ISAYA 4 - Biblía Axweesantá Hhohho' ar Mungú 2004

¹ Qoomaadae /ameenár faanqw hhawaatuú wák gun ót tawa kaahi, «Gám atén muruú /aymaarén u /ayaán nee ti kiloorén tsiitimiisaán, ala atén ti duxut mureerén tí hingeeseek.»

Gixsár Yerusalemu ka /abees

² Baalaadae harma/itá AAKOÓ MUNGÚ i hhoohhoouúr iri xirfút, nee panaydá' aa meet oo múk Israeli mamaá yaamu kin ar daara/án nee tiri diidi'iimisiyá'.

³ Slám panaydá' aa Siyónírí meet nee kudá' taa geexáy baraá Yerusalemu, kin bay, «Múk hhohhó' oo Mungú.» Kuká' an kudá' taa gooín baraá kitaábuuwós tawa múk baraá Yerusalemúr wa hoót.

⁴ Qoomaadae Aako slasla/aruú /ameenár Siyoni nee tseerér Yerusalemu gun hhoohhooees ar qeeruú gi sakwasleemuút nee oo gi da/a/aám ar asla.

⁵ Aluuwo umuúqo diiro gawaá tloomár Siyoniro, nee wa/aamér dinku'uumár muko, qoomár tlaatla/ango AAKOÓ MUNGÚ gan huunkár tuuntuuk, nee xweeraawo gan tuuntuuk ar quui nee tsángw asla oo gwa/aát. Tam adoorihe xirfuú AAKOÓ MUNGÚ gixsa sleémeero gan tuuntuuk ar heémaarós, nee gari de'én.

⁶ Xirfuuwós dir'ine a adór mahhtír gi tuuntuuk qoomár siree/ír tlaatla/aango, nee an dír guwaay nee gaamboót qoomár bambaao nee tluwaywo.