ISAYA 41 - Biblía Axweesantá Hhohho' ar Mungú 2004

Axweesanoó' harahhifo

¹ Mungú i kaahi, «Kuungaásingaá ayeemaá afaá tlawi, xasliité', iia qaasaak, xoordu /uuruú /abén ngu slayá'. Ni tseewuye' as kangw'ín nguwa ooiya', Daqaní ni ooiye', ‹Qwalaas dinkwa as sakwasleema.›

² Heé heewí baaliliím umuú diiro gwaa da/aáwá sihhtis a heemá bar a aningeeká? Oo xooslu sleémeero gaa dabaawós í haniis, inós waawitá gun yaamií adah, guri teeri tlees ar paángarós, giri adór muundáy wá haritlees ar ga/aleerós.

³ Inós gin eehar nee iri waaraahh ar saxareema. Inós in gaanslár waaraahh adór heé yaamaá kal/amaaká.

⁴ Heé adoorí sleémeero a tleehharut gaa tleehh a heemá? Heé umuúqo qarto gaa iimír iimu/úngw wá ateet? An aníng AAKOÓ MUNGÚ kuduú iimu/uungw nee oo alhhe'eesaay, aníng aqo kudaádá' adoorí gaa tleehh.

⁵ Ayeemaá afaá tlawi muruuwí ngwaa ariyé' nay da'ayutiyé', yaamu sleémeero niri daaraxaatiyá', muu sleémeero tina burumbuúr niri hardihiyé'.

⁶ Umuú heewo i inslaawamoowós alee/imiis. Nee hhiyaawós gun babay, «Gám ma munesiaar.»

⁷ Heé peehhoó dakuút i heé sahaábú kwahhuút gurkwa/amis, nee kudá' peehhoó hhasliít, i kudá' asltá dukuúm harakeemiis nguwa babay, «Adoosíng i qoón.» Peehháy kun musmáráy muux as kahhó' iwa diingitiiká.

⁸ Ala kuúng Israeli a sagadiyusmooeé', nee kuúng Yakobo, una tsawaár, xwaylár Abrahamu mulqumooeé'.

⁹ Aníng kuúng una leéhh baraá hhapeemaá yaamu, kuúng una ateét baraá badu sleémeero awa yaamu, uwa babaw, «Kuúng an sagadiyusmooeé', aníng kuúng ugwa tsawaár, aníng kuúng ugwa kwahhiiká.»

¹⁰ Ma da'ayumitaar, asma aníng nee kuúng a dinkwa, ma amoqwaqwadimaar, asma aníng a Munguúwók. Aníng kuúng u /uurií doóg, aníng kuúng u ale/iís. Aníng kuúng u óh ar dakw'eé' oo doó /iyáy kudá' arba/tír koóm.

¹¹ Ga/aaweek kudá' kuúng ugwa i buhhiye', iga mureekeés nee kaa baál. Kudá' nee kuúng ti tlaampa'aamisá', inooín a gár tawo nee ki hhaamiis.

¹² Kudá' nee kuúng ti tlaampa'aamisá' kuúng in leeléhh ala i sleeraaká. Kudá' nee kuúng slaqwá', sleémeero a gár tawo.

¹³ Asma anuú AAKOÓ MUNGÚ, Munguúwók, dakók oo doó /iyáy un óh, nee aníng kuúng un babaw, ‹Ma da'ayumitaar, aníng kuúng u alee/iís.›

¹⁴ AAKOÓ MUNGÚ i kaahi, ‹Múk Yakobo kuungá' tam tundu daqe tlakwene adór tsuua, ma da'ayumitaara'. Kuungaá múk Israeli, AAKOÓ MUNGÚ i kaahi, án kuungá' nu alee/iís. Ba/amusmoohúng an Kudá' Hhoohhoó' oo Israeli.

