ISAYA 58 - Biblía Axweesantá Hhohho' ar Mungú 2004

Gwaawitór ló'

¹ AAKOÓ MUNGÚ i kaahi, «/Aá/ ló'wa ale, ma xaslitaar, tseé' adór tarumbeéta. Muk'eé' dakuúsar'ín ti alki/it, Tlakweemaá doó Yakobo ooeek.

² Tam adoorihe umuú deelooro in i hardarahiyá' iwa firirina' nee loohir'eé' xu'utiro ngiwa slaiya', baré kwaáo' inooín an xoorór hota ganaa' nee ar dabér Munguúín gaa si'ká. Inooín aníng in slaiyá' kwasleema ngiwa adór ganaá' ar tsaat, nee kwaáo' Mungú nguwa i tseewuya' ngi slaiyá'.

³ Ahaá waáy atén gár tas gwaawimaan baré ti ga/eeraaká? Gár atén tis ninawesaan, bare' tiqo gaárií xu'uká? Ga/aawaak, deelór gwaawitorhunge, kuungá' sla'aarirhúng kilós an leelehhitá', nee sagadiyuuserhúng an baramaanusá'.

⁴ Gaa/awaak, kuungá' gár tas gwaawiwindá' a tí kilós tawa giliinda', nee tawa slaqwa' nee tiwa tuu'uta' ar kuundi'i. Gwaawitór adoorí laarí tar gwaawiwinda', firorhúng ngi hardahaská dir'eé' tidár gawa.

⁵ Xáy, gwaawitór adoorí aqo tidá' aníng naa tsawaári? Tí hee tiwa tsatsaa'areesi, sagós nguwa yaamií xupu'umisi adór gitso, nee guniyadu ngiwa hhafi, iwa gawaá da/arár wá iwiiwiti. Xáy, kuungá' adoorí kawa xua' a gwaawitoóro? Nee an baalár AAKOÓ MUNGÚ nuwa ya/ána?

⁶ Gwaawitór aníng ni slaa' a tí: Mukdaádá' taa tawo tsegiít kuwa gweda' him'eedá' muu kura tsegiít kawa gweda'. Mukdá' ta baramaanuusi amohhooa ngiwa slay, nee umuú taaqwanto kawa giqeera'.

⁷ Gwaawitór ló' an tí: Múk qwariít kuwa /aymisa', nee narkuutér maraá koomaaká kawa dah'isa'. Múk tlabaá koomaaká kuwa tsiitisa' nee mar'eefoowók kiwa alee/is.

⁸ Adoorí bar aga tlehhé', kuungá' daqaní a gwa/atá' adór tsiiraahhór matlaatle. Barnaxes a tiqá' an gaanslár hungu/á', hotaahúng awa ganaa'á' nun sa giiriná'. Xirfuú AAKOÓ MUNGÚ kuungá' nun amór alúwa xún.

⁹ Daqaní kuungá' anuú AAKOÓ MUNGÚ bira firiindé', aníng kuungá' nu mu/aywaats. Slám bira ateté', aníng an oo', ‹Aníng a diirí.› Barnaxes kuungá' baramaani aga meeré' baraá tla/angwhunge, nee muu bur looloqoomisa'aaká nee muruú tlákw axweesanto bura meeré'.

¹⁰ Kuungá' barnaxes múk qwariít ugwa /aymisé', nee litlakuuse aga aaxisé', daqaní gwa/aateemahúng in baraá giwtír wa gwa/aatiyá'. Giwtirhúng tari adór tlatla/aangw.

¹¹ Daqaní umuú daqto anuú AAKOÓ MUNGÚ kuungá' nun geeraharahaár, nuri diihhooár i haniís, nuri /uurií doóg. Kuungá' tari adór asalmoó ta eemamisi, adór duxuú ma'aay kudá' baloó /oomaaká.

¹² Taanguhúng kudaá aáng ki male /abees, kuungá' tari tleehhitá' gawaá iihhafiirír aáng, kuungá' tunduri bay, ‹Múk koo/i gaa /abees tleehharo, múk lohaá yaamaá ta hooti gaa /abees tleehharo.› »

Qeemu deelór Sabaáto kuwa amohhe'eés

¹³ «Barnaxes bál deelór Sabaátooro gadiyeé aga meeré', aga gadiyuská deelor'eé' tidá' hhoohhooe, tari deelór qwal/amaaye nee deeloodá' hhoohhoo' ar AAKOÓ MUNGÚ kari ilaiwaawá/. Barnaxes deeloodá' aga ilaiwa/é', ala tidá' ta sla' aga tlehhká, laqaá tidá' baraá muunaáwóge ta sla' aga tlehhká, laqaá muruú tawo ugwa axweská.

¹⁴ Daqaní kuungá' qwal/amaaye a dír AAKOÓ MUNGÚ wá sleerá', aníng kuungá' nuna aleesleemií haniís oo umuú gaaro kawa arba/a' gawaakaá daanduú yaamuwo. Daqaari'iimár Yakobo baabuúhúng kari /agá'.» Adoorí afkú AAKOÓ MUNGÚ gaa oó'.