Kolosai 4 - Biblía Axweesantá Hhohho' ar Mungú 2004

¹ Kuungá' daqaáre, lawaalerhúng muruú ganaá' ti tlehhite', nee tidá' inooín kiwa hariím. Slám xuaak gídaabá kuungá' sleeme Aako u koondá' gawaá dooriiwo.

Gurbu'uungw

² Kumiité' ló' wa ale baraá firooro, nee ta dal'a' baraá firooro nee baraá sluufaaywo.

³ Atén sleeme ti aleefiriiriinde' as Mungú pa/aangw nguwa haniisi, oo ya/abtoorós ar lu/aaroó Kristo kawa alki/iitaan. Lu/aaráywí an kudá' aníng tisa tseék.

⁴ Firiirimé' as aníng kángw lu/aaráywí nguwa axwees ar geehhooeema adoodá' aníng tiwa hariím.

⁵ sagalooa koomaak dír mukduú haratlintaaór koomaakahe, umuúqo pa/ángw taa sleeré' ar gadiyusaak.

⁶ Axweesanayhúng umuúqo daqto masók a axweesanoó tsatsaa'arén, nee oo gídaabár koóm, as umuúqo heewo oo gár yaahamiís, gaarós tidá' i yaahamiisi ngiwa tsaahhi ar hariima.

Intsihhiisani

⁷ Tikiko iidíguueé' sleémeero ngu oo' dirhúng i alé. Inós a hhiyaarén oo sla'aarusmo, slám a alee/iisusmoó inkihhimuú koóm. Inós i gadiyér Aakoó tleehh dinkwa nee atén.

⁸ Aníng nguna ya/aáw amorhúng i alé as kuungá' kangwrén sleémeero kuwa xua', nee inós nuwa gurkwa/asi.

⁹ Onesimo nee inós ti koná', hhiyaarén oo inkihhimuú koóm, slám a sla'aarusmo. Nee inós a heehúng. Inooín kángw diirí atén tay diriiaan kunguqo alki/iit.

¹⁰ Aristarko, kudá' taa tseék dinkwa nee aníng, kuungá' nu intsihhiimiis, nee Marko sleeme, hhiyoó Barnaba. Kuungá' kángw Marko ugwa qaroó sleeré' gídaabá birna hardáh ku ilaotá'.

¹¹ Yesu sleeme, kudá' ta babay Yusto, kuungá' nu intsihhiimiis. Inooínaaká' in gadiyér tleehhiyá' dinkwa nee aníng as waawuti'iimár Mungú. Slám aníng in ló'wa gurkwa/amiisiyá'. Dír kríshaanáydá' oo baraá múk Yahudiro heé gadiyuús dinkwa nee aníng i kaahh, aqo har kuká' tám kilooín.

¹² Epafra kuungá' nu intsihhiimiis. Inós a heehúng. Slám a lawaalmoó Kristo Yesu. Umuúqo daqto inós kuungá' nun aleeslaaqw baraá firooro, as kahhó' kuungá' tawa sihhita' nee tawa kwa/a' baraá haratlintaaooro, nee umuúqo gár Mungú i slai kawa tsahha' nee kawa eehada'.

¹³ Anuú kilá' un lamabu'uúm gídaabá i ló'wa daawiimiit as kuungá' nee as kudá' baraá Laodikiár i diriiá' nee slám awa baraá Hierapoli.

¹⁴ Luka, kuduú qwaslaarmo oo sla'aarusmo, kuungá' nu intsihhimiis, nee Dema sleeme.

¹⁵ Hhaeedá' baraá Laodikiár i diriiá' intsihhiisaak. Nee Nimfa intsihhiisaak, nee múk kríshaanáy kudá' baraá do'ós i burumbuuriimaamiít.

¹⁶ Barwaárí barkaa soomuús dirhunge, ka soomuusi sleeme dír múk kríshaanáy kudá' baraá Laodikiár i dirií'. Nee barwaádá' taa amor'ín i gooín kuungá' ka soomusá' sleeme.

¹⁷ Arkipo ku beera', «Gadiyeérók tidá' tinda haniís baraá Aakoowo ga/aaweek, as kawa boo/es.»

¹⁸ Intsihhiisantí ánuú Paulo ngina gooiím ar dakw'eé' oo kilá'. Ma gunqaruutara' gídaabá aníng taa tseék. Mungú kuungá' nu tsuuqi.