ISAYA 43 - Biblía Axweesantá Hhohho' ar Mungú 2004

Al'axweesantá Mungú ar mukós nguwa ba/amisi

¹ AAKOÓ MUNGÚ, Kudá' kuungaá múk Yakobo naa tleehh, kudá' kuungaá múk Israeli naa buqumbuqun, i kaahi, «Ma da'ayumitaara', asma kuungá' naa ba/amís. Aníng kuungá' naa ateét as tawa kwe'eé'.

² Qoomár kuungá' bar warahhá' ar baraá ma'aá yaariir, aníng nee kuungá' a dinkwa. Yau kuungá' nu hayohiaaká. Qoomár kuungá' bar baraá ásltár warhhá' tam tsángw asla kuungá' nu sloohhiiká.

³ Asma aníng a AAKOÓ MUNGÚ, Munguúhúng, Kudá' Hhoohhoó' oo Israeli, ba/amusmoohúng. Yaamaá Misri afkuhúng nguna /ayiyé', yaamaá Kushi nee Seba ina kuungár waa'aláh.

⁴ Asma kuungá' a múk slahhaá' dir'eene, nee oo ni ilaiwawaa/, aníng kuungá' nu slaá'. Aníng múk hatlá' u máw as kuungá' nuwa slaw, xoordaá hatlá' in waa'aláh ar kuungá'.

⁵ Ma da'ayumitaara', asma aníng a dinkwa nee kuungá'. Aníng xwaylarhúng ngi da/aáw wa ki/ís. Aníng kuungá' nu burumbuúr bihhaá /uwaá wa ale.

⁶ Aníng bihhaá /iya in baw, ‹Muk'eé' geemawaak.› Bihhaá basa ngiri baw, ‹Muk'eé' mu ila/amara'.› Daaqay'eé' amór saáw wa ki/isare' nee dasuueé' amór alhhe'eesoó yaamuú wa ki/isare'.

⁷ Umuúqo heewo oo taa ateét ar umuueé', kudá' naa tleéhh as xirfueé', kudá' naa buqumbuquúm nee naa tleéhh.»

Xoorór Israeli a lamabu'uusér gadiyér Mungú.

⁸ Mukwí geerií duuxare', kudá' ilaá koóm ala tam adoorihe i xumisiaaká, mukdá' iaá koóm ala i axmisiaaká.

⁹ Xoordu sleémeero ni dinkwarií burumburitiye', muu ni dinkwár i haraki/i, Xáy, baraá tla/angw'ine heé kangwsíng ngu alki/iít, nee oo muruudá' aa waaraahh ngu laqaám s heemá? Inooín lamabu'uuser'ín ngi huwiye' ar gi aleekalaa/ Inooín ka iiárií qaasi iwa kat, «Kaangwí oo tsuwa ló'.»

¹⁰ AAKOÓ MUNGÚ i kaahi, «Kuungá' a lamabu'uuser'eé', nee sagadiyuuser'eé' ar naa tsawaár, as kahhó' aníng iwa xua' nee iwa haratlintia', nee kawa tsahha' adór aníng tar Mungú. Mungú geeraaeé' gaa haar i kaahh, nee sleeme oo ta aluueé' wa tleehhi i kaahh.

¹¹ Aníng kilooeé' an AAKOÓ MUNGÚ, ba/amusmoó hatlá' i kaahh aqo har án kilooeé'.

¹² Aníng ana ilahanimiís nee ana ba/amiimís, nee ana alki/iít qoomár munguú hatlá' iwa kahhi baraá tla/angwhunge, nee kuungá' a lamabu'uuser'eé'. AAKOÓ MUNGÚ tí gana oó'.

¹³ Aníng an Mungú, iimír hamí wa tleemu ay alhhe'eesaay, aníng an Inós. Heé gawaá dabaeene kuungá' nu tuú/ i kaahh. Heé gadiyér'eé' ga baáq a heemá?»

Kotsoqootár baraá yaamaá Babuloni

¹⁴ AAKOÓ MUNGÚ kuduú Ba/amusmoohúng, Kudá' Hhoohhoó' oo Israeli, i kaahi, «Aníng slaqwaruuse a ya/aáw Babuloni as kuungá' afér baraá gixsa kawa giqay, qwal/uú múk Kaldayo iri warqáy tari tsuunqusmo.

¹⁵ Aníng a AAKOÓ MUNGÚ, koohúng kudá' hhoohhoó' kuduú Tleehharusmoó Israeli, Waawutmoohúng.»

¹⁶ AAKOÓ MUNGÚ i kaahi, «Kudá' loohi gaa tla/ángw tláwtár tleehh, kudá' loohi gaa tleehh ar baraá ma'aá yaariir.

¹⁷ Kudá' slaqwaruuse nee gaardu, nee faras, nee miguuse gaa yaamií daahh. Kudá' gaa yaamií hhaáf, niri baloo sihhiti'iiká, Kudá' gaa adór asltá wa slaptís i kaahi,

¹⁸ ‹Muruú aa waaraahh mu inslaslawara' laqaá muruú aáng mu aldakuutara'.

¹⁹ Ga/aawaak, aníng muruú /abén u tleéhh muruuwí hám naa qaroó ti'iít, kuungá' ugwa aandi'iikáhe? Aníng loohi a tleéhh ar baraá tla/ángw darma, nee yau ngiri baraá xaanxáy wa wa/ás.

²⁰ Makaá sla/a aníng iri ilaiwawa/iyá' intsaawe nee sakweluuwo, asma aníng ma'aay ngin baraá darmuú wa duúx, yau ngin baraá xaanxáy wa wa/ás. As muk'eé' kudá' naa tsawaár ma'aá wahaangw ngiwa slay.

²¹ Mukdá' naa tleéhh as aníng as xirfuueé' nguwa alki/itiya'.› »

Tlakweemaá múk Israeli

²² «Tam adoorihe kuungá' múk Yakobo, aníng iga firindi'iiká, kuungaá múk Israeli aga slaaqaté' as aníng.

²³ Kuungá' aníng iga bee/ángw ilahhooár dá/tí hubi'iiká, laqaá iga ilaiwa/i'iiká ar ilahhooár muruú ta tsu/i. Aníng kuungá' naa al'iloouwiiká ar ilahhooa, laqaá naa slaaqatisiiká ar ilahhooár mooyángw tsuú' ar ta da/aa/an.

²⁴ Aníng kuungá' iga mooyángw tsuúi tlaxwi'iiká ar peésarhúng. Laqaá aníng iga aaxisi'iiká ar ilahhooár muruú ta tsu/i oo wahhaár. Ala aníng tlakweemaahúng iga al'iloouyé'. Aníng iga slaaqatisé' ar dakumisuuhúng.

²⁵ Anínguú kilá' an kudá' tlakweemaahúng gi hamtliít as aníng kilooeé'. Aníng tlakweemaahúng i baloó inslawaaká.

²⁶ Aníng inslawtisaré', qwalaasé' a dinkwár wa axweesaán, sakwasleemarhúng kaahare', as kahhó' tunduwa tsaahhi adór múk ganaá'.

²⁷ Baabuúhúng kudá' úr tlakweema gina tleéhh, kudá' múk haraki/imisá' aníng ina tlakweemáy tleehhiyé'.

²⁸ Gawaá adoorihe aníng geeraharuuseedá' hhohho' an meeta gaás. Aníng múk Yakobo nguri hhaamiís, nee múk Israeli nguri máw kuwa /oosliislin.»