ISAYA 33 - Biblía Axweesantá Hhohho' ar Mungú 2004

Firo as alee/isaay

¹ Tsaxwaawók kuúnguusíng hhitaatiím, ala kuúng taa hhitinká. Tsaxwaawók kuúnguusíng al/agaagiím ala kuúng taa al/ayiiká, bál bar aga hhe'és hhitaaro, kuúngú kilá' turi hhitín bal bar muu al/agingo ugwa hhe'és, kuúnguú kilá' turi al/aay.

² Aá AAKOÓ MUNGÚ, atén ti gurtleer, asma atén kuúng una harahhifaán, kuúng masók a baqmoórén umuú looár tlawa, nee masók an ba/amusmoorén qoomár slahha'amko.

³ Muu in ta'aaín as xuuraaír afoorók, xoordu nin diyaa/atiyá' as sihhtanoorók.

⁴ Mukók kudá' taa ohín kuna burumbuúr adór naanaga, muu kun i /akumiit adór tsaxwi'i.

⁵ AAKOÓ MUNGÚ aa xirfuút asma inós i gáwtí dirii', Inós Siyoni gan dalaa/ ar sakwasleemár ganaa' nee hotaá ganaa'á'.

⁶ Mungú tari kudá' tundus dinqisiiká baraá slafingwhunge, nuri ló'wa ba/amiimis, nuri sagalooárí hanmiis nee xu'utiro. Qaasirhúng ar ur tari AAKOÓ MUNGÚ kuwa ilaiwawa/a'.

⁷ Ga/aawaak, muk'ín oo miguuse i baraá lohdu wa /aa/amín, ya/abuuser'ín tidár wayda /aa/eewo aa slahhá'.

⁸ Loohidá' ur gár ga ohiim i káhh, hhaytusmoó loohidár waraáhh i kaahh, Al'axweesanay kwa warqemamiís lamabu'uuse kaa waqaá' heé hee gu heé wá tsatsahhaám i kaahh.

⁹ Yaamu i tsuunqumiisiyá' nee na kahiyé', Lebanoni ina qor'ót, iri kát, Sharoni ina adór xaanxaay tleehhít, nee loo/ór xaa'aá Bashani nee Karmeliro i páhh.

Mungú i wakuuseerós nanaaqán

¹⁰ AAKOÓ MUNGÚ i kaahi, «Daxta aníng ni tláw, daxta aníng ti amohhe'eés, daxta aníng ti kilooeé' xirfayeés.

¹¹ Muruuhúng sleémeero oo taa qoomaamesé' a adór muundáy, nee gár ta sleera baraá muruuhúng kwisinge a slaapú, hiinsluuhúng an asltá kuungá' nu /aay.

¹² Xoordu kin daa/ adór múk busluú /awák gu tlehhiít tari adór laqayaá ta tsaát kiri qaás baraá asla.

¹³ Kuungaásingá sawen tlehhmi'iieé' iiárií qaasaak, nee kuungaásingá' tsewen /uurueé' ya/aamaak.

¹⁴ Múk tlakuuse i da'ayumiit baraá Siyoniro mukdá' Mungú gu ilaiwawa/aaká i daaraax nee ta kaahi, «Baraá tla/agwrene heé qiítl dír asltá /ayiima, baraá tla/angwrene heé qiítl iwa iwiiti dír asltá baloó gwa'aaká.»

¹⁵ An heé hota ganaá' nee oo axweesani hhó' kudá' slaasláwár /ayta ga waaqaqaá', an kudá' slukma ga baloó i qaytaaká. Kudá' kángw tseerdaá muu kiwa ku'umiisi axamisuuwo gu sla'aaká, nee kudá' ilaawós gaa gumamaa' as gár tlaakw mingiwa ár.

¹⁶ Heé adoorí hotaawós i gawaá gawa, dirós tidá' amohhoo' kaa harweér ar koo/ír gawit ar tla/u, muruú /aymaarós kun hanmiis umuú daqto, nee ma'aá wahaangw gi baloó dakuusiiká.

Xirfuú aluú wa hi'iít

¹⁷ Kuungá' hhohh'aarír waawutmo a aandá' nee yaamaá i sawaawuti'ii'in i aandá' adór nira weelaahatiyé'.

¹⁸ Inslawaywók gár dae tlaaq ar aa waarahh gari insláy tari o', «Mukdá' atén ta fadiit nee ohme gaa qoomeemees ar xooslmo i amoomá? Mukdá' /aampuurén awa xuuma ga tsawtsawumamiis i amoomá?»

¹⁹ Kuungá' múk sagegawdén u baloó aanda'aaká, tam múk axweesani bó/ oo ta tsatsahhanda'aaká sleeme, múk axweesantaín ga mororohhiím ar ta tsahhká.

²⁰ Gixsár Siyoni i qaytaak tidá' deeloorén ar ur kawa tleehhaán gixsár Yerusalemu xuxuaak yaamaá na xasliitiye' nee heemaduwós ki gawden, Kaaka/amaawós ki baloó tu/iiká nee him'eerós ka baloó tlaaqiiká.

²¹ Ala AAKOÓ MUNGÚ ar Aleesleemuwose in baraadií dirii' as atén, yaamaá yau diren nee duxeero. Miringe nee hhansi'iwo ki baraadár uhisiiká tam meélír ur baraadá' gir otká.

²² Asma AAKOÓ MUNGÚ an kudá' kwasleemaduurén ngi tlaáq nee ti sawaawuti'ii'iím, AAKOÓ MUNGÚ an waawutmoorén, inós atén tin ba/amis.

²³ Kuungaá Siyoni, him'erhúng i sololo'ót, dabér do' tseegaro ga alesleeraaká tam ngiwa bihheérí ot, an qoomár muruudá' tinda haasaáng wa hayóh kuwa qasmiisi, tam toqooráy sleeme muruuda' gun sláy.

²⁴ Baraadae heé oó', «Aníng a tiíq.» i kaahh, múk baraadá' wa hoót tlakweemaaín sleémeero ki gurtláy.