ISAYA 47 - Biblía Axweesantá Hhohho' ar Mungú 2004

Sakwasleemár Babuloni

¹ «Yaamu i aweerang daqaní ta iwít baraá teeri. Aá /amaatliito'ór Babuloni, yaami iwiteek baraá kitángw xirif wásl, aá kiíng dasír Kaldayo. Asma kiíng daxta ti dasír butlutluqár ateetiiká nee ar hhoohhoo'.

² Tlaa/ár xoosliingw taatahheek, balaangw xoosleek, tlabaawók kudá' tira tuuntúk hingeseek, tlabaawók waatleseek, tlabaawók gáwtí ooheek, yau waarahheek.

³ Muu /ankwetsuuwók gu ar, alsi'imuuwók kuri ar. Aníng li/aay u buú', aníng heé ni gurtlaw i kaahh.

⁴ Ba/amusmoorén, umuuwós an AAKOÓ MUNGÚ aleesleemusmo, inós an kudá' hhoohhoó' oo Israeli.»

⁵ AAKOÓ MUNGÚ i kaahi, «Iwitanaangw i xasliteek, ta dát baraá giwti, kiíng dasír Kaldayo. Asma kiíng daxta a sangw waawuto'ór waawuti'iimarooká.

⁶ Aníng muk'eé' una i buúhh, aalir'eé' ngiri meetagaás, ngiri haniís gawaá dabaawók i alé, ala kiíng iga gurtleeriiká, qoomaadaádae kiíng bariise ana huwár iloói tsa/ás.

⁷ Kiíng ana kilók ó', ‹Aníng a waawuto'o daqisleém.› Ala muruuwí ugwa baraá muunaáwók i qasiká, tam alhhe'eesaywós ugwa insleeriiká.

⁸ Gawaá adoorihe, tí iiárií qaaseek kiíngár diihhooár slaa', kiíngadaádá' saxareemár hoot. Kiíng ana ó' baraá muunaáwók i aleeró, ‹Aníng a kilooeé', heé hatlá' oo adór aníng i kaahh aníng a adór kwaalo'órár hootaaká, laqaá tam na/iieé' sleeme i qatliaaká.›

⁹ Muruuwí tsár kiíng i gaanslár i harati'iit baraá looár wák i aleeró, qatlór na/iiwók nee kwaali'iitaro i sleér. Handá' kiíng tam da/aluso'ooro, tam /uuruú úr oo qwaslaari'iima u koonda.

¹⁰ Kiíng aga yaandahhe'és baraá tlakweemaawók ale, a kat, ‹Heé aníng i ga/áw i kaahh.› Sagalooarók nee xu'utiroge iga qwaareesiyé', tari baraá muunaáwók i ó', ‹Aníng a kilooeé', heé hatlá' oo adór aníng i kaahh.›

¹¹ Gár tlaakw in sleér ar ta baloó aleesleeraaká pa/asaro Ala amotlakwe i haraxupút ar ta baloó aleesleeraaká kwirhhitaro, tin hhaamiis ar gaanslaay ar adór ta baloó xu'ka.

¹² Magaáhh baraá qwaslaari'iimaroge nee da/ariiwók kudá' ure, kudá' handá' aáng taa tlehhít iimír baraá masoombi'imarók doóqa slaasláw a sleér, laqaá ka xu' an baaliín.

¹³ Kiíng taa baál nee hara'ayuuseerók tidá' yaariir, gimáy i sihhiitiye' kiíng i ba/amisiye', inooínaadá' doori nee tsatse/uuwo ngi xuuxu'uumá', nee umuúqo slahhángw ti'iita muruú kiíng i sláw ngun aaririná'.

¹⁴ Ga/aawaak, inooín a adór hhaanslaá kaaharen awa asla i /ak. Inooín dír /uuruú tsángw aslto ti aleeslay'aaká /iisaro. Gaarí a asltá hhamhhám, ka axwanemamisiiká.

¹⁵ Mukdá' taa harahhíf ador'ín a tí, kudá' taa sagedawiimít, kudá' nee kiíng aga alhi'iimite' iimír masoombi'iimaroge. Inooín tambeera gin áy, umuú heewo iri amoorós xuu', tam oo kiíng i ba/amís i kaahh.»