ISAYA 46 - Biblía Axweesantá Hhohho' ar Mungú 2004

¹ «Munguúdá' ta bay Beli aa yaamií huú' munguú ta bay Nebo aa huú' munguiihúng kudaá slaqsi'i ki loohiis nee makaay nee hikwa qoomarkaaro muruuwí kuungá' una loohisé', hám daxta ina tsa/asé' gawaá daandemaá makaá naa slaqaamitiyé'.

² Kuungaá mungui aga huhu'uundé' dinkwaárií ale, kuungá' munguiihúng awa murslaagat /iisaro i aleesleera'aaká, ala kuungaá kilá' tundu huuw baraá loohaay.

³ Aá xwaylár Yakobo aníng iiárií qaasaaré', Iiárií qaasaaré' panoó doó Israeli aníng nuna amohhe'eemiís iimír tunduwa laqwaál, nuna loohamaamiís iimír tawa baraá guruú aayo.

⁴ Tam qoomár bar aga dimadiindé', aníng aqo kuduú kilá', Tam qoomár se'engwhúng al/awtanto bira /awaakúy aníng kuungá' nu loohiís. Aníng adoorí ana tleéhh nee an kumiít tlehhtuuwo, nun loohiís nee nu ba/amís.

⁵ Kuungá' aníng heé ir slaqmisa' a heemá tari slaqmís nee inós. Nee heé ir alqoomesa' a heemá tari slaqmís nee inós.

⁶ Mukdaádá' sahaábuú duxuúm baraá tlakw'ii'ín wa alé peésa ngiri qoomeemeesiyá' ar kílo. Heedaáduú sahaábuú kwahhuút nguri buiyé' ar peésa, as slaqsa'aá mungui ngiwa tleehh. Naagáy kiri i tumbarara'aamiit kiri sluufmiis.

⁷ Inooín slaqsi'iidá' ngin sum'ii'ín ar loohisiyá', ngiri gagaariyá', ngiri qaasiyá' didá' inooín ta slai, niri didá' wa iwiwitiyá'. Didaádá' kay qaasi i baloó surukiaaká. Barnaxes hee ga i /aa/aá ay gu mu/aywatsiiká, laqaá hee gu ba/amisiiká baraá slahh'amuuwose.

⁸ Kaangwí inslawaak nee ku aldakwá'. Axáy malé aldakwaak kuungaá tlakuuse.

⁹ Muruudá' aáng aa tleehharuut inslawaak. Asma aníng a Mungú, Munguú hatlá' i kaahh. Aníng a Mungú, Munguú adór aníng i kaahh.

¹⁰ Aníng alhhe'eesaay nguna iimír iimu/úngwa oó', nee muruudá' aluú wa hardáh nguna iimír aáng wa oó'. Aníng a kah, ‹Gar'eé' ar naa qoomeés a boo/eés nee tidá' sleémeero ni slaa' a tleéhh.›

¹¹ Aníng deelaqaasi an iimír da/aáwí ateét. Heé sufueé' gu xuú' un amór yaamaá saáwá huúw. Tí aníng aga oó' nee an boo/eés, tidá' naa qoomeés aqo an tleéhh.

¹² Kuungaáká sage gawden aníng iiárií qaasaré', kuungaásíng saaw dír ba/amaro aníng iiárií qaasaré'.

¹³ Deelór nuwa ba/amis ngi tseeweés. Ka saweeká. Deelór nuwa ba/amis i tligká. Gixsár Siyoni an ba/amís as múk Israeli kuduú xirfuueé'.»