ISAYA 53 - Biblía Axweesantá Hhohho' ar Mungú 2004

¹ Heé kangwdá' taa axasaán gwaa haratlintii'? Nee /uuruú AAKOÓ MUNGÚ dír kway geehhooeés a dír heemá?

² Inós ina dír geeraá AAKOÓ MUNGÚ wa uraaráy adór xa'anoó dutlutluú/. Adór dee/aarmoó xa'ano oo baraá yaamaá kaahaar. Ga/aawaak, inós slaqsoó hhoohhoó' laqaá gitsee/aá hhoohhoo' gi konká as kahhó' kuwa iiqaytsit. Hhohhoaari tam ar niiná ar kuwa waatlakwes i káhh.

³ Kuna waaqaqaá' kuri sií' nee muu, inós an heé gurhaami nee slahh'amu. Inós a adór heé muu iwa nahhmiiti, kuna waaqaqaá', atén kuri gaárí xuaaniiká.

⁴ Looeemaawo inós slahh'amuurén guna óh gurhaamirén gari gagaár. Atén ngi xuaan kuna sakwasleemuút kuna muúx nee Mungú guri slahh'eemiís.

⁵ Ala inós kuna mulkúy as tlakweemaarén, kuna gweehhín as dakumisuurén. Muxtár atén wayda kur slawaan inós guna sleér, nee as inós kuwa muúx atén ana hungu/aán.

⁶ Atén sleémeero ana adór bee/ángw wá qwaaraán umuú heewo loohirós gaa óh. Ala AAKOÓ MUNGÚ tlakweemaarén sleémeero gina gawaawós i tsa/aás.

⁷ Inós kuna baramaanuús, kuri slahh'eemiís. Tam adoorihe inós afkós gwa waatleesiiká. Adór deelmoó bee/i oo ta gaasár ay, nee adór bee/ír ta se'eengw tlaaqi. Inós sleeme afkós gwa waatleesiiká.

⁸ Kuna baramaanuús, kuri sakwasleemuút, kuri hingeés, baraá qartose heé tí gaa aldaakw i kaahh. Kuna sií' baraá yaamaá múk slafa, kuna muúx as tlakweemaá muk'eé' aa tleéhh.

⁹ Kuna foól dinkwa nee tlakuuse, baraá gwa'araro i dinkwa nee daqaare, tam handá' sagagawduú aa tleéhh i kahhi, tam sleeme afkose /aysantá aa tsaát i kahha.

¹⁰ Tam adoorihe AAKOÓ MUNGÚ guna slaá' nguwa slahh'eemisi, guri gurhaamír ar áy. As hhiintluuwós nguwa duúx tawa ilahhooár tlakweés hingeesa, xwaylarós ga ar adór kar hota tleér. Inós an kudá' sla'aarír AAKOÓ MUNGÚ ga boo/eés.

¹¹ Ala sagadiyusmooeé' mamaá slahh'amuú hhiintluuwós gi ar, iri hhe'ees. Ar fuqurángw sagadiyusmooeé' kudá' ganaá' múk yaariír kun gan'amú i harafaar, nee inós tlakweemaaín gin gagaar.

¹² Gawaá adoorihe inós nee múk urén in al'iwitiís. Inós nee mukdá' /uureemaá koóm haasaáng ngun alqasimiisiyá'. Asma inós slafiingós guna haniís, kuri harafaár nee múk tlakuuse. Tam adoorihe tlakweemaá múk yaariír gina gagaár. Nee tlakuuse gari aleefiriirín.