ISAYA 56 - Biblía Axweesantá Hhohho' ar Mungú 2004

Xoordu sleémeero ni haragwaaiyá' dír múk Mungú

¹ AAKOÓ MUNGÚ i kaahi, «Sakwasleemár ganaa' tleehhaak, nee hotaá ganaa'á' ar hootaak, asma ba/amar'eé' hamír kilá' ni hardát, nee ba/amar'eé' ka ar.

² Heé amohhoó' a kudá' muruuwí gu tlehhiít, nee heedá' muruuwí gwaa oh, kudá' deelór Sabaáto gaa oh as mingiwa meetagaás, kudá' taa ilaa/ muruú tlákw tlehhtuuwo.»

³ Dahaaymoó anuú AAKOÓ MUNGÚ i xuú' miwa oó', «AAKOÓ MUNGÚ aníng iga paraátl dír mukose.» Heé taa karmúy miwa oó', «Ga/aaweek, aníng a xa'anoó aa kah.»

⁴ Asma AAKOÓ MUNGÚ i kaahi, «Mukdá' taa karmuumúy kudá' deelór Sabaáto ngi boo/eemisá', kudá' adoodá' aníng ni slaa' ngi tlehhiitá', kudá' alqador'eé' ngaa oohiye'.

⁵ Aníng inooín baraá guruú dooeene nee baraá guruú baquuwo in dír xiríf i haniís. Umuú ló'wa afhhamít oo na/aá daaqaay nee awa dasuuwo gi baa/ un haniís. Aníng in umií haniís oo ta inslaslay kureeri sleem oo ta baloó fitsiiká.

⁶ Nee mukduú dahaaye naa haragwaa' dír AAKOÓ MUNGÚ, nguwa sagadiyuusiya', nee umuú AAKOÓ MUNGÚ nguwa slaiya' kudá' sleémeero deelór Sabaáto ngaa oohiye' nee ngi meetagamisa'aaká, nee alqador'eé' nga oohiye'.

⁷ Mukwí aníng un huúw gawaá tloomar'eé' tidá' hhoohhoo', aníng inooín ngiri baraá dooeé' kuduú firór wa qwal/atamís. Ilahhooar'ín ar da/a nee ar muruú ta tsu/i kin ya/án dír kitangw'eé' oo ilahhooaro. Asma dooeé' kun babay a doó firo as muu sleémeero.»

⁸ Aakoó MUNGÚ kudá' mukduú Israeli aa tsiyayaxaat gu burumburiím i kaahi, «Aníng múk hatlá' ngu burumbuúr dír kwí naa geerií burumbuuri.»

Geeraharuusér xoorór Israeli ka lu'umis

⁹ Kuungaá makaá xaraaslá' sleémeero, kuungaá makaá xaraaslá' awa baraá gara, qwalaasé' muk'eé' /ayaak.

¹⁰ Asma xuumuusér Israeli a taampu, sleémeero i fuqreeraá kon'aaká, sleémeero a adór seeaawér afe waslen ar hhuheelimaaká, kudá' tawo guá' nee tlatitimá', in tawo gufmisiyá'.

¹¹ Inooín an adór seeaawér hheehhuuse ar baloó axaaká. De'eemuuser'ín sleeme i tsaahhár koondaaká. Umuú heewo aa qaroó parangaá/ amoorós ar i slai, umuú heewo i slaasláwaarós leelehhiit, nee inooín sleémeero a gár wák.

¹² Inooín ta kaahi, «Qwalaasé' difaái a leelehhaán, qwalaasé' buurár aa hamat a xufaán, matlo aqo adór laarí. Slamí matlo ar qoomay wasl an ak slawaán.»