ISAYA 3 - Biblía Axweesantá Hhohho' ar Mungú 2004

Múk Yerusalemu aa leexuút

¹ Ga/aawaak Aako, AAKOÓ MUNGÚ Aleesleemusmo, baraá Yerusalemu nee Yudawo nu harahhifo hingees, nee haraxu'utír muruú /aymaro, nee ar muruú wahaangw sleémeero.

² Migusmo gu hingees nee slaqwarusmoowo, har'ohusmo nee aarusmoowo, tlaa/usmo nee aakoowo,

³ geeraharusmoó slaqwara oo múk mibeeri kooán, heé taa uráy haniís, nee hara'ayusmoowo, nee da/alusmoó fuqurángw koóm, nee qwaslaarmoó tsuuqár baala.

⁴ Aníng daaqoó nákw u qaás tawa geeraharuuser'ín, nee na/aá qaweero inooín ngin sawaawuti'iná'.

⁵ Nee muu tiri kilooín baramaanuus, umuú heewo nee mulqumoowós, umuú heewo nee inslaawmoowós. Masoomo iri saga gawduú tleehh dír baabuúwose, nee heé daqaatlaákw dír geeraá heé ilaiwa/amér koóm.

⁶ Qoomaadae hee hhiyaawós gun oh, baraá doó baabuúwós wa ale, iri ooi, «Kuúng a tlabaá koón, ti sawaawuti'iin, ti tu/ baraá slahh'amaayerí yaariire. Kuúng tari geeraharusmoorén.»

⁷ Baalaadae inós afo ga gáwtí tlees iri ooi, «Aníng a heé múk hungu/umisaaká, asma baraá dooeene muruú /ayma i kaahh tam tlaba', sleeme mi geeraharusmoó múk wa qaasara'.»

⁸ Asma múk Yerusalemu taa dukuúts, nee oo Yuda aa huú', asma AAKOÓ MUNGÚ nguna si'iyé', ar tlehhmi'ii'ín nee axweesanay'ín, xirfuuwós ngwaa gaárií xui'iiká baraá tla/angw'ine.

⁹ Gitsee/er'ín baraá aán gár ir lamabu'uun a tlakweemaaín kudá', adór kuqaá Sodoma, slám ki lu/u/unká. Mukwí a tsaxwaaín, asma hhintleemooín ngaa tlakweemár ayé'.

¹⁰ Múk hota ganaá' ádbawaak adór inooín tar tsiní, asma inooín mamaá tlehhmi'ii'ín ngi /ayiyá'.

¹¹ Ala mukduú tlakuuse a tsaxwaaín ado gi alxir'imít, asma adoodá' naa tleehhiyé' an tidá' gi slaw.

¹² Baraá kángw muk'eene, inooín kin baramaanuus nee na/ii, nee /ameena gin sawaawuti'iín. Aá muk'eé', kuungá' tunduu qwaareemiis geeraharuuserhúng, nee loohír kuungae hariim eeharto ngin hhitiitiná'.

Mungú i mukós sakwasleemuut

¹³ AAKOÓ MUNGÚ daxta taa amohhe'eés sakwasleemaro, aa sihhiít as mukós nguwa sakwasleemuuti.

¹⁴ AAKOÓ MUNGÚ i dah baraá sakwasleema, dinkwa nee bariise nee geeraharuusér mukós, «Kuungá' an kudá' qaymór sabiíbu aga /age', daqaari'iimár taa dír narkuutér wa hayohindé', aga batsé' baraá marayhúng.

¹⁵ Gár muk'eé' kus baramaanusa' a milá? Nee gár narkuute kas slahh'eemisa'? Anuú Aakoó MUNGÚ Aleesleemusmo, nu yaahamiís.»

/Ameenár Yerusalemu kawa naanaáq

¹⁶ AAKOÓ MUNGÚ i kaahi, «Dasuú Siyoni iwa daara/an, bir hi'iimitiyá' sage nga gáwtí kawaawa'ané', nee ilaaín in tawo waseeliná' as ilatleeri. Hi'itanor'ín ar taqanaa/i, i hara mitingaroó tsingili'imisiyá' ar ya'aaín.

¹⁷ Gawaá adoorihe anuú Aako /ameenár Siyoni an slaáhh ar sager'ín deei ngiwa uhiin, se'eemer'ín an deéqw, Anuú AAKOÓ MUNGÚ inooín ngiri /ankweetsiís.»

¹⁸ Baala i hardát ar Aako muruudá' sleémeero /ameenár Yerusalemu ir daara/aan nguwa hayoohi, mungi'i nee himtaawero,

¹⁹ piiraa/ó nee mitingiri nee slam'eeri,

²⁰ nee warqamaá sageero, nee baangélaywo nee inqwaruú siinootaywo, nee chúpár mooyángw kooma, nee hiriísaywo,

²¹ nee peétero, nee piiraa/oó gawaá duungeero,

²² nee tlabaá tar ti'imiiti deelór urene, nee biritsitoó gawaá sum'i, nee burungétaydá' iló' ta gawaá sum'i wá untsumisi, nee tlakwi'iwo,

²³ nee tlabaá /aankwetsuú laqaaqama'a, nee tlabaá taa kitaánír tleehhi, nee warqamaá sageero, nee sheélaro.

²⁴ Kitángw mooyángw tsuú' iwa pieelin, gaa a dixte. Kitángw himuú hhoohhooe, gaa a tlaatlawi kan tseek. Kitángw se'éngw hhohhoe, gaa a paynú in er'emiit. Kitángw tlabaá hhohhoe, gaa a slaxareemo kin tsiit. Kitángw hhohhoaariro gaa a alsi'imu.

²⁵ Hhawaateehúng ki slururu'uus ar paánga, miguuserhúng kan daasl baraá slaqwaraaro.

²⁶ Afér gixsár Siyoniro gaa a wa/aa/i nee tsuunqumis, gixsarí tari adór /ameenír taa geexáy ar pakáy, iri iwít baraá teeri.