ISAYA 35 - Biblía Axweesantá Hhohho' ar Mungú 2004

Loohír hhohhoaari

¹ Darma nee yaamaá kaahaar i qwalaa/iyá', xaanxaay i qwalaa/ iri /ayuus.

² /Ayór yaariir adór tiqár wariídi gari /ayuus, Iri baraa/, iri daa' ar qwal/uú yaariír, xaanxaay xirfuú adór kuduú Lebanoni guri sláy, xirif sleémeero oo Karmeli nee oo Sharoniro, muu xirfuú AAKOÓ MUNGÚ guri ar, nee adór Munguúrén kur úr ngiri ariyá'.

³ Mukdá' aa daba' tsatiit /uurií qaasaak, mukdá' aa diqiyaá ya'a' tsatiit, diqiya' kwa/asak.

⁴ Múk da'ayumiít ku beera', mune hhe'eesé', ma da'ayumitaara', Ga/aawaak, Munguúhúng ni hardah as li/aay nguwa bui, Inós li/aay gun buu' gawaá wakuuserhúng. Inós ni hardah as kuungá' nuwa ba/amisi.

⁵ Daqaní taampu niri qaytsitiyá' nee iawasli iri axás.

⁶ Taqoori iri ni/iín adór saaragmo, nee afaa wasli iri dá' ar qwala/. Ma'aay baraá xaanxaywo niri ti'iitiyá' nee duxe niri wá/ baraá xaanxáy wa alé.

⁷ Hhasángw adór asla oo baraá xaanxaay iri tlawtá ma'aáy tleehhiit, nee yaamaá naa waxiitiye' niri kutltá ma'aay tleehhitiyá', didá' tawér i hooti ma'aay ngiri dalaa/iyá' tsaaráy ngiri alti'iit, tari adór daa'a.

⁸ Loohír ur baraadae i deer, inós ka bay «Loohír hhoohhoo'.» Múk daba' tlákw loohidá' ga kala/iiká, ala aqo har múk Mungú kilooín. Inooín tam ki iimi bo/e ala i qwaariiaaká baraá loohidae.

⁹ Baraadae diraangw i kaahh, tam makiito'ór xaraasl i baraadár waarahhká, makaá adoorí baraadae ki baloó ariiká, ala loohidá' múk gar ohiím a har mukdá' taa ba/amís kilooín.

¹⁰ Mukdá' AAKOÓ MUNGÚ aa ba/amís i wayaa' nin hardihiyá' ay Siyoni ar daa'ángw bara/, qwal/uú alhhe'eesay wásl i baraá muner'ín. Inooín nin hootiyá' ar qwala/ nee bara/, gurhaami nee /ifooro ni faakiyá'.