ISAYA 6 - Biblía Axweesantá Hhohho' ar Mungú 2004

Mungú Isaya nguwa aarusmoó wa ateét

¹ Kurkú waawutmo Usia iwa gwaá', aníng Aako una ár aa iwiít gawaá kitángw waawuti'iima, kudá' gáwtí dirií' nee kwaa tleesa hhe'eés, pasleemaá inqwaarirós guruú doó Mungú nguna tuuntukiyé'.

² Sagadiyuusér Mungú ar ta bay Seraáfi i gáwtií dirí' dír kitangwdae, umuú seraáfamoowo hhampe'eeri ngi koon lahhoó', hhampe'eeraá tsare gitsee/aawós gina tuuntuúk, nee awa tsare ya'aawós gina tuuntuúk, nee awa tsár gin ar gáwtí /akumiit.

³ Umuú serafamowo nee kuqá' tina ateetiné', tiri babayé', «Oo Hhoohhoó', oo Hhoohhoó', oo Hhoohhoó' an AAKOÓ MUNGÚ Aleesleemusmo, yaamu sleémeero naa hatsiyé' xirfuuwose.»

⁴ Afor'ín iihhafiirír doó Mungú gari diingís, nee do' iri haáts quuiro.

⁵ Aluuwo aníng niri oó', «Tsaxwaaeé', asma aníng aga qwaár, aníng a heé afa slasla/aár, nee an hoót tla/ángw múk afe slasla/arén wa ale, nee ilaaeé' waawutmo ngwaa ariyé', AAKOÓ MUNGÚ Aleesleemusmo.»

⁶ Naagáy seraáfamoó wák dír seraáfidae, niri tláy, aníng iri haratseewúy, gawaá dakose i gil'ír asltá kón, ngina óh ar oohamaayi gawaá daanduú kitángw ilahhooár wa ale.

⁷ Afkueé' guri kwatiít ar gil'idaádá', iri báy, «Ga/aaweek tí afkók gwaa kwatít, dakuúsarók kaa hingeés nee tlakweemaawók kaa gurtláy.»

⁸ Afór Aako ngiri axaás, i kat, «Heé ni ya/aaw a heemá oo daanduurén wa daqáw? «Aníng niri mu/aywaáts, «Aníng a diirí, án ya/aawáng!»

⁹ Inós aníng iri báy, «Tláw, mukwí ku beer, ‹Iia ló'wa qaasaak ala gár ta tsahha' i káhh, ila' ló'wa kirihhimaak ala gár ta aanda' i káhh.›

¹⁰ Munér mukwí daktu'uweek, iaaín mindiwa axamiisiyé', ilaaine mindiwa gaa ariyé', iaaine mindiwa axaasiyé' ngiri tsaahhiyé', ar muner'ine mingiwa tsaahhiyé' mindiwa amor'eé' ki/iyé' niri ba/aná'.»

¹¹ Aluuwo niri yaahaás, «Xáy Aako, tay xaylá?» Inós iri mu/aywaáts, iri báy, «Ay dír gixsadu i deewaiya', niri muu wasleesiyá', nee maraay iwa tawo iwiitiya', nee yaamu kiwa ak ló'wa hhitin.

¹² AAKOÓ MUNGÚ muu guri amór saáwí huuw, yaamu sleémeero giri sluhhaay tleehh.

¹³ Tam panoó niiná oo aa meet, aqo kun hhaamiis. Kuká' tari adór sahhti laqaá ta/eewi, tidá' guftanoowós aa meet alaá kawa tsaát. Guftanoowí tay iimu/úngw dahaasíngw hhohhó'.»