ISAYA 57 - Biblía Axweesantá Hhohho' ar Mungú 2004

Munguaá múk Israeli kiwa lu'ús

¹ Heé hota ganaá' bira gwaá', heé adoorí ga gaárií xuú' i kaahh. Heé hhoó' bira gwaá', heé gaarí ga tsatsaahhaám i kaahh oo káh, «Heé hota ganaá' kura tláy, amotlakwe munguwa sleér,

² as kahhó' iwa dahi baraá wayda.» Mukdá' hoót ar adór ganaa', nin huungu/uusiyá' gawaá qatenooín.

³ Ala kuungaá diirií tseewuwaare', kuungaásaá na/aá da/aluuso'o, xwaylár fuquso'o nee tsaatuso'o.

⁴ Heé ta niqiinda' a heemá? Heé aferhúng kay duqé' a heemá? Kudá' tsifrerihunge tay kalalahaamisa'? Ahaá kuungá' kilá' a na/aá tlakuuseerokáhe? Nee xwaylár lamuuse.

⁵ Kuungaásingá' ilatleeri na al'ot baraá xaa'aá ti'itú wa ale, dír qo umuú qamuú xa'anoó loo/o naa/e. Kuungaásá na/iihúng tsu/á' baraá xatsoó wa ale, ngiri ilahhooár wa hanmisá' baraá mar'ór tla/ú wa ale.

⁶ Tlaa/aá natsatsaa'á' ina tsawdité' baraá xatsoó wa ale. Tlaa/eeká tari muruú slahhaá' baraá lohduuhunge. Ilahhooár wahaangw una tsipipi'iimisé' nee oo balaango. Xáy muruuwí aníng iqo sla'atísi?

⁷ Kuungá' qateenoohúng iga hhafé' gawaá sagér tlom'aá tlet. Ilahhooár muruú ta tsu/i kari amoodá' i haniisár eeré'.

⁸ Dír alaá afkú do'o nee alaá nahhto kuungá' slaqsi'i iga qasé'. As kuungá' aníng iwa sié'. Qateenoohúng kiri hhafé' tari tsa/aandé' gawaá qateenoohúng kudá' uren. Kuungá' nee mulqerhúng tina kaahi sleeré', kudá' qateenooín taa slaé' nee /ankwetsuuín un ga/eerá'. Naagáy ilatleerirhúng kari tsaeesé'.

⁹ Kuungá' mooyángw tsuú' oo yaariír una sleeré', di/aay una hubé' dír munguúdá' ta bay Moloki. Kuungá' ya/abuuserhúng ana ya/abité' amór saaw, sleeme ana ya/abité' ay baraá gi'i.

¹⁰ Kuungá' loohír tleer naa qaroó slaaqatimís ala kuungá' a kat'aaká, «Gaarí a gadiyér tawo.» Kuungá' /uuruú /abén kuri sleeré' an gár tasa /ararandi'iiká.

¹¹ Xáy, heé kuungá' nu dae tlaáq a heemá? Tam lameemo kiri tlaqé', aníng iri insleeri'iiká, tam aníng iri meeré' baraá inslawayhunge. Aníng iimír aange aga dir'eéní xasliitiikáhe, nee an gár kuúng is ilaiwawa/ká doóqa.

¹² Aníng gana'amuuhúng un alki/iít nee gadiyérhunge, ala inooín gár nuwa buiya' i káhh.

¹³ Qoomár bar /aa/amiindá', gimsé' kár ala munguiihúng awa slaqsi'i kwisiingá' taa burumburiindé' nu tu/iye'. Fur'a gin amór saáw i ufáhh, tam hiinsluú hee gin amór saáw i puruuts. Ala heé naa amor'eé' goow yaamu gi aal, nee tloomar'eé' tidá' hhoohhoo' tari tós.

Al'axweesantá Mungú ar muu nguwa alee/iisi nee nguwa hungu/uumisi

¹⁴ AAKOÓ MUNGÚ iri ooi, «Loohi tleehhaak, tleehhaak, amohhe'eesaak, dukuutse hingesaak baraá loohír muk'eene.»

¹⁵ Asma adoorí an adoodá' kuduú gáwtí dirií', kudá' xiríf, kudá' hotaatiím ay alhhe'eesay wasle, kudá' umuuwós ta bay Oo hhoohhoó' i kaahi, «Aníng dír ni hoot a didá' gáwtí dirii', didá' hhoohhoo', slam a dinkwa nee kudá' aa hhu'uu'un, nee oo tsatsaa'aár baraawose. Asma kahhó' qeereemaá múk tsaén ngiwa slafis nee munér mukdá' aa hhu'uu'un ngiwa slafis.

¹⁶ Aníng a kumitaaká muk'eé' lu'umisuuwo sleeme nu i buhhaaká daqisleém, asma geeraawo qeereemaaká' naa tleéhh, kuká' naa slafíngwí haniís i dír geeraaeéní nusqumiitiyá'.

¹⁷ Ina i buúhh asma tlakweemaaín nee as ilatleerir'ín ngiri muúx, niri nahhaát, as niwa buúhh. Ala nina ak kumiitiyé' loohir'ín tidá' i slaiya' eeharahaduwo,

¹⁸ Aníng lohduuín iga ár, ala in hungu/uús aníng inooín in geerahaár ngiri gurkwa/ás, sleeme kudá' tsuunqumisá' in harhheehhe'eés.»

¹⁹ AAKOÓ MUNGÚ i kaahi, «Wayda, wayda dír kudá' sawen nee awa tsewene. Aníng inooín i hungu/uús.

²⁰ Ala múk tlákw a adór tlawtá aa /eeraa gwa', tidá' gwaanduuwós tsauwaaká, ala in baa/ír duxuún nee xwaanslayhe.»

²¹ Munguúeé' i kaahi, «Wayda i kaahh dír múk tlakwe.»