Kolosai 3 - Biblía Axweesantá Hhohho' ar Mungú 2004

¹ Kuungá' tunda al waaslee/atís dinkwa nee Kristo. Gawaá adoorihe muruuduú gawaá doori na leelehhiitaak, amoodá' Kristo i dirii'i, aa iwiít dákw doó /iyáy oo Mungú.

² Muruú gawaá doori na inslaslaawaak umuú siiwaro, ala a muruú baraakaá yaamuuwooká.

³ Asma kuungá' aga qatlé' nee slafingwhúng kwaa luú/ dinkwa nee Kristo baraá Mungú.

⁴ Kristo a slafingwhúng oo ló'. Inós bál binda male geehhooúy, kuungá' daqaní a geehhoouurá' dinkwa nee inós ar baraá xirif.

Slafíngw aáng nee slafíngw /abén

⁵ Gawaá adoorihe kuungá' ilatleerír slaqwa gaasaak, dinkwa nee tlehhmi'iiwós sleémeero, adór tsaatu'uuma nee slasla/aareema, nee ilatleerír tlakw nee inslawoó tlákw, nee da/i. Asma heé da/itá koóm, a heé munguaá hatlá' haratlintatií'.

⁶ Gawaá adoorihe sakwasleemár Mungú nin hardát dír mukdá' inós gu iilooeemisaaká as muruuwí.

⁷ Tam kuungá' kilá' aáng ana hoté' nee múk adór kwí, qoomár slafingwhúng kuwa baliiti nee ilatleerír adór tí.

⁸ Ala daxta kuungá' muruuwí sleémeero hingeesaak dirhunge, buhhta nee xarasleema, nee magoót nee daanda axweesani, nee /ooslisliingw.

⁹ Kuungá' kiloohúng miti lamtí tlaaqara'. Asma kuungá' munerhúng tidá' ar aáng aga warqesé', dinkwa nee tlehhemi'iiwós kudá' tlakwe.

¹⁰ Munér /aben kari sleeré'. Muneerí /aben baraahunge ka /abeemiis umuú daqto nee Mungú, tleehharusmoowós, ar slaqsoó Mungú. Gawaá adoorihe munerhúng in kumít Mungú nguwa tsaahha hhe'es.

¹¹ Ala baraá slafingwí /abene, barqaanti i káhh dír heé Yahudiro nee heé Yunaniro, laqaá dír heé taa al/uútl nee heé taa al/uutliiká, laqaá hoomo, laqaá heé iimiboó/, laqaá lawaalmo nee kuduú lawaalmoowooká. Ala Kristo inós a mura' sleémeero nee i baraá muu sleémeero.

¹² Kuungá' a múk Mungú aa tsawaár, mukós oo hhohó' oo i slai. Gawaá adoorihe muunuú gurtleemu koomaak, nee hhooeema, ti kiloohúng niinaweemise', nee tsatsaa'areema koomaak, nee qiqtliingw.

¹³ Kuungá' kiloohúng ti sa qiqtliinde', nee ti gurtlatleere' hee bar kuqá' gwa sa dakuús. Gár kuungá' tunduwa hariím a tin kiloohúng gurtlatleerá' adoodá' Aako kuungá' nura gurtláy.

¹⁴ Ala ak aleeró ti sla'aslae', asma sla'aari an gár mura' sleémeero gu haragaamiis ar baraá wakleeli'iimár ganaa'.

¹⁵ Nee wayduú Kristo i baalin baraá munerhunge, asma kuungá' tunduna ateét as wayduuwí qoomár tunduwa diqoó slaqwtá wák tleéhh. Slám kuungá' masók a múk sluufoó koóm.

¹⁶ Axweesantá Kristo masók i baraahúng wa hót ar yaareema. Ti intsaahhatimise' nee tiwa naanaqa' ar sagalooa sleémeero. Mungú sa daa'aak ar sluufaay baraá munerhunge ar daa'ángw bara/, nee oo sluufaay, nee ar daa'ángw baraá qeeru.

¹⁷ Nee umuúqo gaaro ar ta tlehha'a ar axweesani laqaá ar tlehhma, sleémeero ka tlehhá' ar umuú Aako Yesu, nee Mungú Baabá kuwa sluufmisa' ar inós.

Hotángw heé slafíngw /abén gwa slay

¹⁸ Kuungá' tlaáwaay, hhawaateehúng ilaiwawa/aak, adór kuungá' tunduwa hariím baraá Kristoowo.

¹⁹ Kuungá' hhawaáte, tlaawayhúng sla'asla'aak, slám mu buhhtimiisara'.

²⁰ Kuungá' ná/ii, xwaylitérhúng ilaiwawa/aak baraá mura' sleémeerowo. Asma adoorí Aako gu sla'atimis.

²¹ Kuungá' xwaylité, na/iihúng mi buhhtimiisara', as matawa mune sií' as axweesanayhúng.

²² Kuungá' lawaále, daqaarerhúng tidá' ta sagadiyusa', ilaiwawa/aak baraá mura' sleémeerowo. Kuungá' masók a adór lawaaleedár ilaá maaqumisaaká, tidá' ti tawó sla'atimis dír múk i alé. Ala masók an gadiyusá' ar muunuú /awaák, as adoodá' kuungá' Aako kuwa ilaiwawa/a'.

²³ Umuúqo gaaro ar ta tlehha', tleehhaak ar muunuú /awaák. Masók a adór lawaalér Aakoó sagadiyuus, ala ar mukooká.

²⁴ Kuungá' a xuá' gídaabá slaasláwarhúng ar aali a sleerá' dír Aakoowo. Asma Aakoó ta sagadiyusa' a heewooká, ala an Kristo.

²⁵ Ala umuúqo heewo oo tidá' ganaa' gaa tleehhiiká, inós slaasláwarós ar hariim gan sláy, slám ar barqaanti wasl.