kudá' liitlakwen gaa uráy haniís.

⁵³ Awa qwariitá' gaa aaxiís ar muruú hhó', nee daqaare gaa tawó ki/ís.

⁵⁴ Lawaalmoowós Israeli ngwa alee/iisár áy. Gurtleemuuwós gwa insláy,

⁵⁵ kudá' aa al'axweés dír baabi'iirén, dír Abrahamu nee xwaylarós ay alhhe'eesay wasle.»

⁵⁶ Maria nee Elisabeti tari alhoót afi qoomár slahheeri tám, aluuwo iri wátl amór do'ós.

Yohanedá' Baatimaamiís kuwa laqwaál

⁵⁷ Deelór xwaylár Elisabeti iwa xeér, na/oó garma gway xwayluúr.

⁵⁸ Inslaawaywós nee mar'eefoowós kari axaás adór Aako ngira ló'wa gurtláy, sleémeero nee inose tari alqwalalaá/.

⁵⁹ Bál dakaate na/aay kuri hheehhe'eesár áy. Umuú geera kway tsattá wa slai a umuú baabuúwós Sakaria.

⁶⁰ Ala aayoorós iri ó', «Á'a, uma a kwisingeeká, umuuwós a Yohane.»

⁶¹ Kari báy, «Heé umuusíng i kaahh baraá mar'eefowoge.»

⁶² Tari dabár ilawaáts amór baabuúwós, áx inós umuú i slai a heemá.

⁶³ Peehhi gari firín, iri gawaadií gooín iri oó', «Umuuwós a Yohane.» Sleémeero adoodá' kari waa/oó/.

⁶⁴ Hamtidár kilae tsifraangós iri wanana'aát afkós axweesani gari ya/án iri axweés, Mungú gway xirfayeemiís.

⁶⁵ Múk yaamaá iisaapaydá' sleémeero tari da'ayuut, nee kaangwí aa tleehharuut sleémeero iri hardáh ay baraá yaamaá tlom'aá Yudea sleémeero.

⁶⁶ Muu sleémeero oo kaangwí gwa axaas, kuri baraá muner'ín i qaás, ta kaahi, «Na/aywí aluuwo a heé adoomá?» Asma /uuruú Aako i baraawós.

Aaru'uumár Sakaria

⁶⁷ Sakaria, baabuú Yohane kuri hatsiís Qeeruú hhoohhoó' oo Munguhe, iri aarín i kaahi,

⁶⁸ «Aakoó Munguú Israeli i xirfuuti, asma aa dír mukósií hardáh nguwa gweeri.

⁶⁹ Ba/amusmoorén oo /uuruú koóm ngwa sláy baraá tlahhoó lawaalmoowós Daudi wa ale,

⁷⁰ adoodaádá' ngira qaroó oó' ar afér aaruuseerós ar hhohho',

⁷¹ tiwa ba/amisi dír wakuuseerene nee baraá dabaá kudá' sleémeero atén ti ahhiita'a.

⁷² Baabi'iirén gina gurtleemuú wa ár, alqadoorós tidá' hhoohhoo' gari insláy,

⁷³ tidá' aa qaroó lo'ór wa /aáy dír baabuúrén Abrahamu tiwa tsuuqi,

⁷⁴ nee tiwa gweeri baraá dabaá wakuuseerene, nee kuwa sagadiyuusaan ar dae wasle,

⁷⁵ nee ar hhohhoaari nee ar hotaá ganaa'á' deelór slafingwrén sleémeerowo.

⁷⁶ Nee ná/aay, kuúng sleeme tu bay aarusmoó Kudá' Gáwtí dirií', asma geeraá Aako in hát, as luhuuwós kiwa amohhe'es,

⁷⁷ nee kángw ba/ama kuwa dír mukós i xu'utis ar tlakweemaaín kiwa gurtlay

⁷⁸ ar gurtleemuú Munguúrén. Kwí gwa/aateemaá dooraá dahhá' ngi dirén i hardahaas,

⁷⁹ as kudá' baraá giwtír i diriiá' nee kudá' baraá mahhtír gwa'ara ngiwa i gwa/aatiya', nee as atén tiwa gan'aasi baraá loohír amór waydií hardah.»

⁸⁰ Na/aydá' iri uráy, /uuruuwós iri doogín oo qeeru. Iri baraá darmuú wa hoót ay baalaadá' iwa amór múk Israelírí ti'iít.