ISAYA 48 - Biblía Axweesantá Hhohho' ar Mungú 2004

Mungú a Aako ay alhhe'eesaay wasle

¹ Iia qaasaak doó Yakobo, kudá' taa umuú Israelí tsaát, kuduú xwaylár Yuda. Kuungaádá' lo'ór /ayá' ar umuú AAKOÓ MUNGÚ nee kuungaádá' Munguú Israeli ngu tawo afeérár kaahá', ala ar looeemaawooká laqaá ar adór gana'aaká.

² Kuungaádá' ti ateetimá' ar umuú gixsár hhoohhoo', handá' a kata', Munguú Israeli un harahhifaán, umuuwós an AAKOÓ MUNGÚ Aleesleemusmo.

³ Muruú aa tleehharuut nguna iimír aáng wa oó', Aníng ar afkueénuú kilae una axweés nee nguri dirhúng i xu'utís, nee nguri gaanslár boo/eés.

⁴ Asma aníng kuúng un xuú' adór tur saga gawít, tu isa gawít adór muqsli, slám gitsee/aawók ki gawit adór muqslír sirdaa/aat.

⁵ Aníng kaangwí nguna iimír aáng wa oó', dír ira tleehharutiiká aníng nguna dirhúng i oó', aluuwo ma ooaar, «Murslaaqatuueé' kwí muruuwí guna tleéhh, murslaaqatuueé' kwí naa daákw nee naa kwahhuút kaangwí guna oó'.»

⁶ Muruudá' naa geerií axweés, sleémeero araak daxta. Daxta u malé alki/ita'aakáhe? Ala iimír hamí kuungá' muruú /abén u axasá' kudá' taa luú/ kuúng ta baloó xu'ká.

⁷ Muruuwí laarí tleehharumiít kuúng ugwa geerií axasiká. Kahhó' a o'ká, «Ga/aaweek, aníng muruuwí u geerií xuu'.»

⁸ Kuungá' kaangwí ugwa axasi'iiká, sleeme ugwa xui'iiká. Iimír iimu/uungo iaahúng i xaaxay'aaká, asma aníng a xuú' adór kuungá' tara naagisé' al/aymaaro, nee iimír xwaylarhunge tunduna báy, dee/anuuse.

⁹ Daanduú ilaiwa/amér umueene aníng buhhta iga máw, asma daanduú xirfueene mune aga guú/ aluuwo aníng kuúng muwa qororo'oós.

¹⁰ Ga/aaweek, aníng kuungá' naa kwahhuút ala a adór peésa kar kwahhumamitiiká ar baraá asla. Nun iiár ar slahh'amaayér hhamhhám.

¹¹ Adoorí an tleéhh as daanduueénuú kilá'. Asma waáy gár umuueé' kus waaqaqai? Aníng xirfuueé' u baloó heé hatlá' i haniisaaká.

Koreshi geeraharusmoó Mungú aa tsawaár

¹² Múk Yakóbo, aníng iiárií qaasaré', nee oo Israeli kudá' naa ateét. Aníng a Inós, aníng an kuduú geera nee oo alhhe'eesaay.

¹³ Dakw'eé' iihhafiirír yaamu gana qaás, nee dakw'eé' oo doó /iyayhe doori ina hhaáf. Qoomár bira ateét inooín nin dinkwaárií sihhiitiyá'.

¹⁴ Sleémeero dinkwa i burumburitaak iia qaasaak. Heé baraá tla/angwhunge kaangwí gwaa alki/iit a heemá? AAKOÓ MUNGÚ Koreshi gu slaa', inós tidá' Mungú i slai ga boo/ees daanduú Babuloniro, inós múk Kaldayo gu i haratláy.

¹⁵ Aníng tí ana oó' nee inós una ateét. Aníng Koreshi nguna huúw, nee diihhooa ga sláy baraá tidá' i tlehhiiti.

¹⁶ Dir'eé' tseewuwaare', tí iiárií qaasaak, iimír iimu/uungo aníng aga axweesiiká ar naaqo, iimír muruuwí iwa tleehharuuti aníng an qaroó daadáw. Hám daxta Aakoó MUNGÚ aníng iga ya/aáw nee iga qeeruuwós i haniís.

Gár Mungú aa qoomeés as mukós

¹⁷ AAKOÓ MUNGÚ, kuduú ba/amusmoohúng, kudá' hhoohhoó' oo Israeli i kaahi, «Aníng a AAKOÓ MUNGÚ, Munguúhúng kudá' kuungá' nu intsaahhatamís as amohhooarhúng kawa sleera', kudá' kuungá' nu geeraharahaár ar baraá loohidá' ganaa' ooharo.

¹⁸ Hám geera a tsiní bar hara'ayar'eé' aga iiárií qasé'. Daqaní wayduú yaariír u sleerá' adór ma'aá yaae, geera hotaá ganaa'á' dirhunge tay adór gwaanduú ma'aá tlawi.

¹⁹ Xwaylarhúng geera a adór hhasaangw. Geera ki ló'wa ur adór hhasaangw umer'ín geeraawo ka baloó qwaareesiiká laqaá ki baloó hhaamiisiiká dír geeraaeene.»

²⁰ Hám daxta tlawé' Babulonír wa ale, /akumiité' yaamaá Kaldayór wa ale. Kaangwí alki/itaak ar tseeór qwala/, kaangwí ooaak, afoorí ya/aawaák ay ku/uyaá yaamu, ta oa', «AAKOÓ MUNGÚ múk Yakobo kuduú sagadiyuuseerós gwaa ba/amís.»

²¹ Qoomár ngiwa baraá xaanxáy wa geerahaár naa waximiti'iiká. Ma'aay gina baraá tlaa/ár wa duúx, tlaa/a gana feehhiís ma'aay nay baraadá' wa wa/iyé'.

²² AAKOÓ MUNGÚ i kaahi, «Dír múk tlakwe wayda i kaahh.»