ISAYA 51 - Biblía Axweesantá Hhohho' ar Mungú 2004

Axweesanoó gurkwa/asa dír Yerusalemuro

¹ Aníng iiárií qaasaré' kuungaádaá hotaá ganaa'á' ngi sla'á', kuungaá AAKOÓ MUNGÚ leelehhiitá'. Tlaa/adá' tunduwa dakuút i qaytsitaak nee baraá bohongwdá' tunduwa duúx ar folit.

² Baabuúhúng Abrahamu ga/aawaak nee Sara tidá' kuungá' naa laqwal. Qoomár án Abrahamu nguwa ateét na/aay gu konká, Ala aníng nguri tsuúq, na/iiwós ngiri ló'wa yaareés.

³ Asma AAKOÓ MUNGÚ Siyoni ga gurkwa/as, wa/angwdá' sleémeero a hhiturumiit un amohhe'eés. Darmuuwós un adór Edeni tleéhh, xaanxaywós un adór asalmoó AAKOÓ MUNGÚ tleéhh, qwala/ nee bara/uuwo niri deerutiyá' baraawose sluufaay nee afór daa'aangw kari baraawósí axaas.

⁴ Muk'eé' aníng iiárií qaasaré', xooror'eé' iia qaasaak, asma dabe ni dir'eé' dáhh, nee sakwasleemar'eé' ar ganaa' i gwa/aateemaá muu tleehhít.

⁵ Ba/amar'eé' ni gaanslár hardát. Ba/amaadá' naa huúw ka geehhoo'. Dakw'eé' muu gu sawaawuti'ín. Kuungá' hhapeemaá sawen daamaré', /uuruueé' na harahhifaak.

⁶ Gawaá doori i qaytsitaak, daanduú yaamu xuxuaak, asma doori i waaraahhiyá' adór quui, yaamu i feehhamiitiyá' adór inqwaarír qaren awa baraadá' hootá' i qatliyá' adór naanaga. Ala ba/amar'eé' in kumaamít ay kureeraá kureér, nee gweeramor'eé' i alhhe'eesoó koondaaká.

⁷ Aníng iiárií qaasaré' kuungaá hotaá ganaa'á' ngi xuá', mukdá' baraá muner'ine daber'eé' ngi koomá' /ooslislíngw muu mu da'ayumitaara' nee mutunduwa amoqwaareés nee kaantíngw muu.

⁸ Inooín ki /aay nee sisibú adór tlawuú qarén, tlusá gi /aay adór kaahari. Ala ba/amar'eé' in kumaamít ay kureeraá kureér, nee ba/amar'eé' ar ni huuw ar qari sleémeero.

⁹ Tlawáng, tlawáng aá AAKOÓ MUNGÚ, ar /uuruuwoge ti ba/amis. Daarikiitáng adoodá' aáng taa tléhh qoomár qartadá' aa waarahhi. Ahaá a kuungeekáhe oo Rahabu gaa tlaqaqaat nee kudá' dayshamoodá' úr oo baraá ma'aay gwaa tla/a feehhamiis?

¹⁰ Ahaá kudá' tlawi gaa kahaas a kuungekáhe? Kudá' iloodá' uren awa ma'aay gaa kahaas, kudá' loohi gaa baraá iltá ma'ár tleehh as kahhó' mukdá' taa ba/amís iwa waaraahhi.

¹¹ Naagáy mukdá' AAKOÓ MUNGÚ aa ba/amís ni wayaa', nin hardihiyá' Siyoni ar daa'ángw bara/, qwal/uú alhhe'eesay wásl i baraá muner'ín. Inooín nin hootiyá' ar qwala/ nee bara/, gurhaami nee qununu/aay ni faakiyá'.

¹² AAKOÓ MUNGÚ i kaahi, «Aníng a kudá' kuúng u gurkwa/ás. Ahaá waáy gár heé gwaá' kus da'ayuumit Heé qo ilaá wa qwaár adór gitso?

¹³ AAKOÓ MUNGÚ kuduú tleehharusmoowók ugwa gunqarés, kudá' doori gaa hhaaf nee iihhafiirír yaamu gaa qaas. Kuúng kumiít de'eero umuú deélooro as buhhtaá kuduú baramaanusmo taa amohhe'ees kuúng uwa hhaamisi. Xáy, buhhtaá baramaanusmo i amá?

¹⁴ Kudaádá' ta slahh'eemisi ki gaanslár tuu/, ta qatliiká, sleeme ta /eetiiká baraá bohoongw, slamí muruú /ayma ngu dakusiaaká.

¹⁵ Aníng a AAKOÓ MUNGÚ, Munguúwók, aníng tlawi an /eera gaás nee gwaanduú ma'aay iri /orootl. Umuueé' an AAKOÓ MUNGÚ Aleesleemusmo.

¹⁶ Aníng axweesante'eé' aga qaás baraá afkók nee ugwa luú/ baraá mahhtuú dakw'eé'. Doori ngiri hhaáf nee iihhafiirír yaamu ngiri qaás, múk Siyoni nguri báw, ‹Kuungá' an muk'eé'.› »

Alhhe'eesoó slahh'amuú Yerusalemu

¹⁷ Tlawáng aá Yerusalemu, sihhtanooro gaalalaa'aát, AAKOÓ MUNGÚ iga wahaás ar slooqomoó buhhtaawós, kiíng un tsaanqás wahto tari ta/amít.

¹⁸ Baraá tla/ángw daaqaywók sleémeero oo taa laqwali oo gixsarí gaa geerahaar i kaahh, oo gaa dawa oh i kaahh baraá daaqaydá' aa urarayi.

¹⁹ Muruuwí tsár oo tlákw kiíng iga sláy, heé kiíng i gurtláw? Baraá hhitiru'uumaro nee qwanaywo, nee qwari nee tsu/utaaro Heé kiíng i gurkwa/ás a heemá?

²⁰ Daaqaywók aa /araarán, naa baraá afaá luhdií huhuaainé' adór saaragtá taa óh nee tsaaxweeli. Buhhtaá AAKOÓ MUNGÚ ngaa slayé', gahhaatár Munguúhúng.

²¹ Gawaá adoorihe, tí iiárií qaasaak, kuungaáká' taa slahh'eemiís, kuungaáká' aga oonimité' ala ar difaáirooká.

²² AAKOÓ MUNGÚ Munguúwók, kudá' mukós aleekal/aám, i kaahi, «Ga/aawaak, án slooqomoodá' nura oonitís ugwa hingeés. Kuungá' slooqomooduú buhhtaaeé' u wata'aaká.

²³ Aníng wakuuseerók an wahaás, tidá' kuúng u babaw, ‹Yaami qaateek atén a gawaawók ar waarahhaán, daanduuwók nguri adór yaamu tleehhaán tari adór loohír tar warhhahhati.› »