ISAYA 40 - Biblía Axweesantá Hhohho' ar Mungú 2004

Axweesanoó gurkwa/asa

¹ Munguúhúng i kaahi, «Muk'eé' gurkwa/asak, inooín gurkwa/asak.

² Axweesé' ar afór tsa' nee yaamuloouusér Yerusalemu, ádbawaak ar afór ur, inooín kibeeto' slaqwararhúng aa fák. Tlakweemaaín kaa gurtláy, AAKOÓ MUNGÚ inooín gaa slaáhh sagáwa tsár wa alé, asma tlakweemaaín kudá' sleémeero naa tleehhiyé'.»

³ Afo i tseeamiín baraá darmuú alé, i kat, «Loohír AAKOÓ MUNGÚ amohhe'eesaak poohoó loohi gan'asaak baraá xaanxaywo as Munguúrén.

⁴ Umuú tlapaaro ka hatsiis, umuú tloomaro nee gongoamoowo ki yaamií daahh, tlapu ki alqoomees, yaamaá guhhe ki gana'aas.

⁵ Daqaní xirfuú AAKOÓ MUNGÚ iri geehhooúy, muu sleémeero guri ar.» Asma adoorí AAKOÓ MUNGÚ gaa oó'.

⁶ Afo i kat, «Kaangwí tsee'eek.» Aníng niri oó', «Aníng gár ni tsee' a milá?» Iri beér, «Muu sleémeero a adór gitso. Nee hhohhoaarir'ín sleémeero a adór /ayór baraá qamu.

⁷ Gitso in kát, nee /ayo in /óts, AAKOÓ MUNGÚ fur'a birnga fukuku'uús gawaadár alé. Ar tsuwa ló' muu a adór gitso.

⁸ Gitso in kát, nee /ayo iri /óts, ala axweesantá Munguúrén in hotaatiín ay alhhe'eesay wasle.»

⁹ Kiíng Siyoni tsa/ám gawaá tloomár tleer, kiíng gixsár Yerusalemu, tseé' ar afór ur, ya/abtór hho' alki/iiteek gixsadaá Yuda kibeer, «Munguúhúng ni hardah.»

¹⁰ Ga/aaweek, Aakoó MUNGÚ ni hi'iit ar /uuruuwós, ar /uuruuwoosuú kilae in waawuti'ín. Mukdá' aa sláy tawa slaqweerós, i dinkwa nee inós. Mukdá' aa baraá slaqwarár wa sláy as iwa baalín, i geeraawós wá hi'iit.

¹¹ Daqtós gan /aymiis adór de'eemusmoó wa ale, nee deeloó bee/aangw gun gawaá dabaawósií oh, giri gawaá da/eewawósár loohiis, bee/ángw du'umiís idaahharo gun tseegiis.

Munguú Israeli Mungú kur qoomeesi i kaahh

¹² Heé ma'aá tlawi gaa qoomeemees ar dakós a heemá? Heé doori gaa qoomees ar dakós a heéma? Heé hhapér yaamu gaa qoomees ar de'eenti a heemá? Hee tlom'i gaa qoomees ar xooslmoó qoomeemes a heemá? Laqaá kudá' gongoama' gaa qoomees ar xooslmoó qoomeemes a heemá?

¹³ Heé AAKOÓ MUNGÚ gwaa fuquraangw gwa/atis a heemá? Laqaá hara'ayusmoó inós gu intsaahhatís a heemá?

¹⁴ Xáy heé inós gwaa hara'ayin tsaahha gari sláy i deéro? Xáy, heé gwaa intsaahhatis loohír gan'amuuwo a heemá? Nee heé gwaa sagalooárí haniis, nee heé gwaa xu'utírí haniis?

¹⁵ Ga/aawaak dirose xoordu a adór taxaatár ma'aay ar baraá sirwi. A adór teerír baraá xooslmoó tar qoomeemesi. Ga/aaweek, tam yaamaá niina awa baraá tla/ángw tlawi a adór teerír natsatsaa'.

¹⁶ Xaa'aá Lebanoni nee makaydaá Lebanoniro sleémeero i bu'uutiaaká ilahhooár da/ato.

¹⁷ Xoordu dír ilaawose a gár tawo. Inooín a muruú gaa wásl.

¹⁸ Xáy, Mungú nee heemá ki slaqamisi? Xáy heé kur qoomes a heemá?

¹⁹ Inós nee slaqsi'iidaá mungui taa dakuút ti slay'aaká. Slaqsaydá' taa sliík ar sahaábu nee tlaatlawtá taa muqslír /awaákár tleéhh.

²⁰ Laqaá slaqsoó taa xa'anoó gawít ar tleéhh, kudá' ta tsawaár as iwa slupuutiiká. Inós heé slaqsaydá' tleehharo gu xuú' gun leeleehh, as murslaaqatuudá' surukaaká nguwa tleehhi.

²¹ Xáy, gár ta xua' i káhha? Xáy gár taa axasé' i káhha? Xáy, iimír aange ado kinga ooiikáhe? Iimír iimu/úngw yaamuwo kaangwí ugwa xui'iikáhe?

²² Inós yaamu sleémeero gaa harweér, múk gawaá daanduú yaamu a adór tsaxwi'i. Inós doori gina hhaáf adór inqwaari, slám giri kikií' adór heémár hota.

²³ Inós waawitá gun gáwtá wa aweeriis. Geeraharuuse gawaá daanduú yaamuwo a adór gár tawo.

²⁴ Qoomár birka haátl nee birna harma/i'iyé', dír dee/aruuín ngura sihhi'iiká adór xa'anoó wa alé, qoomár AAKOÓ MUNGÚ inooín birnga ifaáhh aqo nin kahiyá', inooín bambaao ginar tleér adór muundáy.

²⁵ Kudá' Hhoohhoó' i kaahi, Xáy, heé ta aníngár qoomesa' a heemá? Xáy, heé adór aníng i deéro?

²⁶ Axáy gawa i qaytsitaak, heé muruuwí gwa tleehh a heemá? Inoósuwí an kudá' slawowós gi geeraharahaár, inooín sleémeero gin ateetín ar umer'ín, asma inós an kudá' aleesleemuú yaariír gu koóm, nee /uuruuwós ku yaariír, gawaá adoorihe ar qwaar tam ar wák i káhh.

²⁷ Kuungásá múk Israeli nee xwaylár Yakobo, ahaá mas wa/aa/usá' tawa kata', «Loohir'eé' kaa luú/ dír AAKOÓ MUNGUHE, Munguúeé' gana'amueé' gu gaárí xuiiká?»

²⁸ Ahaá kuungá' a xua'aakáhe? Asma kuungá' aga axasi'iikáhe? AAKOÓ MUNGÚ an Munguú alhhe'eesay wásl, Inós an kudá' yaamu gaa tleehh. Inós i slaaqatiiká laqaá i nusqutiiká. Xu'utirós tsaahharo ka gawit.

²⁹ Inós mukdá' nusqumiít gun /uurií hanmiis, nee kudá' aleesleemuú koma'aaká gin /uurií dogiit.

³⁰ Tam masoomba in nusqumít iri slaaqamít, tam masoombár daaqaay in huuhu'uún.

³¹ Ala kudá' sleémeero AAKOÓ MUNGÚ harahhifá', inooín /uuruú /abén ngu slaslayá', inooín tari adór gwaresuú wa gáwtí tláy ar hhampe'eeri. Inooín nin ti'ii'iná' ta baloó slaaqatiiká, tan hi'iimiit ta baloó nusqumiitiiká.