ISAYA 9 - Biblía Axweesantá Hhohho' ar Mungú 2004

¹ Ala yaamuudá' aáng giwtír ma/ami aa ót nee gurhaami i adoodá' i meetiaaká. Aáng Mungú yaamaá Sebuluni nee Naftali gina amoqwaareés, ala deeloorí tseewe yaamaá gayuú Yordani nee Galilaya kudaá' yaamaá múk xoordu iwa hootiya' gin xirfayees.

Waawutmoó aluúwaá hardáh

² Mukdá' baraá giwtír wa hi'imaamiít gwa/aateemaá yaariir kaa ár. Mukdá' baraá yaamaá ma/amír wa hoót, kwaa i gwa/aát nee gwa/aateema.

³ Kuúng, Mungú, xooro aga urés kay qwal/atisa hhe'és. Muu geeraawoge in qwalalaa/, tan qwalalaa/ adór qoomár bu'uungw, adór múk haasaáng qasmiís.

⁴ Asma taaqwanay'ín kudá' iló', kudá' taa gawaá sum'ii'ínií tsegiít nee hhartadár baramaanuuser'ine iga giqeér, adoodá' múk Midiani aáng kura bál.

⁵ Asma xooslaá slaqwara sleémeero awa hee i kon qoomár slaqwaraaro, nee tlabaá taa baraá tseereérár tiloók, kaa amohhe'eés kiwa hhaamisi, i migír tleehhitiyá' oo ta ásltár oohisi.

⁶ Asma na/aay kwaa xwaylúy as atén, na/oó garma kunguna haniís. Inós aleesleemuú waawuti'iima gu kón. Umuuwós kuri bay, Hara'ayusmoó waa/oo/amo, Munguú /uuruú koóm, Baabuú alhhe'eesay wásl, Waawutmoó Wayda.

⁷ Axweesanoó aleesleemuú koóm nee wayduuwós i alhhe'eesoó kon'aaká, baraá kitángw Daudi oo Aleesleemu nee waawuti'iimarós, Gin gawdees nee gin kumitiis ar sakwasleemár ganaa' nee hotaá ganaa'á', iimír hamí ay alhhe'eesay wasle. AAKOÓ MUNGÚ Aleesleemusmo adoorí gan tleehh.

Mungú múk Israeli gu muux

⁸ Aako /aymu guna oó' dír Yakobo, iri hardáh dír Israeli.

⁹ Muu sleémeero gari xuu', múk tlahhoó Efraimu nee kudaádaá' yaamuloouusér Samariawo, ala kudaádá' axweesá' ar daara/aangw nee ar taqanaa/i. Inooín i kaahiyá',

¹⁰ «Matfali i huhu'uún, ala atén gár nir tleehhitaan a tlaa/aá taa hhaásl. Maraá waqasuú /aantsí kaa hhitín, ala kitaangose in tlehhitaán ar waqasuú sahhta.»

¹¹ AAKOÓ MUNGÚ múk gi tlampa'amiís ngu huuw, nee gin wakuuser'ín i /agis.

¹² Bihhaá da/aawe a múk Aramu, bihhaá /uwaawo a múk Filisti, afer'ín sleémeero ngaa awaatliyé' as Israeli ngiwa gu/iya'. Tam adoorihe muneerós aa baráy ki/ká, tam hamí dakós i loloqoosárí kaahh.

¹³ Tam muu gwaa muxi, ala taa amoorós i ki/iiká, AAKOÓ MUNGÚ Aleesleemusmo sleeme ngwa leelehhi'iiká.

¹⁴ Asma AAKOÓ MUNGÚ baraá guruú looár wake, múk Israeli gun sage nee hhayshe tlaaq, halmír slaansli nee gitsooro.

¹⁵ Sage an bariisér ilaiwa/amér koom, hhayshe an aaruuseedá' lamtá intsaahhatimisá'.

¹⁶ Mukdá' mukwí gwa intsaahhatimis, nguna hhitiné', tam kudá' taa geeraharahaár nee inooín sleeme tari qwaár.

¹⁷ Gawaá adoorihe, Aako masoombar'ín ga gurtlayká, sleeme i gurtleemuú konká dír panaay nee kwaeeliiwo. Asma heé Munguú ilaiwawaá/ i kaahh, umuú heewo a lamusmo. Tam adoorihe muneerós gaa gu/iiká, tam hamí dakós i loloqoosárí kaahh.

¹⁸ Tlakweema na oohiyé' adór asltá fuquroó /aay nee laqayaawo, adór asltá baraá gara, quuír ilo' in gáwtí tsa/a/aán.

¹⁹ Ar buhhtaá AAKOÓ MUNGÚ Aleesleemusmoowo, yaamu kaa daá/ ar asla, nee muu a adór migiruú asla kar oohisi. Tam heé hhiyaawós gu gurtlatláw i kaahh.

²⁰ Bihhaá wák kin hayoohín, sleeme ta bu'umitiiká, bihhi kaariya' kin /aay sleeme ta axinká. Umuú heewo in hhiyaawós baramaanuus.

²¹ Manase i Efraimu i slaaqw, Efraimu i Manase i slaaqw. Inooín tsaraawo ta Yuda i slaaqw. Tam adoorihe AAKOÓ MUNGÚ muneerós gaa gu/iiká. Tam hamí dakós i loloqoosárí kaahh.