ISAYA 38 - Biblía Axweesantá Hhohho' ar Mungú 2004

Tiqtír waawutmo Hesekia nee hungu/umaawós

¹ Deeloodae waawutmo Hesekia tiqti guri eér, gwa'ara gari nakaá/. Aarusmo Isaya garmoó Amos iri amoorós káy, guri báy, «AAKOÓ MUNGÚ i kaahi, kuúng gwa'araro a pa/ká, gimáy kángw do'ók qoomeeseek.»

² Naagáy waawutmo Hesekia iri warqáy amór koo/i, AAKOÓ MUNGÚ guri firín,

³ iri oó', «Aá AAKOÓ MUNGÚ, án kuúng u harhheehhe'eés, na'amaamís, adoodá' aníng kuúng ura sagadiyumaamiís ar inkihhimu inslaweek, slám ar muunaáeé' sleémeero, nee muruú qoóm una tlehhahhiít dír geeraawoge.» Hesekia Mungú guri ló'wa ii /aa/amín.

⁴ Aluuwo AAKOÓ MUNGÚ iri axweés dír Isaya, guri báy,

⁵ «Tláw Hesekia ku beer, AAKOÓ MUNGÚ, Munguú baabuúwók Daudi i kaahi, ‹Aníng firoorók aga axaás nee hhirhheeriwók iga ár. Ga/aaweek, aníng slafiingók ngwaa doók oo harqoomoó kureeraá mibaá nee kooán.

⁶ Aníng kuúng u tuú/ dinkwa nee gixsarihe dír waawutmoó Ashuruwo nee gixsarí ngiri xuúm.› »

⁷ Isaya guri báy, «Layár amór AAKOÓ MUNGÚ daahh ar kuúng ta aan a tí as kawa tsahh adór AAKOÓ MUNGÚ al'axweesantós ngir boo/eés.

⁸ Aníng mahhtidár dír tsa/a/amtoodá' Ahasi aa tleéhh an alií surkuús ar harqoomoó digiruú mibaangw.» Mahhtidá' iri surúk ar harqoomoó digruú mibaangw.

⁹ Waawutmo Hesekia iwa huunguú/ daa'angwí guri daá' as sluufaay.

¹⁰ Aníng ana oó', «Baraá na/uumar'eene aqo an gwaá', aníng taa qaroó amohhe'eés niwa dah baraá gi'i deelo sleémeero ar naa meti baraá slafingw'eene.

¹¹ Ana oó', Aníng AAKOÓ MUNGÚ u sangw baloó araaká, baraá yaamaá múk slafa tam heé ni ar inqo kaahh, baraá tla/ángw yaamuloouusér daanduú yaamuwo.

¹² Didá' ni hoot kaa hingeés dir'eene adór heémár de'eemusmo wá ale, slafingw'eé' una amohhe'eés adór heé tlabaá hirimamiít neewo ngir marmaraarin ana oó', Mungú aníng iga sií' xweera nee tlaatla/ango aníng in gaamiis.

¹³ Xweeraawo alee/isay una firaariím ay matlaatle, faduueé' gina giqáy adór dirángw wa alé, tlaatla/aangw nee xweeraawo aníng ina gaamiís.

¹⁴ «Aníng ana adór halee/amó wá inini'imamiít ana hununu'umamiít adór hhookír wá ale, ilaeé' niri maa/uumitiyé' as xumsír gawa, ana oó', ‹Aá AAKOÓ MUNGÚ, aníng a slahhaá' kuúng masók a slafingw'eé'.›

¹⁵ Ala gár ni oo' a milá daxta, asma inós ina i axweés, inósuú kilá' gari tleéhh, gu'uter'eé' ina daandií /akút, asma slahh'amuú na sláw baraá muunaáeene.

¹⁶ «Aá Aáko, muu in slaaf ar muruuwí, nee aníng sleeme an slaáf ar muruuwí, slaqwahhooárí ki/isáng nee slafisáng.

¹⁷ Slahh'ámudá' naa sláw dir'eene an hhooa, ala kuúng slafingw'eé' una tú/ dír afkú bohóngw gi'i wá ale, asma kuúng tlakweemaaeé' sleémeero ina amór aluuwógí kwáhh.

¹⁸ Asma baraá gi'iwo heé kuúng u sluufiís i kaahh, tam baraá gwa'araro heé kuúng u xirfayeés i kaahh, mukdá' sleémeero aa baraá gi'ií /eet inkihhimuwók ngu harahhifiaaká.

¹⁹ Múk slaáf kilós an kudá' kuúng u sluufiís adoorí aníng laarí ni /imiis xwayliité inkihhimuwók guri dír na/ii'íní alki/ít.

²⁰ «AAKOÓ MUNGÚ aníng i ba/amis atén tari daa'aán ar seése, baraá doó AAKOÓ MUNGÚ wá alé slafingwrén sleémeero.»

²¹ Naagáy Isaya iri oó', «Tlawsé' maandasmoodá' taa tleéhh ar mamaá /aantsí taatahhaak ku qasá' gawaá umangwdá' as iwa huungu/i.»

²² Hesekia iri malé oó', «Laya a milá as aníng niwa amór doó AAKOÓ MUNGÚ kaw?»