ISAYA 52 - Biblía Axweesantá Hhohho' ar Mungú 2004

Mungú Yerusalemu ga ba/amis

¹ Tlawáng, tlawáng, kiíng gixsár Siyoni /uuru slaweek, Kiíng Yerusalemu, gixsár hhoohhoo', tlabaawók awa hhohho' dahaaseek. Heé ta hhehhe'eesiiká laqaá oo slasla/aár amoorók ngi kayká.

² Teeri kukueek sihhiitáng, kiíngasír Yerusalemu taa haasaáng wa ar tláy, teeri kukueek, sihhiitáng. Kiíngasír dasír Siyoni taa haasaáng wa huúw.

³ AAKOÓ MUNGÚ i kaahi, «Kuungá' tunda weeriís ar tawo nee tundu tuu/ ar peésa wasle.»

⁴ Aakoó MUNGÚ i kaahi, «Wa'aá geeraawo muk'eé' ina /eét baraá yaamaá Misri tari dahaayér ayaadá', múk Ashuru giri tawo baramaanuús.

⁵ Hám daxta gawaá adoorihe anuú AAKOÓ MUNGÚ a kah, ‹Aníng gár ni tleehh diirihe bar muk'eé' kuna tawo ar tláy dír ilaaeé' wa ale. Waawitaáín ta tsuunqumiis.› » AAKOÓ MUNGÚ i kaahi, «Umuueé' kun /oosliislín umuú daqto.

⁶ Gawaá adoorihe muk'eé' aníng iri xuu', baalaadae ngiri xuiyá' adór heé axweés tar aníng. Aníng a diirí.»

⁷ Xáy, i hhohhoaa'áy a adoomá heé ya/abtór hhó' koóm birna hardáh oo amór tloomár daáhh, kudá' wayduú káh, oo hhooeema gi káh, kudá' ba/amár alki/iít, kudá' gixsár Siyoni ga babáw, «Munguúwók i waawuti'ii'ín.»

⁸ Afór xuumuuseerók iiárií qaaseek, i dinkwár wa dá' ar qwala/, asma adoodá' AAKOÓ MUNGÚ nira kií/ Siyoni ilaaínaá kilae ngaa ariyé'.

⁹ Taangwaá yaamaá Yerusalemu daaé', asma AAKOÓ MUNGÚ mukós gwaa gurkwa/ás inós Yerusalemu gaa gweér.

¹⁰ AAKOÓ MUNGÚ /uuruuwós kudá' xiríf gwaa laqán, dír geeraá xoordu sleémeero nee múk ku/uya sleémeero awa yaamu ba/amár Munguúrén ngi ariyá'.

¹¹ Tlawsé', tlawsé', gixsár Babuloni geexawaak, gár slasla/aar ma kwatimitara'. Ti'iité' baraá gixsaro, ti kiloohúng hheehhe'ese' kuungaádá' xooslár AAKOÓ MUNGÚ loohisá'.

¹² Asma kuungá' a gaanslár tleera'aaká, nee sleeme a ti'i'inda'aaká, asma AAKOÓ MUNGÚ i geeraahúng haar nee Munguú Israeli i aluuhúngí dirii' as nuwa xun.

Sagadiyusmoó Mungú

¹³ Ga/aawaak, sagadiyusmooeé' i daqaari'iit ku iia tleerees nee kuri gáwtí tlees nee ilaiwa/amér ur ga sláy.

¹⁴ Múk yaariír inós kuwa ár tana waa/oó/, asma gitsee/aawós kaa ló'wa mulkúy sleeme u heé wa tsahhká.

¹⁵ Inós xoordu gi kwisltis, waawitá afe gari ohín as inós, asma muruudá' naa ari'iiká ngu ariyá', nee muruudá' naa axaasi'iiká ngway tsaahhiyá'.