ISAYA 27 - Biblía Axweesantá Hhohho' ar Mungú 2004

¹ Baalaadae AAKOÓ MUNGÚ makiito'odá' ur ta bay Lewiatani gan muux ar paángarós tidá' yaangariir xaraasl. Inós i ni/iín baraá tlawtá wa ale, a dayshamoó úr oo baraá tlawtá hoót.

² Baalaadae AAKOÓ MUNGÚ in ooi, «Daa'aangw oohaak as qaymor'eé' tidár sabiíbu sla'atamis.

³ Anuú AAKOÓ MUNGÚ an dooslusmoowós, umuú qoomaaro an ma'áy eemamiís, an xumxaaxuúm xweera nee tlaatla/aango, as hee mingiwa hhitár áy.

⁴ Qaymor'ee' tí a i buhhaaká, barnaxes laqaya' nee fuquráy ngaa i haratlayé', aníng an slaáqw nee laqaya' nee fuquráy, ngiri dinkwaárí daá/ sleémeero ar asla.

⁵ Ala bar inooín xuumar'eé' ngi slaiyá', ni wayduú aye' dir'eé', eeít, ni wayduú aye' dir'eé'.»

⁶ De'emaá hi'iita'a xwaylár Yakobo dee/ár gu síhh, múk Israeli iri /ayuus, nee iri harmaa/, mamuuín yaamu sleémeero ngiri niiqiyá'.

⁷ Mungú inooín gaa qo sláhhi ar adoodá' mukdá' inooín gaa slaahh ngura slaáhh? Laqaá inooín ka qo tsú/i ar adoodá' mukdá' inooín gaa tsuu/ ngura tsuú/?

⁸ Ina muúx ar adór qoom kiri loohatís, qoomár fur'ár bambaao ar da/aá daahh, giri hingeés ar slahhtá xaraasl.

⁹ Gawaá adoorihe, adoorí an adór tlakweemaá múk Yakobo kir fiitsi, tlehhmuuwí in bu'uut tlakweemaaín hingeesaro, qoomár tlaa/e sleémeero awa kiteeraá ilahhooa birka naasúy, adór nee Munguúduú Ashera nee kiteeraá ilahhooár mooyángw koom kawa hanmiisi birka suqúy.

¹⁰ Asma gixsadá' koo/i gawit kaa kilós geexáy, kana geexáy kari máy adór xaanxaay, makaay kin baraadá' wa de'én niri tlahhminá'. Nee haleemiiwós ngiri /ayiyá'.

¹¹ Haleemaá xaai nina kahiyé' niri qeqtiné', /ameena nin hardát giri sleemís giri ásltár oohamís. Asma mukwí gár aa tsaáhh i káhh, gawaá adoorihe, tleehharusmooín gi sangw gurtlayká, kudá' inooín gaa tleehh gi sangw i gurtlayká.

¹² Baalaadae AAKOÓ MUNGÚ balaangós gu slaahh iimír yaaér Eufratér wá tleemu, ay digmuú yaamaá Misri. Kuungaá Israeli tunduri wakeetín burumburiingo.

¹³ Baalaadae tarumbeétár yangaariir kari ufaahh. Mukdá' sleémeero aa qwaar baraá yaamaá Ashuru, nee kudá' taa huwi baraá yaamaá Misri ni hardihiyá', AAKOÓ MUNGÚ nguri sluufmisiyá' gawaá tloomarós tidá' hhoohhoo' wa ale, ar Yerusalemu.