ISAYA 45 - Biblía Axweesantá Hhohho' ar Mungú 2004

Mungú Koreshi gwaa tsawaár

¹ AAKOÓ MUNGÚ heedaádá' taa dii/tár iimbalaáx ta bay Koreshi gun babay, Aníng an kudá' dakók oo doó /iyáy gwa oh, as xoordu ngiwa geeraawók wá guus, aníng an kudá' siinootoó waawitá gu gweér. Nee tseegamór gixsadu an geeraawók wa gweér. Afkú gixsa oo ta tseegi i kaahh.

² Aníng kuúng un geerahaár, tlom'i ngiri alqoomeés dír geeraawoge, afér muqslár sirda/aten an giqáw, muqslár afér mari tsegit ngiri tla/eeri tlaáq.

³ Aníng daqaari'iimadá' taa luú/ ngi haniís tidá' dír naaqoórií dirii'. Kuúng daqaní a tsáhh adór aníng tar AAKOÓ MUNGÚ. Munguú múk Israeli, kudá' kuúng ugwa ateet ar umuuwók.

⁴ Aníng kuúng una ateét ar umuuwók. Aníng kuúng un umuú iia tleér i haniís tam handá' aníng i xu'kahe. Adoorí ana tleéhh as daanduú sagadiyuuser'eé' múk Yakobo nee as múk Israeli kudá' naa tsawaár.

⁵ Aníng a AAKOÓ MUNGÚ, Munguú hatlá' i kaahh Munguú hatlá' i kaahh aqo har aníng kilooeé'. Aníng kuúng ugwa /uurií doóg, tam handá' aníng iga xu'kahe.

⁶ As muu ngiwa tsaahhi iimír da/aáw wá tleemu, ay /uwa, adór Munguú hatlá' ir kaáhh aqo har aníng kilooeé'. Aníng an AAKOÓ MUNGÚ, Munguú hatlá' i kaahh.

⁷ Aníng gwa/aateema nee giwtiro ina tleéhh; Aníng qwala/ nee gurhaami ina tleéhh. Aníng an AAKOÓ MUNGÚ oo muruuwí sleémeero gwaa tleehh.

⁸ Kuungaá doóri, gáwtá wá tluwaaré' huunkáy hotaá ganaa'á' ngi paahhamiisi, yaamu i gweeritiye' ba/ama ngi huwiye' nee hotaá ganaa'á' ngi duuxiye'. Aníng a AAKOÓ MUNGÚ kudá' muruuwí gwa tleehh.

Aleesleemuú úr oo Mungú

⁹ A tsaxwaawós heedaádá' ti tlaampa'aamiisá' nee tleehharusmoowós, Tleei tleeusmo gunqo tlaampa'ása. Hutloó adór hutla'aá hatlá'. Xáy, tleei tleeusmo gunqo beéra, «Gár ta tlehhit?» Laqaá «Gadiyér dabaawók i qoondaaká.»

¹⁰ Tsaxwaawós na/oó baabuúwós babáw, «Gár tasa laqwál?» Laqaá na/oó aayoorós babáw, «Gár asltá xwayla isa /ák?»

¹¹ AAKOÓ MUNGÚ kudá' hhoohhoó' oo Israeli nee tleehharusmoó Israeli, i kaahi, «Xáy, aníng kuúng inqo yaahása daanduú na/iieene? Laqaá inqo gaa beéra daanduú gadiyér'eé' ar ni tlehhiita?

¹² Aníng yaamu ina tleéhh, hee nguri tleéhh oo gawaadá' gi hoót. Doori aníng ina hhaáf ar dabaaeé', nee muruudá' gawaadií dirií' sleémeero un baliít.»

¹³ AAKOÓ MUNGÚ i kaahi, «Aníng Koreshi ugwa sihhtís iwa gan'amúr hooti, lohduuwós iga gan'aás, inós gixsar'eé' ga tleehh. Nee mukduú baraá loohaay gun gweer. Inós i bu'utuú leelehhitiiká laqaá slukma.»

¹⁴ AAKOÓ MUNGÚ i kaahi, «Daqaari'iimár Misri nee ar Kushi a toohúng, mukdá' tlét oo Seba a lawaalerhúng, inooín kuungá' nu eehariyá', inooín kaa daba tsegiít nuri i tumbarara'atiyá', nuri firiná', iwa kaahiya', ‹Mungú a dinkwa nee kuungá', Munguú hatlá' i kaahh aqo har inós kilós.› »

¹⁵ Aá Munguú Israeli, ba/amusmo, looeemaawo kuúng a Mungú, ilaawo tu ar'aa'ariiká.

¹⁶ Kudá' slaqsa'aá munguaá hatlá' tlehhiitá' gin mureekees, giri amoqwaarees. Sleémeero giri amoqwaarees.

¹⁷ Ala AAKOÓ MUNGÚ xoorór Israeli ga ba/amis ar ba/amár alhhe'eesay wasl. Kuungá' tundu murekesiiká nee tundu amoqwaaresiiká ay kureeraá kureér.

¹⁸ AAKOÓ MUNGÚ kudá' doori gaa tleehh, inós a Mungú. Inós yaamu gina tleéhh, nee gin gawdeemiis. Gaa tleehhiiká as kiwa gaa wásl, ala gina tleéhh as kiwa hooti. Inós i kaahi, «Aníng a AAKOÓ MUNGÚ, Munguú hatlá' i kaahh.»

¹⁹ Aga axweesiiká ar naaqo baraá yaamaá giwtír wa ale. Aníng xwaylár Yakobo aga bawiiká, ‹Aníng leelehharé' tawo ale.› Aníng a AAKOÓ MUNGÚ kudá' looeemaá káh aníng muruú ganaá' un oiím.»

Aakoó yaamu gaa tleehh nee slaqsaá munguaá Babuloni

²⁰ Kuungaásingá' xoorór aa met, dinkwaárií burumburiité', hardahaaré' daqaní ni tseewurá'. Mukdaáduú murslaaqatuú gufteeraá loohiís i xu'utír konká, nee tan munguú hatlá' firiirín kudá' ba/amisaro gi aleeslawaaká.

²¹ Kangwsíng ooare' ar gwa/aateema ti dinkwaárí hara'ayinde'. A heemá heé kaangwí naa ti'imiit gwa geerií oo'? Heé muruuwí ngwaa geerií alki/iit a heemá? Xáy, aqo aníngeéke AAKOÓ MUNGÚ? Munguú hatlá' i kaahh aqo har aníng kilooeé'. Munguú ganaá' nee oo ba/amusmo oo hatlá' i kaahh aqo har aníng kilooé'.

²² Amor'eé' ki/aare' nee tundu ba/amisi, kuungaásíngaá ku/iyaá yaamu sleémeero. Asma aníng a Mungú, Munguú hatlá' i kaahh.

²³ Aníng lo'o aga /aáy kilooeé', asma baraá afkueene /ayma'aá ti'imiitá a axweesanoó ganaá'. Axweesante'eé' i tawo ki/ká. Umuú heewo ni dir'eenií tumbarara'aat. Umuú heewo lo'o gan /aay kuwa inkihhím dir'eene.

²⁴ Inooín daanduueene tan ooi, «Gan'amu nee /uuru i dír AAKOÓ MUNGÚ kilós i dirii'iyá'.» Kudá' sleémeero ngwaa buhhtisiye' nin hardihiyá' kiri mureekees.

²⁵ Xwaylár Israeli baali ga sleér nee xirfuuwo dír AAKOÓ MUNGÚ wa aleeró.