ISAYA 54 - Biblía Axweesantá Hhohho' ar Mungú 2004

Sla'aarír Mungú dír múk Israeliwo

¹ AAKOÓ MUNGÚ i kaahi, «Kiíngadár kampeeri, daá' Kiíngadá' xwayla ga tsaqká daá' ló'wa alé ar bara/, asma kiíngadá' taa geexáy na/aá yaariir i sleér, kudaá /ameenír taa duúx ba/a.

² Heémaarók intlaaxweeseek, inqwaruuwók hhafeek didá' ta hot, him'eerók tleereeseek, ma da'ayumitaar, kikiaarók gawdeeseek slahhto.

³ Kiíng a doogiín bihhaá doó /iyáy nee awa doó basayhe, na/iiwók xoordu ngi aaliyá', taanguudaá gixsadaá taa geexáy niri hatsiyá'.

⁴ Ma da'ayumitaar ti mureekesiiká, ma amoqwaqwadimaar ti male waaqaaiiká, asma mureekesayduú masoombi'iimarók u gunqaarés, tam /oosliislíngw tawa kwaalo'o u baloó insleeraaká.

⁵ Asma tleehharusmoowók an adór hhawaatuwók. Umuuwós a AAKOÓ MUNGÚ Aleesleemusmo, nee kudá' hhoohhoó' oo Israeli an gweerusmoowók. Inós an Mungú daanduú yaamu sleémeero.

⁶ Asma Yerusalemu kiíng AAKOÓ MUNGÚ iga male ateét kiíngadár adór harér taa sií' ar gurhaamuut. Adór harér bi/i ar taa geexáy. Munguúwók i kaahi,

⁷ «Ar har afiqoomár niinawe ina máw ala ar gurtleemuú yaariire aníng kiíng i ki/ís.

⁸ Har afiqoomár niinawe niwa buúhh ina ilaa goów, ala ar sla'aarír warqawakahe iga gurtláw. AAKOÓ MUNGÚ ba/amusmoowók tí gan kah.

⁹ Asma gaarí an adór tidá' deelór Noawo naa oó'. Qoomaadae lo'o ana /aáy ar daanduú yaamu nguwa hatsisaaká alwuór ma'aywo, ala hamí lo'o aga /aáy, ar án iwa i buhhaaká nee iwa baloó iigahhaataaká.

¹⁰ Asma tlom'i daqtakaaro i quutliyá', gongoama' ki surkuus. Ala sla'aarir'eé' ar warqawaaká i baloó qutlká diroge, nee alqador'eé' tidár wayda ka hingeesiiká diroge.» AAKOÓ MUNGÚ kudá' gurtleemuú koóm daanduuwonge tí gan kah.

Yerusalemúr /aben

¹¹ «Aá Yerusalemu, kiíngadá' taa slahh'eemiís, tidá' taa daawitamiís, ar gurkwa/asa gaa dakus. Ga/aaweek i malé tleéhh ar tlaa/aá tlaxo uren, iihhafiirirók a tleéhh ar tlaa/aá yakutír sirboo/.

¹² Aníng tsitsenoowók awa gáwtí tlet in tleéhh ar tlaa/aá akiíki. Afér maraywók ar miisli, koo/írók an tlaa/aá tlaxo urén ar tleéhh.

¹³ Na/iiwók sleémeero ki intsaahhatis nee AAKOÓ MUNGÚ. Diihhooár na/iiwók iri tláhh.

¹⁴ Hotaá ganaa'á' in ar hotaatiín, kiíng ti sawees dír baramaaniro, nee dír dae tlaquuwo, ma da'ayumitaar gár kiíng i harasaap i káhh.

¹⁵ Barnaxes taa i haratláy nee heé aníng naa ya/aawiiká. Kudá' ti tlaampa'aasá' nee kiíng ku hhaamiis geeraawók i ale.

¹⁶ Ga/aaweek, aníng kareeramoó kwahhuút una tleéhh, kudá' asltá gil'ór dukuúm nee xooslár slaqwarár tlehhiít. Aníng sleeme kuduú hhiturusmo una tleéhh as iwa hhitin.

¹⁷ Xooslár slaqwara tidá' taa tleéhh as tawa slaqwi nee kuungá', kuungá' adór nu /is i káhh. Heé bura sakwasleemuút doó kwasleemaro, kuungá' an baaliindá'. Gaarí an gadaádá' sagadiyuuser'eé' i sleer, an hariímár naa dír'ín i haniís Anuú AAKOÓ MUNGÚ tí ngina oó'.»