ISAYA 64 - Biblía Axweesantá Hhohho' ar Mungú 2004

¹ «Ahaá gár kuúng doori ngis feehhiská niri yaamií awét, as tlom'i niwa daaraxiya' kuúng bura ariyé'.

² Adoodá' asla xwaansláy ngur /aa/ak, nee adór asla ma'aay ngir dahhamaamis, as umuuwók kuwa tsaahhi nee wakuuseerók nee xoodu ni daaraxatiye' kuúng bura ariyé'.

³ Qoomaadá' kuúng muruú waa/oo/amo kudá' taa harahhifaniiká kuwa tléhh, niwa yaamií awét tlom'i niri daaraxatiyé' kuúng uwa ariyé'.

⁴ Iimír aange Munguú hatlá' ugwa araniiká laqaá ugwa axaasaniiká iaawo slám Munguú adór kuúng oo taa ár ilaawo i kaahh, kudá' muruú waa/oo/amór tlehhiít dír kudá' inós ngu harahhifa'a.

⁵ Kuúng mukdá' hotaá ganaa'á' gi ar hoót nee gi saqwalalaá/ un ilaaót, kudá' kuúng u inslaslaawá' nee lohduuwoge. Ga/aaweek, tina i gahhát qoomár tawa múk tlakuuse. Atén ana dee/anutaán afiqoomár yaariire. Axáy tiqo ba/amísa?

⁶ Atén sleémeero a adór múk taa meetagaás, nee hotaarén awa ganaa'á' a adór tlabaá slasla/aren, atén sleémeero aga /ootsaán adór gitso, nee tlakweemaarén a adór fur'ár atén ti ar tlatlaw.

⁷ Heé kuúng u fiririím i kaahh tumu wák, nee heé naagamiís kuúng leelehhtuuwo i kaahh, asma kuúng aga atén wa nahhát hám daxta taa baraá tlakweemaarén i meér.

⁸ Hám daxta AAKOÓ MUNGÚ, kuúng an baabuúrén, atén an tleei, kuúng an tleeusmoorén, atén sleémeero a gadiyér dabaawók.

⁹ Aá AAKOÓ MUNGÚ, kuúng ma ló'wa buhhaar, nee tlakweemaarén mi inslaslawaar ay daqisleém. Ga/aaweek, tí aldakweek, atén sleémeero a mukók.

¹⁰ Gixsaduuwók kudá' hhohho' naa darma tleehhitiyé' Siyoni aa darma tleehhít, Yerusalemu aa deewá'.

¹¹ Doorén kudá' hhoohhoó' nee oo taa parootuús, didá' baabi'iirén kuúng uwa xirfayemisiyé' kaa daá/ ar asla. Wa/ameerén tidá' sleémeero sla'atimiis kaa taangu tleéhh.

¹² Aá AAKOÓ MUNGÚ, baraá muruuwí sleémeero kuúng aqo tin kilók ilá/a? Xáy, kuúng aqo an dirók i qartlíta atén tiri ló'wa slahh'eemís?»