¹⁵ Ga/aawaak aníng nu xooslmoó afa xaraásl oo xoosliingw tleéhh, xooslmoó /abén, afa xaraásl nee oo sihhnaá koóm. Kuungá' tlom'i i xoslá' nee kiri naasuurá', gongooama' kay muundáy tlehhá'.

¹⁶ Kuungá' in haritlesá' nee fur'a giri ar tleér, bambaao gari diyá/, nee kuungá' tay qwalala/á' dír AAKOÓ Munguúhúng wa aleeró. Baraá Kudá' Hhoohhoó' oo Israeliwo kuungá' tari xirfayeemisá'.

¹⁷ Múk narkuute nee oo gaa wásl bir ma'aá leelehhiitiyá', ma'aay i kahhiyá' waxeero hhehhuuín birna kahiyé'. Aníng AAKOÓ MUNGÚ i mu/aywaáts, Anuú Munguú Israeli i geexawaaká.

¹⁸ Aníng gawaá tlom'aá kaaharene yau ngi duúx, nee kutlaay baraá tla/ángw xatsoowo. Aníng xaanxaay u tlahhsár ma'aay tleéhh, nee yaamaá kaahaar nin kutloó ma'aay tleehhitiyá'.

¹⁹ Baraá xaanxaywo sahhti an dahaás, nee xaa'aá ta bay kakaya nee masqaryaán nee seituúni, baraá xaanxaywo xaa'aá ta bay beroshi, nee ta/eewi nee sonobaáriro i dahaás.

²⁰ Muu doóqa ga ar nee gari xuu', gari aldaakw, kari dinkwár wa tsaahh, adór AAKOÓ MUNGÚ adoorí ngira tleéhh, Kudá' hhoohhoó' oo Israeli adoorí gana tleéhh.› »

AAKOÓ MUNGÚ munguaá lama gaa waaqaá'

²¹ AAKOÓ MUNGÚ, waawutmoó Yakobo i kaahi, «Kuungá' munguaá xoordu, sakwasleemarhúng huwaare', axweesantahúng tidá' ta koonda ooár awaare',

²² muruú naa ti'iit atén bawaare', daqaní u alqaytsitaán, laqaá muruú aluú wa hardáh ooare'. Masók muruú hardáh u xuaán.

²³ Gimsé' gár aluú wa hardah ooare', as kahhó' atén kuungá' nu tsaahhaán adór tar mungui, gár hhoo' laqaá ar slahh'eemiis tleehhaak, daqaní doóqa atén a amoqwaraán nee tari da'ayutaán.

²⁴ Ga/aawaak, kuungá' a gaarooká, gadiyérhúng a tawo. Heé kuungá' naa tsawaar a gár tlaakw gana tleéhh.»

²⁵ Hee ngwa bihhaá /iikú wa duúk, inós ni hardah, inós ngwaa tsawaár bihhaá da/aáw wa ale, inós umuueé' gu oo', waawitá gun yaamií harakalaa/ adór baa/í adór tleeusmo tleeirós ngir lufu/aa/in.

²⁶ Heé iimír iimu/uungo iigu'utuuwí gwa oo', as kahhó' atén kuwa xuaan. A heemá heé adoorí ga geerií oo'? As atén tawa ooaan, looeema gaa oó', I kaahh tumu wák oo adoorí gaa oo', laqaá oo gaa alki/iit, Sleeme i kaahh tumu wák oo /aymi'iiwós gaa axaas.

²⁷ Anuú AAKOÓ MUNGÚ adoorí ana geerií oó' dír Siyoni, sleeme kaangwí hhó' nguri huúw dír Yerusalemu.

²⁸ Ala aníng niwa qaytsiít, tumu wák i kaahh baraá tla/angw'ine hara'ayusmo i kaahh, qoomár án bara yaahaás, mu/aywatsa i káhh.

²⁹ Ga/aaweek, munguii'ín sleémeero a al/ayma, gár tleehharo i aleeslaya' i káhh, slaqsi'ii'ín kudá' taa tleéhh a fur'ár tawo.