ISAYA 7 - Biblía Axweesantá Hhohho' ar Mungú 2004

Waawutmo Ahasi kuwa i ya/abín

¹ De'emaá waawutmo Ahasi garmoó Yotam, garmoó Usia, tawa waawutmoó Yuda, qoomaadae slaqwara nina /awuúr. Resini waawutmoó Aramu nee Peka garmoó Remalia, waawutmoó Israeli, gixsár Yerusalemu kana i haratláy, ala ngaa hayohi'iiká.

² Qoomár múk Yuda kuwa kaangwí báy, adór múk Aramu nee oo Efraimu tara aldinku'uumiís, muunuú waawutmo nee munér muko iri daaráx adór xaa'aá baraá gara fur'a ngir diingimaamis.

³ Ala AAKOÓ MUNGÚ Isaya guri báy, «Gimáy tláw, Ahasi al aweek, kuúng nee garmaawók Shear-yashubu, didár hhuuntsito alhhe'eesoó maparidár ma'aá huwahuuw amór gáwtá wa ale,

⁴ ku beeto, gám magaáhh, xasliít, ma da'ayumitaar sleeme ma munesiaar as buhhtaá Resini waawutmoó Aramu, nee awa garmoó Remalia. Kuká' tsaraawo a adór quuír migír ar gwaa'.

⁵ Múk Aramu nee Peka garmoó Remalia, dinkwa nee slaqwaruusér Efraimu taa tsabín kuúng uwa gár tlaákwí tleehhiya', ta kaahi,

⁶ ‹Gusé', yaamaá Yuda i i haratlawaán, muu u dae tsataán, yaamuuín i hayohaán, garmoó Tabe'eli nguri waawutmooín wa qaasaán.›

⁷ «Ala anuú Aakoó MUNGÚ tí an káh, ador'ín tidá' i baloó ya/andaaká, sleeme i baloó tleehharutká.

⁸ Asma ságw Aramu a Damasko, nee oo Damasko a Resini, (nee baraá kureeraá mibeeraá lahhoó' nee kooane Efraimu in qeqtín, as miwa baloó tlahhoó muu tleehhiít.)

⁹ Slám ságw Efraimu a Samaria, nee ságw Samaria a garmoó Remalia. Barnaxes a haratlintatia'aaká, looeemaawo a gawdura'aaká.»

Layár Imanueli

¹⁰ Slamí AAKOÓ MUNGÚ Ahasi guri báy,

¹¹ «AAKOÓ MUNGÚ, Munguúwók firimeek, laya ngiwa laqan ar baraá giaá daahh laqaá ar doori.»

¹² Ahasi guri mu/aywaáts, iri oó', «Laya a firimaaká! AAKOÓ MUNGÚ nguwa iiar a sla'aaká.»

¹³ Isaya iri malé oó', «Iia qaasaak, kuungaá guruú doó Daudi! Dirhunge a gár niináwe muu kuwa slaaqatamisa', ahaá, mas Munguúeé' slaaqatisár wa sla'á' sleeme?

¹⁴ Gawaá adoorihe, Aako laya ngi kuungá' i haniis, /amaatliito'o i tsít, na/oó garma gu xwayluúr, nee gu umií tsát gu beer Imanueli.

¹⁵ Inós ilwaá oonganáy nee danuhe gin /aay, ay dír muruú tlákw ngway xui si'imaawo, nee oo hhó' tsawaararo.

¹⁶ Asma dír na/aywí muruú tlákw si'imaawo ngura aleeslayká nee oo hhó' tsawaararo ngura aleeslayká, yaamaá waawitáwí tsár ta daiimit in xaanxay tleehhitiyá'.

¹⁷ AAKOÓ MUNGÚ kuúng nee mukoge, nee múk doó waawutmo sleémeero, nun slahh'amuú yaariír huuw, oo adór kuduú múk Efraimu nee oo Yuda tiwa paraatliyé' ba/a, nun waawutmoó Ashúrúrí tleés as nuwa i haratlay.»

¹⁸ Qoomaarihe AAKOÓ MUNGÚ muu gun ateet ar fitseeliingw baraá yaamaá Misrírí ale, nee iimír yaaér Nili wa ale, nin hardihiyá' adór ba'ár. Nee múk Ashuru nin hardah adór ba'ari iimír ayaaín wa ale.

¹⁹ Inooín nin hardihiyá' xatstadá' gaa wasl ngiri al'iwiitiyá', nee baraá mar'ór tla/u, nee gawaá laqaya' sleémeero, nee gawaá qawtanaay sleémeero.

²⁰ Deeloodae Aako deeqwa gan leehh gayuú yaae amór waawutmoó Ashuru, sagerhúng gari deeqw nee daamoode nee se'éngw gawaá ya'aawo.

²¹ Qoomaadae hee damár buka gan de'én nee bee/ángw tsár.

²² Asma hikwaaká' i ló'wa ilwaá koná', inós oongonoó ilwa guri wah. Panaydaá meet baraá ayko oongonoó ilwa nee danuhe ngiri /ayiyá'.

²³ Slám baalaadae qamaá sabiíbu awa kume kudá' tlaxor'ín kumuú wák oo shekeéli, nin deeli tleehhitiyá', fuquráy nee laqayaawo ngiri altlayá'.

²⁴ Umuú heé baraadá' kawa, aqo ga/ale nee maheeriwo gin huuw, asma yaamu sleémeero naa hatsiyé' fuquráy nee laqayaawo.

²⁵ Tam gongoamaadá' aáng ta doslasliti laqaya' nee fuquráy ngin wa ti'iitiyá', tam heé amoodá' keemuuwo ga qiítl i kaahh, as iwa fuquroó da'ayumiti nee laqayawo, ala yaamuuká' tay tleesantá hikwa nee bee/aangw.