ISAYA 65 - Biblía Axweesantá Hhohho' ar Mungú 2004

Múk aa dee/anuut Mungú gu muux

¹ «Aníng taa amohhe'eés tiwa slaawaan nee kudá' i yaahamisa'aaká, aníng taa amohhe'eés tiwa sláy nee kudá' i leelehhita'aaká. Aníng xoorduudá' i firirima'aaká ngiri báw, ‹Aníng a diirí, aníng a diirí!›

² Aníng dabaaeé' ina laqaqaám tlatla/aangw sleémeero dír mukdá' a dee/aanuut. Kudá' lohdaá qooma'aakár hootá' kudá' sager'ín kilós ngi /ayá'.

³ Mukwí an múk aníng i hayloórí lehhiít umuú daqto dír geeraaeene ilahhooár muruú ta tsu/i hanmiisiyá' baraá asalmaá wa ale mooyángw tsuú' ngu da/aa/aná' gawaá matofaali.

⁴ Inooín nin baraá /antuú iwaawitiyá' nee xweeraawo in wa/ángw naaqór i dirii'iyá'. Inooín fu'unaá baynamo ngin /ayiyá', ma'aá fu'unaá muruudá' ta waki in baraá xooslu.

⁵ Inooín muu ngun babaya', ‹Amoosíng saaw i sihhiteek, mindi diirí tseewuwaar, asma atén ti hhohhó' ta kuunge.› Múk adór kwí a adór quui baraá dungaeene, a adór asltá oh umuú baalaaro.

⁶ Ga/aawaak, tí kaa gooín dír geeraaeene, aníng a baloó xaslitaaká, ala tí aqo an buú' dir'ín.»

⁷ AAKOÓ MUNGÚ i kaahi, «Tlakweemaaín nee awa baabi'ii'ín in dinkwaárí buú'. Asma inooín mooyángw tsuú' nguna gawaá tlom'ií wa da/a/ané', ina gawaá gongoamoó wa /ooslisliné'. Aníng qoomoó haáts un dir'ín i qoomeés, kin buu' as tlehhmi'ii'ín kudaá aáng naa tleehhiyé'.»

⁸ AAKOÓ MUNGÚ i kaahi, «Adoodá' /aroó sabiíbu burkwa sláy tari ooi, ‹Mu hhaamiisaar asma tsuuqa i dayá' baraawose.› Gawaá adoorihe, aníng adoorí kilá' an tleéhh asma sagadiyuuser'eé'. Án inooín sleémeero i baloó qwaareesaaká.

⁹ Na/ii ki laqwaal doó Yakobowo nee dír doó Yudawo aaliitmoó tlom'ieé' ni ti'iit. Kudá' naa tsawaár i aalín nee sagadiyuuser'eé' i baraadií hotaá eér.

¹⁰ Yaamaá Sharoni tari dír qawór bee/aangw nee xatstá Akoni tari dír hikwa i tlahhamisiya', as daanduú muk'eé' kudá' iga leeleehh.

¹¹ Ala kuungaádá' AAKOÓ MUNGÚ ugwa sie', kudá' tloomar'eé' tidá' hhoohhoo' aga gunqaarese', kudá' muruú /ayma ngwa amohhe'eese' dír Munguúdá' ta bay ‹Gitsee/aá Hhooá'.› nee kudá' slooqomo ngu hatsimiisá' difaáiro as Munguúdá' ta bay ‹Gitsee/aá Tlaakwá'.›

¹² Aníng aga qoomeés tunduwa tsu/i ar paánga sleémeeró tundun tsuú/. Asma qoomár nuwa ateetiim, aga ooindi'iiká qoomár niwa axwees a axamisa'aaká. Ala kuungá' muruú tlákw una tlehhé' dír geeraaeene, nee tidá' aníng i sla'atimisaaká kari tsawdé'.»

¹³ Gawaá adoorihe, Aakoó MUNGÚ i kaahi, «Ga/aawaak, sagadiyuuser'eé' i /ayiín, ala kuungá' qwari nu tsuu/. Ga/aawaak, sagadiyuuser'eé' i wahaán, ala kuungá' waxe nu fák. Ga/aawaak sagadiyuuser'eé' i qwalaalá/, ala kuungá' tundu mureekees.

¹⁴ Ga/aawaak, sagadiyuuser'eé' in dá' ar munér qwala/, ala kuungá' a /aa/amiindá' ar munér slahhahhaa', tari tsuunqumisá' asma slahh'amuú qeereemoohúng.

¹⁵ Mukdá' naa tsawaár umerhúng ganar lu'umis nee Aakoó MUNGÚ kuungá' nun tsuu/, ala sagadiyuuseerós gan umuú /abén i tsaat.

¹⁶ Gawaá adoorihe, umuú heé ti kilós tsuuquúm baraá yaamuwo ti tsuuqi ar umuú Munguú ló'. Nee heé lo'ór /aáy baraá yaamuukae, lo'o ngi /ayi ar umuú Munguú ló'. Asma slahh'amaayér aáng aa qaroó gunqaarút, dír ilaaeene kaa qaroó luú/.»

Dooraá /aben nee yaamaá /aben

¹⁷ «Ga/aawaak, dooraá /aben nee yaamaá /aben i tlehhiít, muruú aáng ku male inslayká, sleeme u iitleesaaká.

¹⁸ Ala qwalaala/é' nee baraa/é' daqisleém as daanduú tí ni tlehhiita. Gixsár Yerusalemu a gixsár bara/ tleéhh, nee mukós nguri múk qwalalaá/ tleéhh.

¹⁹ Aníng Yerusalemu an saqwalalaá/, nee muk'eé' un sabaraá/. Baraadae afór tsuunqumis ka baloó axasiiká, nee /aa/aá slahh'amaaye i baloó ki/iaaká.

²⁰ Gwa'arár na/oó qawri i baloó ki/ká. Laqaá bariise sleeme i qatlká qoomar'ín bira xeeriiká. Heé kureeraá tsiiruú wák bira gwaá' adoorihe an na/aay. Ala heé tlaákw oo kureeraá tsiiruú wák gaa ay kwaa lu'ús

²¹ Muu maraay gin tleehh tari baraadií hotaá áy xaa'aá sabiíbu kin dahaas, mamuuín kiri /aay.

²² Inooín maraay ngi tleehhiaaká as múk hatlá' ngiwa i hotaá ay, laqaá balaangw ngu dahasiaaká múk hatlá' guri /aay. Asma muk'eé' kudá' naa tsawaár, kureeraá yaariir kin ló'wa hoot, adór kureeraá xaai i hotatina'. Muk'eé' oo naa tsawaár gadiyér dabaaín ngin saqwalaala/iyá'.

²³ Inooín gadiyér tawo ngi tleehhiiaaká, laqaá na/aá qatlá' ngi laqwlina'aaká. Asma inooín an xwaylár taa tsuúq nee AAKOÓ MUNGÚ. Inooín nee xwaylar'ine kaa tsuúq.

²⁴ Dír aníng ira firini'iiká in geerií mu/aywaáts, tam qoomár barta baraá axweesántií dirii' aníng in iiárií qaás.

²⁵ Tawer nee bee/aangw tari alqáy, direeri gitso ngin adór hikwaá wa /ayiyá' nee dayshe hhape gan /ák muruú /aymár wá ale. Gawaá tloomar'eé' tidá' hhoohhoo' sleémeerowo, makiito'ór ta slahh'eesi laqaá ar ta gaasi i káhh.» AAKOÓ MUNGÚ tí gan kah.