ISAYA 26 - Biblía Axweesantá Hhohho' ar Mungú 2004

Mungú mukós gu arba/tírí haniis

¹ Baalaadae daa'angwí ku daa' baraá yaamaá Yudawo, atén gixsár gawit a koomaán, Mungú ba/ama ngin atén ar harwediit adór koo/i.

² Afér gixsa gweeraak, as xoorór hota ganaa' iwa dat tidá' inkihhmúr hotatiim.

³ Mukdá' sleémeero inslaway'ín aa dirógí xasliit, nee kudá' kuúng ugwa harahhiif, kuúng in amohhe'és baraá wayduú ló'.

⁴ AAKOÓ MUNGÚ na harahhifeek ay kureeraá kureér, asma AAKOÓ MUNGÚ, an tlaa/ár alhhe'esay wasl.

⁵ Asma yaamuloouusér ayaá gawa gana yaamií daáhh, gixsadá' iia tleer gana yaamií daáhh ay baraá hhape, gari kwaáhh baraá teeri.

⁶ Daxta gixsadá' ya'aá muu ngin adarahiyá' ya'aá narkuute ngin adarahiyá' nee ya'aá múk alemaá koóm sleeme.

⁷ Loohír heé hota ganaá' i alqoón, kuúngudá' ganaá' loohír heé hota ganaá' a gan'ás.

⁸ Aá AAKOÓ MUNGÚ, baraá lohdaá sakwasleemaroge atén kuúng un daamaán, muneerén gár i ló'wa sla' a inslaslángw umuuwók.

⁹ Baraá muunaáeene kuúng una islaasláw looa ngari fiíq, nee baraá qeerueene kuúng una tseewa leelehhtuú áw ar tsáp. Asma bál bar yaamu iga sakwasleemút, yaamuloouusér baraá yaamu hotaá ganaa'á' gi intsaatsáhh.

¹⁰ Ala tam sla'aari ka tleehhi dír heé tlaákw, inós hotaá ganaa'á' gi baloó ado slayká, tam baraá yaamaá múk hota ganaa'a inós tlakweema giqo tleehh, nee uroó AAKOÓ MUNGÚ gu tsatsahhanká.

¹¹ Aá AAKOÓ MUNGÚ, dakók ugwa mak gáwtí tlés, ala inooín ngu ara'ariaaká. Ala sla'aarirók tidá' daanduú mukoge u tliw/iim ngi ariye', nee mureekeeseek, asltá wakuuseerók kawa i búhh inooín ngi hhaamis.

¹² Aá AAKOÓ MUNGÚ, kuúng wayda nguna aténí hanís, kuúng gadiyeérén sleémeero ana tléhh as atén.

¹³ Aá AAKOÓ MUNGÚ, Munguúrén, bariisér hatlá' atén tina balít, ala atén kuúng kilók un lamabu'umaán tawa Munguúrén.

¹⁴ Inooín naa qatliyé', i baloó slafiaaká, inooín naa qatliyé' slám i waslee/iaaká, asma kuúng ina alhi'iitanór eér as kiwa hhaamis, inooín kiri baloó inslayká.

¹⁵ Ala aá AAKOÓ MUNGÚ, kuúng xoororén ana tlahhás, nee yaamurén ngina dók, as adoorí kuúng tu xirfayemiis.

¹⁶ Aá AAKOÓ MUNGÚ, qoomár niwa slahhahhaiya' nina amorógí /akumitiyé', qoomár kuúng kiwa slahh'eemís, kuúng uri firariné'.

¹⁷ Adoodár /ameenír qoomár xwayla gaa eer i diri', iwa tonganus nee iwa /aa/amiin as asltá xwayla, an adór atén kuúng tay tléhh, aá AAKOÓ MUNGÚ.

¹⁸ Atén slahh'amuú adór kuquú asltá xwayla tina /aáy tari laqwlimaán, ala gár taa laqwlimaán a fur'a, atén arba/tír naa slawaán as yaamuurén i káhh, tam faarór muu aa dogindiiká baraá yaamuwo.

¹⁹ Mukók kudá' aa qaatl i waaslee/, slaqooín i waslee/iyá', kuungásingá' baraá yaamaá hootá' tlawaaré' daaé' ar qwala/, asma Mungú hara'uuwós oo slafiingw ngu paahhaas, nee gi'i múk baraaíní diriiá' ngu duuxiyá'.

Sakwasleema nee ki/isa

²⁰ Qwalaasé' muk'eé', dahé' baraá kutwayhúng, afér kutwayhúng aluuhúng wá tseegaak, baraasíng i nahhataak har qoomár niinawe ay dír buhhtakaá Mungú ni waaraahhiya'.

²¹ Asma ga/aawaak, AAKOÓ MUNGÚ ni tláy dirós tidá' i dirii'i, as yaamuloouusér yaamuuká' ngiwa muxi as tlakweemaaín, tam tseerduudá' taa ku'umamiís hhape sleeme gi gu/uká, tam tu'uudá' sleeme hhape gi tuuntukká.