ISAYA 50 - Biblía Axweesantá Hhohho' ar Mungú 2004

¹ AAKOÓ MUNGÚ i kaahi, «Slaambare/idá' aayorhúng aníng ngiwa talaákár i haniís i amá? Laqaá aníng kuungá' heé nuy weeriís a heemá oo aníng i iinuús? Ga/aawaak, kuungá' tunduna weeriís as tlakweemaahúng. Aayorhúng kinga guús as dakuúsarhúng.

² Ahaá waáy, qoomár niwa hardáh heé naa didií áw mis kaahh? Qoomár niwa ateét heé aa ooin mis kaahh? Xáy, dakw'eé' ku ququmaáre ba/amisa gari aslayká? Laqaá aníng /uuruú nir ba/amis u koomaakáhe? Ga/aawaak, tlawi ngiwa i gahhaát, ma'aay niri kahiyé', yaae ngiri yaamaá xaanxay tleéhh, siyó iri diíx as ma'aay ngiwa dakuús nee ina qaátl as waxe.

³ Doori in uuntsuús ar giwti nee ngiri tlabaá tsuunqusmií dahaás.»

Iialooeesár sagadiyusmoó Mungú

⁴ Aakoó MUNGÚ aníng iga intsaahhatís axweesantá qooma as múk a diqay tsatmiit nguwa /uurií haniís. Umuú matlaatleero in tleemiis as nguwa iiaárií qaas gawaá tidá' iwa intsaahhatimisi.

⁵ Aakoó MUNGÚ iaaeé' gaa xawís, nee aníng aga dee/anutiiká dirose laqaá inós ugwa si'iiká.

⁶ Daanda una amór kudá' i muxá' xu'ús tlaaqarmaaeé' ina amór kudá' daamor'eé' tu/uumá' xu'ús. Gitsee/aaeé' iga lu/iiká dír kudá' aníng i mureekeemisa'a nee i nintsimita'a.

⁷ Asma Aakoó MUNGÚ in alee/iimiis, gawaá adoorihe, heé nee aníng ti tlaampa'aasá' i kaahh, gawaá adoorihe, aníng guruueé' ugwa tlaa/árí dahaás. Aníng a xuú' ti baloó mureekeesiiká.

⁸ Kudá' aníng i aleekalaá/ ku tseéw, heé nee aníng ti tlaampa'aasá' a heemá? Gimsé' a sihhitaán dír doó kwasleema. Wakusmooeé' a heemá? Axáy inós ni dir'eéní tseewuy.

⁹ Ga/aaweek, Aakoó MUNGÚ aníng i alee/imamiis. Heé aníng i dakuúsár báw? Ga/aaweek, inooín sleémeerowo nin adór tlabaá wa slaxaruumitiyá' tlusá giri /aay.

¹⁰ Baraá tla/angwhunge heé AAKOÓ MUNGÚ gu ilaiwawaá/ i deéro, nee oo afór sagadiyusmoowós ga iialooeemiís, kudá' baraá giwtír wa hi'iimiít nee gwa/aateemaá koomaaká, tam adoorihe haandá' umuú AAKOÓ MUNGÚ gun harahhifiit nee Munguúwós guri haratlintatii'?

¹¹ Ga/aawaak, kuungá' sleémeero awa asltá oohamiisá', awa tsaa'aaso ngaa oohiye', gimsé' hi'iimité' ar gwa/aateemaá asltahúng, nee ar tsaa'asorhúng tisíng taa oohisé' Aníng kuungá' gár nuy tleehh a tí, kuungá' tundu yaamií hhaaf ar slahh'ama.