ISAYA 63 - Biblía Axweesantá Hhohho' ar Mungú 2004

Arba/atír Mungú daanduú xoorduuwo

¹ «Heewí a heemá oo Edomúr daáhh? Kwí Bosrár daáhh oo tlabaawós tseere aa leér. Heé tlabaá xirif ngaa dahaas a heemá? Kuqá' a heemá oo hi'iít ar /uuruwós oo yaariír?» «A anuú AAKOÓ MUNGÚ kudá' gan'amuú káh, kudá' aleesleemuú ba/ama gu koóm.»

² «Ahaá waáy tlabaawók miski da/aten, miski da/aten adór kuqaá heé sabiíbuú tsoo/iít?»

³ «Aníng sabiíbu una kilooeé' kal/aám baraá tla/ángw muko heé aníng iga alee/iis i kaahh. Aníng xoordu ina kal/aám ar buhhtaaeé' nee ina nakaa/arúw ar xarasleemaaeé'. Tseerduuín naa tsinqamaamitiyé' baraá tlabaaeé', tlabaaeé' sleémeero naa ló'wa slasla/aruuruyé'.

⁴ Baalár ngiwa li/áy buu' aga ístí tsaát, nee kurkueé' oo ngiwa gweer naa hardáh

⁵ Ana qaytsiít naxés heé aníng iga alee/iis i kaahh, ana waa/oó/ asma heé aníng iga tuu/ i kaahh, aluuwo arba/atir'eé' ana dakw'eénuú kilár sláw, nee buhhtaaeé' ina alee/isiyé'.

⁶ Aníng muu una yaamií naka/aruurúw ar buhhtaaeé' inooín ngiri xufitiís ar xarasleemaaeé'. Tseerer'ín ngiri yaamií ku'uús.»

Hhooeemaá Mungú dír múk Israeli

⁷ Sla'aarír warqawaaká ar AAKOÓ MUNGÚ an alki/iít, xirfuú AAKOÓ MUNGÚ un oiím, ar har qoomoó muruudá' AAKOÓ MUNGÚ naa atén i tlehhiít, nee hhooeemadá' yaariir aa tlehhaahhiít dír múk Israeli, kudá' a tleehhaahhiít ar harqoomoó gurtleemuuwós, ar harqoomoó yaareemaá sla'aarírós ar warqawaaká.

⁸ Asma inós ina oó', «Looeemaawo mukwí a muk'eé', na/iieé' kudaá al/aymuuseerooká.» Nee inós tari ba/amusmooín.

⁹ Baraá slahh'amaayer'ín sleémeero inós kuna slahh'eemiís, nee malaykamooduú dír geeraawós inooín gina ba/amís ar sla'aarirose nee ar gurtleemuwose inooín gina gweér. Iimír aange inooín gina loohiís nee gina gagaraarín.

¹⁰ Ala inooín tana dee/aanuút, qeeruuwós kudá' hhoohhoó' nguna gurhaamír ar ayé'. Gawaá adoorihe inós iri warqáy tari wakusmooín, inósuú kilá' iri amor'ín i muxuút.

¹¹ Aluuwo mukós de'emaá aáng gina insláy, kudaá sagadiyusmoowós Mose. Inooín tari oó', «Kudá' de'eemuusér bee/aangós gaa waarahhaas tlawto i amá? Kudá' Qeeruuwós oo hhoohhoó' gwaa baraá tla/angw'ín i qaas gaálaay?

¹² Inós handá' ar /uuruuwose tlehhma'aá waa/oo/amo gina tleéhh ar dákw Mose. Kudá' tlawi gaa dír geeraaín wa tla/a tsaat as tiwa umuú alhhe'eesay wásl i slay.

¹³ Inós inooín gina geerahaár baraá iloodá' sawene, adór faraásír baraá xaanxaay, tam ya'aaín ngaa tunqala/ani'iiká.

¹⁴ Adór hikwaá taa huúw baraá qawtantá baraá xatso. An adoodá' qeeruú AAKOÓ MUNGÚ mukós ngura hungu/uús. An adoodá' kuúng mukók kura geerahát nee umuuwók xirif gway sláy.»

Firór as gurtleemu nee alee/isaay

¹⁵ «Gawaá doorí wa qaytsitáng nee ka aán, iimír dirók tidá' hhoohhoo' nee didár hotaawók ar xirfuú kooma. Ahaá da/itók tidár sla'aari nee aleesleemuwoge i amoomá? Sla'aarirók nee gurtleemuwo kaa ilaá/ dir'eene.

¹⁶ Asma kuúng an baabuúrén, tam Abrahamu atén ti xuiikahe nee tam Israeli ti tsatsahhankahe. Kuúngú AAKOÓ MUNGÚ an baabuúrén, kuúng an gweerusmoorén, iimír aange umuuwók an kwí.

¹⁷ Aá AAKOÓ MUNGÚ, ahaá waáy atén misti paslmís baraá lohduuwoge, muneerén masa gawdeemís kuúng uri ilaiwawa/anaaká. Ki/áng as daanduú sagadiyuuseerók. As tlahh'iidaá aaliirók.

¹⁸ Mukók kudá' hhohhó' har qoomár niinawe yaamu gina aál, ala wakuuseerén niri hardát, dirók tidá' hhoohhoo' kari yaamií kalaá/.

¹⁹ Atén a adór múk kuúng taa baloó sawaawuti'iindiiká, a adór múk taa umuuwók ar ateetiiká.»