ISAYA 34 - Biblía Axweesantá Hhohho' ar Mungú 2004

Mungú wakuuseerós ga muux

¹ Aá xoórdu, tseewuwaré', iia qaasaak, aá muú, iia qaasaak yaamu sleeme i axaasiye' nee umuú gár baraadií diriia. Yaamu nee umuú gár baraadá' wa hootá'.

² Asma AAKOÓ MUNGÚ xoordu sleémeero gaa i buúhh, ina amór slaqwaruuser'íní qa/iít buhhtaawo, inós gina qwaareés giri haniís kiwa tsu/i.

³ Tu'uuín kin tsee/ií kwakwaahh, tsutsuír tu'uuín yaamu giri tsatát, Tseerduín niri gawaá tlom'i wá wa/iyá'.

⁴ Slaqwaruusér gawaá doori sleémeero iri hhitirút, doori kiri adór slaambare/ír wá marmaar, slaqwaruusér doori sleémeero iri huuhu'uún, adór loo/ór sabiíbu ir pahhaahhat, nee adór loo/ór /aantsí ir huuhuaaiin.

⁵ Asma paángar'eé' aga amohhe'eés gawaá doorí wá ale. Ga/aaweek, nin awét as múk Edomu nguwa tlaq, nee múk naa istí tsaát nguwa qwaarees.

⁶ AAKOÓ MUNGÚ i paángár kón, aa da/atuúr tseerero, wayo ngaa oohiyé' tseerdu a adór kuqaá deeloó bee/aangw nee oo aara, tlawaanqa a tidár guumbayayáuú gwaandaawe. Asma AAKOÓ MUNGÚ amór Bosraro i ilahhooár muruú ta tsu/i ga hanmiis, tsu/utár yaariir baraá yaamaá Edomuwo i deer.

⁷ Sare/ kun tsuu/ dinkwa nee inooín, awér batlaay nee ar urene kiri tsuu/, yaamuuín niri naa/iyá' tseerduuwo, hhaper'ín iri wahhát as di/i.

⁸ Asma AAKOÓ MUNGÚ baala ga qaás ar li/aay nguwa bui, kurkú li/oó Siyoni nguwa bui dír wakuuser'ín.

⁹ Laámi niri wá/ baraá yaaér Edomuro, hhapeerós iri kiberiíti tleehhít, yaamuuwós niri warqayá' tawa adór laámír asla i /ak.

¹⁰ Tlaatla/aangw nee xweeraawo asltí i baloó gwa'aká, quuirós in sihhmaamít ay alhhe'eesay wasle. Yaamu iri xaanxaay tleehhitiyá' qari sleémeero, heé baraá yaamuudár waaraáhh i kaahh kureerisleém.

¹¹ Ala deelgaasi nee samta ngin aaliyá', hárkoonki nee xwaa'aro niri baraadá' wá hootiyá'. AAKOÓ MUNGÚ giri tlaahhírí kwaahh, hhutlmoó tlaahhi qamiingw guri gawaá muk'ín oo uréní qaas.

¹² Yaamuudae tari ooi, «Waawutmo i kaahh tam geeraharusmoó daadáw i kaahh.»

¹³ Slaamboqáy niri ti'iit gawaá koo/ir'ín tidá' gawdén wa alé, te'eesmó nee laqayawo niri ti'iitiyá' baraá koo/ir'ín wa alé, tari dír tawer iwa hooti, sakwel iri baraadií waatl.

¹⁴ /Aawi nee baha tiri baraadií doogiyá', manu tiri baraadá' wá ateetiná', xweera dir'ine tari adór tlaatla/aangw, dír ni huungu/uusiya' ngiri slayá' baraadae.

¹⁵ Hárkoonki in baraadií qanhhús iri baraadá' wa umiín, na/iiwós gin baraadá' wa piqmís niri baraá guruú hhampi'iiwósí darahiiyá', Baraadae na/aá gwares tin harati'imiitiyá', umuú na/aywo nee kuqá'.

¹⁶ Kitaábuú AAKOÓ MUNGÚ soomuusaak, tam makiito'ór wák ar taa dakuús i káhh, umuúqo makiito'ooro i deer nee hho'oorós. Asma AAKOÓ MUNGÚ tí afkose gaa hara'ayín nee qeeruuwós makayká' sleémeero gina burumbuúr.

¹⁷ AAKOÓ MUNGÚ umuú makiito'ooro gaa dirósí haniís, yaamu dakose gina ka'amiís dir'íní ale ar hhutlmoó qoomeemes. As ngiwa aaliya' ay alhhe'eesay wasle, niri baraadá' wa hootiyá' qari sleémeero.