ISAYA 37 - Biblía Axweesantá Hhohho' ar Mungú 2004

Waawutmo gurbu'utá Isaya ngiwa yaahaás

¹ Waawutmo Hesekia kaangwí nguwa axaás, tlabaawós gina feehhamiís as gurhaami. Guniyadu giri tsiít, iri dáh baraá doó AAKOÓ MUNGÚ.

² Eliakimu kuduú sagesihhtusmoó doó waawutmo guri ya/aáw dinkwa nee goousmo Shebna nee kaahamuusér Mungú ar uren tawa daqay amór aarusmo Isaya garmoó Amosi, inooín guniyadu ngaa tsiitiyé'.

³ Nguri bayé', «Waawutmo Hesekia i kaahi, ‹Laarí a baalár gurhaami, nee ar tiwa iigahhmiiti, nee ar tiwa mureekeemisi, atén a adór /ameenír xwaylár slaa', ala /uuruú ir /uumpu'us i kaahh.

⁴ Dooqa AAKOÓ MUNGÚ, Munguúwók /aymi'iidaá geeraharusmoodá' gaa qo axaás, kudá' aakoowós waawutmoó Ashuru naa ya/aáw as Munguú slaáf nguwa niqisi. Nee doóqa AAKOÓ MUNGÚ Munguúwók inós gu iigahhaat daanduú /aymi'iidá' aa axaasi. Gawaá adoorihe mukwí aa meet aleefiriimang.› »

⁵ Qoomár sagadiyuuseedár waawutmo Hesekia iwa hardát dír Isaya, Isaya gari báy,

⁶ «Tlawsé', aakoohúng ku beera', AAKOÓ MUNGÚ i kaahi, ‹Ma da'ayumitaar as /aymi'iidá' taa axamís kudá' sagadiyuusér waawutmoó Ashuru aníng iwa niqimís.

⁷ Ga/aaweek, aníng u qeeruukówí haniís, inós xuuraai gari axaas, iri baraá yaamuuwósí kii/. Inós bira hardáh ayaawós kun gaas ar paánga baraá ayaawósú kilá'.› »

Múk Ashuru iwa malé múk naxór áy

⁸ Geeraharusmoodá' iwa kií/ gari axaás adór waawutmoó Ashuru ira quútl baraá Lakishiro, iri tláy naxés gixsár Libna gana i haratláy.

⁹ Waawutmo gari axaás adór Tirhaka waawutmoó Kushi nir amoorósí slaqwarár áy, inós ya/abuuse gari ya/aáw amór waawutmo Hesekia, i kaahi,

¹⁰ «Waawutmo Hesekia oo Yuda ku beera', ‹Munguúwók kwisíng ta harahhifafit mu ya/amaar uwa al/agin ar uwa babay, Yerusalemu ka baloó hayohiiká nee waawutmoó Ashuru.

¹¹ Kuúng aga axás adór waawituú Ashuru ayeemo ngaa /imamiís, nee adór kira hhaamimiís. Kuúng kawa xu' aqo tsuwa /uúra?

¹² Xáy, munguiidaá xoordu, xoorduuín nga tu/ií'i qoomár baabuúeé' Gosani, nee Harani, nee Resefuwo ngiwa hhaamiís dinkwa nee múk Edeni kuduú Telasárír hoót.

¹³ Xáy, waawutmoó Hamati i amá? Nee oo Arpadiro nee waawutmoó gixsár Sefarfaimuro nee oo Henaro nee oo Ifaro gaálaay?› »

¹⁴ Waawutmo Hesekia barwito'o gari sláy dír ya/abuusér wa alé. Gari soomuús, iri tláy ay baraá doó AAKOÓ MUNGÚ barwito'oodá' gari gweér dír geeraá AAKOÓ MUNGÚ.

¹⁵ Hesekia AAKOÓ MUNGÚ guri firín, iri oó',

¹⁶ «Aá AAKOÓ MUNGÚ Aleesleemusmo, Munguú Israeli kudá' aleesleemuú koóm daanduú keruúbiro, kuúng kilók an Mungú daanduú waawuti'iima sleémeero ar barakaá yaamu, kuúng an tleehharusmoó doori nee yaamu.

¹⁷ Aá AAKOÓ MUNGÚ, iia qaaseek, axamiís. Aá AAKOÓ MUNGÚ, ilawoge qaytsiít, ta xumís, axweesanaywí sleémeero oo Senakeribu axaaseek, kwí naa ya/aáw iwa Munguú slaáf niqin.

¹⁸ Ar looeemaawo aá AAKOÓ MUNGÚ waawituú Ashuru xoordaá yaariir nee ayeemooine ngina xooro qwaareesiyé'.

¹⁹ Mungui'ín kiri baraá ásltí supín, asma gaa a munguaá kil'eeká. Ala a gadiyér dabaá muu. Gaa a gufteeri nee tla/u. Gawaá adoorihe munguiidá' kiri suwatsaát.

²⁰ Gawaá adoorihe hám daxta aá AAKOÓ MUNGÚ Munguúrén, atén ti ba/amis baraá dabaá Senakeribuwo, as kahhó' waawuti'iima sleémeero ar baraá yaamu ngiwa xu' adór kuúng kilók tar AAKOÓ MUNGÚ.»

