ISAYA 60 - Biblía Axweesantá Hhohho' ar Mungú 2004

Xirfuú Yerusalemúr /aben

¹ Tlawáng, gwa/aát, asma gwa/aateemaawók naa hardihiyé', nee xirfuú AAKOÓ MUNGÚ ugwa i gwa/aát.

² Asma ga/aawaak daanduú yaamu ku tuuntuuk nee giwti. Ma/amír hhamhhám muu gu tuuntúk. Ala kiíng gwa/aateemaá AAKOÓ MUNGÚ i i gwa/aatiyá', xirfuuwós ku ar diroge.

³ Xoordu ni hardihiyá' dír gwa/aateemaawók, nee waawitá nin hardah dír gwa/aateemaadá' iga i gwa/aatiye'.

⁴ Axáy bihhe sleémeero xuxueek, inooín sleémeero naa burumburitiyé' ni amoorók kayá'. Daaqaywók oo sawén ni hardihiyá', nee dasuuwók kungu gagaar ar bihhe.

⁵ Adoorí an aán nee tari qwalá/, muunaáwók iri qwalaa/ tari bará/. Asma daqaari'iimár baraá tlawi kingi amoorók i huuw, nee daqaari'iimár xoordu kingi kiíngí haniis.

⁶ Yaamuuwók ki tuuntuuk nee daqtá angamía. Eeít damaá angamía awa múk Midiani nee Efa, nee sleémeero awa Sheba nin hardihiyá'. Inooín sahaábu nee mooyángw tsuú' ngun huwiyá', nee inooín xirfuú AAKOÓ MUNGÚ ngun alki/iitiyá'.

⁷ Daqoroó bee/aangw oo Kedari kungu diróg i burumbuur. Gwaandaawér Nebayoti kari ilahhooár da/tá wa hanís, gwaandaweedá' kari ya/án gawaá kitangw'eé' oo ilahhooaro. Nee dooeé' kudá' xiríf nguri xirfayeés.

⁸ Muruuwí aa /akumiit adór huunkáy a milá? Adór hhookár harakikii/ amór maray'ín.

⁹ A miringér baraá ma'aay tidá' yaamaá afaá tlawtá daahh, kinga geerahaár nee miringér Tarshishi. Tidá' na/iiwók ngaa amór saáwa ki/is, peésar'ín nee sahaábu ngi koná' as daanduú umuú AAKOÓ MUNGÚ, Munguúhúng, nee daanduú Kudá' wák oo Hhoohhoó' oo Israeli, asma inós kuungá' nuna xirfayeés.

¹⁰ AAKOÓ MUNGÚ i kaahi, «Dahaaye koo/irók ngi male tléhh, nee waawitaáín in sagadiyuus. Buhhtaaeene kuungá' nuna muúx, ala as nuwa gurií baá/ kuungá' nuna gurtláw.

¹¹ Afér gixsaarók kan gweermoórí máy tlatla/aangw nee xweeraawo ka tseegiiká, as xoordu nee waawitaáine, daqaari'iimar'ín ngiwa huwiya' amoorók.

¹² Umuú waawuti'iimaro laqaá xoororo, tidá' kiíng i sagadiyusaaká, ka hhaamiis, xoorduuká' ki ló'wa qwaarees.

¹³ Xirfuú Lebanoni kungu huuw dirógí ale, peehhoó xaa'aá ta bay beroshi, nee fínje nee sunobaári ki dooér parootuus. Aníng didá' ni hoot an xirfayeés.

¹⁴ Daaqoó mukdá' iga baramaanuus ni hardah iri i tumbarara'aat. Kudá' sleémeero iga waaqaqaiye' ta xupuu' dír ya'aawók. Inooín kiíng iri baya', ‹Gixsár AAKOÓ MUNGÚ, Siyoni ar kudá' hhoohhoó' oo Israeli.›

¹⁵ Kiídár aáng taa sií' nee taa aáhh, tam heé baraadár waaraáhh i kaahh. Ala hamí daxta i xirfayeés ay alhhe'eesay wasle. Tari gixsár qwala/ baraá qari sleémeero.

¹⁶ Xoordu in muruú /aymárí huwiyá', waawitá sleeme iri muruú /aymár i huuw. Kiíng daqaní a tsáhh adór aníng tar AAKOÓ MUNGÚ, aníng an ba/amusmoowók. Nee an gweerusmoowók, kuduú Aleesleemusmo oo Yakobo.

¹⁷ Kitángw muqslír daa/aate sahaábu ngun haniís kitángw muqsliro muqslír peésa ngin haniís, kitángw xa'anowo muqslír daa/aat ngin haniís. Kitángw tlaa/eewo, muqsli ngin haniís. Wayda tari ga/aawuuseerók, nee hotaá ganaa'á' iri geerahariyá'.

¹⁸ Baraá yaamuuwoge afór xaraasl ka baloó axasiiká laqaá hhitiru'uuma nee qwanaay dír digmuú yaamuuwoge i deeruutiaaká. Ba/ama tari adór koo/irók, xiríf tari adór afér maraywók.

¹⁹ Tsee/amá tlaatla/aango u baloó yaahaská tam gwa/aateemaá slahhaangw sleeme qoomár xweeraawo. Ala AAKOÓ MUNGÚ an gwa/aateemaawók awa alhhe'eesay wasl. Anuú AAKOÓ Munguúwók an xirfuuwók.

²⁰ Tsee/amaáhúng i baloó dahiiká, nee slahhaangók i dahiiká. Asma AAKOÓ MUNGÚ an gwa/aateemawók kudaá daqisleém. Deelór tsuunqumisuuwók i fák.

²¹ Muu sleémeero tari múk hota ganaá'. Inooín yaamu kin aal ay alhhe'eesay wasle. Inooín an harma/itaeé' ar dabaaene naa dahaás. As kahhó' aníng ti xirfayees.

²² Kudá' dirhunge niiná in tlahhaay tleehhiit kudá' handá' ló'wa niiná dirhunge i xoorór ur tleehhiit. Anuú AAKOÓ MUNGÚ qooma bira xeér tí an boo/eés ar gaanslaay.»