ISAYA 39 - Biblía Axweesantá Hhohho' ar Mungú 2004

Ya/abuusér Babulónír daahh

¹ Qoomaadae waawutmo Merodak-baladan, garmoó Baladani, waawutmoó Babuloni ngiwa axaás adór Hesekia ira tiíq, nee adór ira huunguú/, guri ya/abuuseérí ya/aáw kuwa barwito'órí huwi nee qeemu dimbadimbé.

² Naagáy Hesekia mukdá' guri dahi'ís, do'oduú peésa kay baabatsi guri dir'íní laqán, peésa gari laqán nee sahaábuwo nee muruú ta naanúr tsu'umaamisi, nee di/tá tlaxo gawit, nee xooslár slaqwara sleémeero tidá' baraá do'ósí dirii'. Gár aa meetiís laqaamaro i káhh, ar baraá yaamuwose sa dawa.

³ Aluuwo aarusmo Isaya iri amór waawutmo Hesekia káy, guri báy, «Mukwí gár i kaahi a milá? Nee amór ni dahhiya' a amá niwa dirógí hardihiyé'.» Hesekia iri oó', «Mukwí amór i dahhi ka ló'wa saaw. A baraá yaamaá Babuloni.»

⁴ Isaya iri oó', «Baraá do'oge gár naa ariyé'? «Hesekia iri oó', «Umuú gár baraá dooeéní diriia ngaa ariyé', gár naa meetiís laqaamaro i káhh.»

⁵ Aarusmo Isaya Hesekia guri báy, «Axweesantá AAKOÓ MUNGÚ Aleesleemusmo iiárií qaaseek,

⁶ ‹Ga/aaweek, baala ni xeér umuú gár baraá do'ógí diriia, nee muruudá sleémeero xwayliteérók aa baabáts ay laarí, sleémeero kinar tláy ay baraá yaamaá Babuloni, gár ta meetisi i káhh tam ar wák. Anuú AAKOÓ MUNGÚ tí ngina oó'.

⁷ Slám baraá daaqaywoge, bahh'ale kunár tláy baraá yaamaá Babuloni, kuri karmumúy as tawa gadiyuusi baraá doó waawutmoó Babulonír wa ale.› »

⁸ Hesekia Isaya guri báy, «/Aymuusíng AAKOÓ MUNGÚ i kaahi i qón.» Asma ina baraá muunaáwósí oó', «Deelo sleémeero ar slafingw'eene wayda nee amohhooa i dayá'.»