ISAYA 8 - Biblía Axweesantá Hhohho' ar Mungú 2004

Garmoó Isaya tawa laya dír muko

¹ AAKOÓ MUNGÚ aníng iri báy, «Peehhír yangaariir taatahheek, /aymi'iiká' gawaadá' i gooiimeek ar kalaámu, ar adór soómaro kiwa inslaáhh, ta o', «Maher-shalal-hash-basi.» (Gídaabaárós a gaanslár hayoheek, adaá ar tlaweek.)

² Naagáy tiri lamabu'uusér tsár ii sláw ar inkihhimuú koom, ar án i lamabuu' daanduú kangwdae, kaahamusmo Uria nee Sekaria garmoó Yeberekia.

³ Aníng niri qaát nee harer'eé' tidár aaruso'o, iri tsít, na/oó garma gway xwayluúr. AAKOÓ MUNGÚ aníng iri báy, «Na/aysíng umuuwós a ‹Maher-shalal-hash-basi.› » (Gídaabaárós a: Gaanslár hayoheek, adaá ar tlaweek.)

⁴ Asma dír na/aywí axweesani ngira aleeslayká, daqaari'iimár Damasko nee haasaánguú baraá Samariár daáhh kin huuw amór waawutmoó Ashuru.»

Hardahamú waawutmoó Ashuru

⁵ AAKOÓ MUNGÚ aníng iri malé báy,

⁶ «Asma mukwí ma'aá Shiloa kudá' tseegisárár wa/amiimá' ngina si'iyé', inooín Resini nee garmoó Remalia ngina saqwala/iyé',

⁷ gawaá adoorihe, ga/aawaak Aako inooín gin ma'aá yaaér Eufraterí wa/as, kudá' yaariir /uuruú koomá'. Waawutmoó Ashuru nee xirfuuwós sleémeero gin i haratláy giri almilala/aat adór ma'aá yauú wa ale.

⁸ Wakusmo nin gaanslár dah baraá yaamaá Yuda, yaamuudá' gi dalaa/ adór ma'aá yaaér Eufrate, kudá' yaamu ngi almilala/amiitá', inós hhampi'iiwós birnga gweér yaamuuwók sleémeero ngin tuuntukiyá', aá Imanueli.»

⁹ Kuungaá múk xoordu tundu giqáy, tunduri amoqwaarees. Iia qaasaak, kuungá' sleémeero awa ayeemaá sawen baraá yaamuwo Ti amohhe'ese' as tunduwa amoqwaareesi, ti amohhe'esé' as tunduwa amoqwaareesi.

¹⁰ Áx ti kiloohúng hara'ayiinde' ala nuqo gaa wa bu'ká. Tam ado a qoomeesa'a, ala ar ya/aam i káhh. Asma Mungú i dinkwa nee atén.

Mungú iwa aarusmoó gurbu'un

¹¹ Asma AAKOÓ MUNGÚ aníng ina i axweés, iri óh ar dakós oo /uuruú koóm, as loohír mukwí mawa eehár, ina gurbuú' iwa kaahi,

¹² «Miti haragaasara' nee mukwí baraá kaahir'ine, tam muruudá' inooín i da'ayumitiya', kuúng mu da'ayumitaar, laqaá ma xurumitaar.

¹³ Kuúng án kilooeé' na tsaahháng, AAKOÓ MUNGÚ Aleesleemusmo, tiwa hhoohhoó'. Án kilooeé' na ilaiwawa/áng nee na da'ayumitáng.

¹⁴ Aníng a dirók tidá' hhoohhoo' ar guwaay, sleeme aqo adór tlaa/anoó dukuutsmo, tlaa/ár waawituú Israeli i huhu'un nee oo Yudawo. Aníng a tsaaxweelír yaamuloouusér Yerusalemu ga ohiim.

¹⁵ Múk yaariír ta dukuuts tari huhu'ún tari naasumiit, tsaaxweelirí gin ohiín kiri ar tláy.»

Múk giaá yaahamiís kuwa naanaqan

¹⁶ Lamabu'uungwí tseegeek, harmagahheek, daqaní tari dabér hota dír eeharuuser'eene.

¹⁷ AAKOÓ MUNGÚ un daamaaraám, kudá' aa nahhaat dír xwaylár Yakobowo, inós un harahhiíf.

¹⁸ Ga/aaweek, aníng nee na/iiká' AAKOÓ MUNGÚ naa haniís a laya nee waa/oo/amo baraá Israeliwo ar amór AAKOÓ MUNGÚ Aleesleemusmoó daáhh, kudá' gawaá tloomár Siyonír hoót.

¹⁹ Nee qoomár burna bayé', «Tlawé' gi'i yaahamisuú awaak, nee muruú /ayma'aá mululu'uúm adór tsir/o, asma i qoón muu munguii'ín ngiwa yaahamisiya', nee múk aa qaatl kuwa yaahamiisi as múk slaáf.»

²⁰ Ala kuungá' inooín ki beera', «Gár Mungú kuungá' nuwa intsaahhatamiisi na iiárií qaasaak, gi'i mi iiárií qamimara', asma gár hhoo' ngi aain'aaká.»

Qoomár slahh'amu

²¹ Muu baraá yaamuwo tan tawo tambeeruus, taa ló'wa amoqwaár, slamí qwariitiyá'. Slám bir qwariitiyá' mune gaa farkiín amór waawutmooín nee munguine. Tan gawaá doorí qaytsiit,

²² ga/aawaak, tam yaamu kiri xuuxuu', ala gár ta ari aqo slahh'amu, nee giwti nee ma/amír aa qipit, inooín kiri tliwii/ baraá ma/amír hhamhhám.