Ya/abtór Isaya amór waawutmo

²¹ Aluuwo Isaya garmoó Amos iri ya/abín amór waawutmo Hesekia, iri oó', «Tí an tidá' AAKOÓ MUNGÚ i kaahi, Munguú Israeli, as aníng iwa firiín daanduú Senakeribuwo waawutmoó Ashuru.

²² AAKOÓ MUNGÚ waawutmoodá' gun babay, ‹Gixsár Siyoni tidár dasír maa/i kuúng una waaqá' uri niqiín, Gixsár Yerusalemu tidár adór dasír hhoohhoo' sagós guna mumukumís aluuwók wa ale.

²³ Ala kuúng heé taa niqiín kuri /ooslisliín a heemá? Heedaá heemá taa daanda axwés, heedá' taa niqiín kuri biibisiín a heemá? An aníng kudá' hhoohhoó' oo Israeli.

²⁴ Kuúng sagadiyuuse ngina ya/áb as anuú Aako iwa niqina', kuúng ana ó', ar gaarduueé' kuká' yaariire, Aníng an tsa/ám ay gawaá sagér tlom'i, ay gawaá tsitsenaá tloomár Lebanoni, sahhtaarós tidá' tledaadet an daraáhh nee misunobarirós tidá' ló'wa hhohhoe, niri hardáh ay gawaá tsitsenowós, nee baraá gartós tidá' ur.

²⁵ Hhaleeri ina foliít ma'aay ngiri wahaám aníng yaaér Misri ngiri kahaás ar tsa/oó yaaer'eé'.

²⁶ Kuúng kaangwí ugwa axaskáhe adór aníng kangw'eé' ngura qoomeés iimír aange, iimír aange ador'eé' tí ana qaroó qoomeés tí hám laarí tleehharuumiit tí kuúng gixsadaá koo/i gawden kiwa hhaamís tari ufér tsa/eewasi.

²⁷ Qoomár /uuruú yaamuloouusér gixsaduudá' bira faák bir kaa dae tsaát kiri amoqwaareés, Inooín tarí adór balángw baraá qaymo, tari adór gitsór dutlutluu/ ar baraá qaymo, tari adór gitsór naa gawaá daanduú dó' wa ti'it, danú gan kahaas dír ira uraareriiká.

²⁸ Ala aníng hotaawók i xuú', nee bar ti'imít u xuú' tam bar darát sleeme, tam buhhtaawók daanduueene i xuú'.

²⁹ As kuúng tawa aníngí búhh nee as axweesanaywók kuduú taqnaa/i niwa gawaá iaeéní hardáh, aníng duungaawók i óh ar baratsufaay, nee himuueé' un afkók ar tseék, aníng kuúng uri watlís ar loohi tidá' aáng nira daqeér.› »

³⁰ «Hesekía, layár kuúng ta aan a tí, kurkí gár ta /aga' a kwaláydá' naa ti'iit baraá qaymór wá ale, kurko sleeme aqo adoorí. Kurku tame ta dahasiín nee ku fiiqít, sabiíbu ku dahasá' nee mamuuwós ki /agá'.

³¹ Panaydá' aa meet baraá tlahhoó Yudawo in doogín, niri tlahhiyá' adoodár xa'ano dee/ár ngur yaamií sihhaahhin nee gawto na/ii ngir ló'wa laqwaali.

³² Asma panoó aa meét i deer baraá Yerusalemuro, nee gawaá tloomár Siyoniro múk kotsqoót i deer. AAKOÓ MUNGÚ Aleesleemusmo adoorí gaa tsabín ngiwa boo/eesi.

³³ «Gawaá adoorihe AAKOÓ MUNGÚ daanduú waawutmoó Ashuruwo i kaahi, ‹Waawutmoodá' i baloó baraá gixsárí dahiiká, tam mahaangw gu baraakií tsaxaariiká, sleeme ni dír gixsarí tseewuyká ar gaambu.

³⁴ Laqaá gixsarí ga harweeriiká, anuú AAKOÓ MUNGÚ a kah, Inós in waatl ar loohidár kilá' nira amoorí hardáh, nee i baloó baraá gixsarí kayká.

³⁵ Asma aníng gixsarí an xuúm nee an ba/amís daanduueé' wá ale, nee as daanduú sagadiyusmooeé' Daudi.› »

³⁶ Naagáy malaykamoó AAKOÓ MUNGÚ xweeraawo ina tláy slaqwaruusér Ashuru ar kume tsiiruú wák nee mibeeri dakaát nee kooán gari slururu'uús. Matlaatleero looa niwa tleér naxés mukwí sleémeero an tu'u.

³⁷ Naagáy waawutmo Senakeribu oo Ashuru iri tláy, iri waátl, iri Ninewír wa hoót.

³⁸ Looarka wake waawutmo ina sluufmisuú áy baraá doó munguúwós kudá' ta bay Nisroki. Daaqaywós kudá' ta bay Adrameleki nee Shareseri nguri gaasiyé' ar paánga, niri /akumiitiyé' yaamaá Ararati. Naagáy garmaawós kudá' ta bay Esarhadoni iri waawuti'ín kitaangós wa alé.