ISAYA 42 - Biblía Axweesantá Hhohho' ar Mungú 2004

Sagadiyusmoó Mungú

¹ Ga/aawaak, sagadiyusmooeé' kudá' naa /uurií qaás, kudá' naa tsawaár, kudá' muunaáeé' gwaa qwal/aas. Qeeruueé' ugwa baraawós i qaás. Inós xoordu gin sakwasleemár ganaá' i huuw.

² Inós i /aa/iiká laqaá i tseeiiká, laqaá afoorós ka axasiiká baraá lohduuwo.

³ Inós daaír qetángw slaa' ga geeqayká. Tam taámbír quu' ga gaasiiká. Sakwasleemár ganaa' gan huuw ar inkihhimu.

⁴ Inós i diqay tsatitiiká laqaá i munesi'iiká. Ay dír sakwasleemár ganaa' ngay gawdeesi baraá yaamuwo. Yaamaá sawen hara'ayaarós ngin daamaraná'.

⁵ Adoorí an adoodá' AAKOÓ MUNGÚ i kaahi, Inós an kudá' doori nee yaamu gaa tleehh giri intláh, Inós an kudá' yaamu gaa tleehh, umuúqo gár baraadá' i diriia, Kudá' múk baraá yaamu gwa hiinslií haniis, kudá' qeeruuwós gwaa haniis dír múk baraá yaamuú wa hoót.

⁶ Anuú AAKOÓ MUNGÚ, aníng kuúng una ateét ar hotaá ganaa'á', ugwa dawa óh nee u de'eém. Ar kuunge aníng alqado a tleéhh dír muu sleémeero, kuúng u gwa/aateema tleéhh dír xoorduuwo.

⁷ Taampu in ila' qaytsitís, múk baraá tseegamo kuri gwét, nee mukduú baraá giwti kuri duux.

⁸ Aníng umuueé' a AAKOÓ MUNGÚ, xirfuueé' u hanisaaká dír heé hatlá', laqaá xirfayemisuueé' u hanisaaká dír munguaá murslaaqat.

⁹ Ga/aawaak, muruudá' naa geerií oó' aa tleehharuút, hám daxta a muruú /abén un káh dír ira ti'itiiká aníng un oó'.

Daa'ángw xirif

¹⁰ Daa'ángw /abén daa'aak dír AAKOÓ MUNGÚ, hhapeemo sleémeero xirfuuwós ngu daaiye'. Gimsé' tlawi i /orotl nee umuúqo gár baraadá' i diriia, ayeemaá sawen nee yaamuloouuser'ine.

¹¹ Xaanxaay nee gixsaduwós sleémeero afo ngi tleesiyá'. Ayeemaá yaamuloousér Kedari xirif ngu daaiye'. Yaamuloouusér Sela daa'ángw bara/ ngu oohiye'. Inooín i gawaá sagér tlom'ií wa tseeiye'.

¹² Inooín AAKOÓ MUNGÚ ku xirfú haniisi, nee xirfuuwós ku alki/iiti umuú diiro.

¹³ AAKOÓ MUNGÚ ina geerií ti'iít adór pihhusmo, adór slaqwarusmoó slaáqw baraá slaqwaraaro, oo aa /aa/, oo tsee/amiím, inós /uuruuwós gun dír wakuuseerós i laqán.

Mungú al'axweesani gaa oó' ar mukós nguwa alee/iisi

¹⁴ Har afiqoomár yaariire aga xasliít, aga tawo xasliít, tiri il/aám, ala hamí a /aá/ adór /ameenír dír asltá xwayla, tidá' /iif hiinsluú urene.

¹⁵ Tlom'i nee gongooamawo i hhitiím, sla/a sleémeero a kahaás. Yau i yaamaá kaahaar tleéhh, tlehheeso i /oomeés.

¹⁶ Aníng múk taampu un geerahaár ar loohír i baloó xuiaaká. Inooín in geerahaár baraá loohír ni xuiaaká, Giwtír geeraaín an warqeés tawa gwa/aateema, yaamaá wa/eeraá koomá' in tlapu tleéhh. Adoorí an adór ni tleehh. Nee án inooín i geexawaaká.

¹⁷ Kudá' munguaá slaqsi'i awa taa tleéhh ngi harahhifiitá' ki alií warqees kiri ló'wa mureekees, kudá' kaahá' dír slaaqsi'iidií aleeró, «Kuungá' a munguiirén.»

Iiawaslér múk Israeli

¹⁸ Kuungaá matoóya, iia qaasaak, nee kuungá' taampu qaytsité'.

¹⁹ A heemá oo taampa ala aqo har sagadiyusmooeé', laqaá oo matooyi adór ya/abusmoodá' aníng naa ya/aáwi. A heemá oo taampa adór sagadiyusmoodá' aníng naa paraátl, laqaá oo taampa oo adór sagadiyusmoó AAKOÓ MUNGÚ?

²⁰ Kuungá' muruú yaariír ugwa aandé', ala ugwa tsahhi'iiká, iia i mak tawo dayá', kár ala i axamisiaaká.

²¹ AAKOÓ MUNGÚ ina qwalaá/ as daanduú gana'aamuuwós, dabeerós gana iiatleereés nee gana xirfayeés.

²² Ala mukwí an múk taa fisiisín, nee taa mura' hayóh. Sleémeero kaa ohín nee baa'a, sleémeero kaa luú/ baraá doó tseegma. Inooín a adór makaá ta slakaati, kudá' handá' heé gi /iís i kaahh. Inooín aa haasaáng kudá' handá' heé oó', «Ki/isak.» i kaahh.

²³ Heé baraá tla/angwhunge gaarí ga iiárií qaas, oo iia ga qaás nee gari axaas qoomár hi'iita?

²⁴ Xáy, heé Yakobo gwaa haasaáng tleehh nee múk Israeli gwa fiis, Xáy, a AAKOÓ MUNGUHEKÁHE kudá' atén taa sadakusaán, kudá' handá' lohuuwós ooharo taa siaán, nee dabeerós taa iialooesaniiká.

²⁵ Gawaá adoorihe inós gin i daa/atúy buhhtaawo, tiri doogiyá' nee slaqwara. Buhhtaawós inooín ngin al'oohiyá', ala inooín kaa gaárí xuiiká. Kaa mak daá/, ala inooín gar naa tsaahhiyé' i káhh.